އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން ސްޕެޒިއާ ބަލިކޮށް ތާވަލުގެ އެއްވަނައަށް އޭސީ މިލާން ޖެހިލިއިރު، އެޓަލާންޓާއާ ވާދަކޮށް އެންމެ ފަހުގެ ޗެމްޕިއަން އިންޓަ މިލާން އެއްވަރުވެއްޖެއެވެ.

ރަށުން ބޭރުގައި ކުޅުނު މެޗުން މިލާން މޮޅުވީ 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ތިންވަނަ މިނެޓުގައި މިލާނުން ވަނީ ލީޑު ނަގާފައެވެ. ކަލޫލޫ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑެނިއަލް މަލްޑިނީއެވެ. އެއާއެކު ޑެނިއަލް ވެފައިވަނީ މިލާނަށް ލަނޑު ޖަހައިދިން ތިންވަނަ ޖީލުގެ މަލްޑިނީއަށެވެ. މީގެ ކުރިން އޭނާގެ ބައްޕަ ޕައޮލޯ މަލްޑިނީ އާއި، ކާފަ ސެޒާ މަލްޑިނީ ވަނީ މިލާނަށް ކުޅެ ލަނޑު ޖަހާފައެވެ.

ޑެނިއަލް މަލްޑިނީގެ ލަނޑުން މިލާނުން ލީޑު ނެގި ނަމަވެސް، މެޗުގެ 80 ވަނަ މިނެޓުގައި ސްޕެޒިއާއިން ވަނީ ނަތީޖާ އެއްވަރުކޮށްފައެވެ. އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޑެނިއެލް ވާޑޭއެވެ. އެކަމަކު އޭގެ ހަ މިނެޓު ފަހުން އެލެކްސިސް ސައެލެމައެކާސް ތަނަވަސްކޮށްދިން ފުރުސަތަކުން ބްރަހިމް ޑިއާޒް ވަނީ ލަނޑެއް ޖަހައި، މި މެޗުން މިލާން މޮޅުކޮށްދީފައެވެ.

މި މޮޅާއެކު ތާވަލުގެ އެއްވަނައަށް މިލާން ޖެހިލިއިރު، ލީގުގައި ހޮނިހިރު ދުވަހުގެރޭ ކުޅުނު މެޗުން އެޓަލާންޓާއާ އެއްވަރުވެ އިންޓައިން ވަނީ އަލުން އެއްވަނައަށް އަރަން ލިބުނު ފުރުސަތު ނަގާލާފައެވެ.

އިންޓަގެ ދަނޑުގައި ކުޅުނު މި މެޗު އެއްވަރުވީ 2-2 ގެ ނަތީޖާއަކުންނެވެ.

މި މެޗު ފަށައިގެން ފަސްވަނަ މިނެޓުގައި ލަޓާރޯ މާޓިނޭޒް ވަނީ ލަނޑެއް ޖަހައި، އިންޓައަށް ލީޑު ނަގައިދީފައެވެ. އެކަމަކު މެޗުގެ 30 ވަނަ މިނެޓުގައި އެޓަލާންޓާއިން ނަތީޖާ އެއްވަރުކުރިއިރު، އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ރުސްލާން މަލިނޯވްސްކީއެވެ. އަދި އޭގެ އަށް މިނެޓު ފަހުން އޭރިއާ ތެރެއިން ފޮނުވާލި ހަމަލާއަކުން ރަފައެލް ޓޮލޯއި ވަނީ ލަނޑެއް ޖަހައި، އެޓަލާންޓާއަށް ލީޑު ނަގައިދީފައެވެ.

މި މެޗުން އިންޓަ ބަލިނުވެ ސަލާމަތްވީ މެޗުގެ 71 ވަނަ މިނެޓުގައި އެޑިން ޒެކޯ ކާމިޔާބުކޮށްދިން ލަނޑުންނެވެ. އަދި މެޗު ނިމެން ހަތަރު މިނެޓަށް ވެފައި ވަނިކޮށް ލީޑު ނަގަން އިންޓައަށް ޕެނަލްޓީއެއް ލިބުނު ނަމަވެސް، އެ ޓީމުގެ ފެޑެރީކޯ ޑިމާކޯ ފޮނުވާލި ޕެނަލްޓީ އަމާޒުވީ ގޯލުގެ ހުރަސް ދަނޑިއަށެވެ.

މި ނަތީޖާތަކާއެކު ތާވަލުގެ އެއްވަނައިގައި މިލާން އޮތީ ކުޅުނު ހަ މެޗުން ލިބުނު 16 ޕޮއިންޓާއެކުއެވެ. ދެވަނައިގައި އޮތް ނާޕޮލީއަށް ފަސް މެޗުން 15 ޕޮއިންޓް ލިބިފައިވާއިރު، އިންޓަ އޮތީ ތާވަލުގެ ތިންވަނައިގައި ހަ މެޗުން 14 ޕޮއިންޓާއެކުއެވެ.