އެމްބީއޭ 3x3 ޓޯނަމަންޓް ގައި ބައިވެރިވުމުގެ ފުރުސަތު ހުޅުވާލައިފި
27 ސެޕްޓެމްބަރުގެ ކުރިން ރަޖިސްޓަރީ ކުރަން ޖެހޭ
މި މުބާރާތުގައި ހިމެނެނީ މައިގަނޑު 3 ކެޓަގަރީއެއް
މޯލްޑިވްސް ބާސްކެޓްބޯލް އެސޯސިއޭޝަނުން އިންތިޒާމްކޮށްގެން 30 ސެޕްޓެމްބަރ 2021 ގައި ބޭއްވުމަށް ހަމަޖެހިފައިވާ އެމްބީއޭ 3x3 ޓޯނަމަންޓް 2021 ގައި ބައިވެރިވުމަށް ބޭނުންވާ ޓީމުތަކަށް އެ ފުރުސަތު ހުޅުވައިލައިފިއެވެ.
ރެޖިސްޓްރޭޝަން ހުޅުވާލައިފައިވަނީ ފީބާ 3x3 ލިންކް މެދުވެރިކޮށް 27 ސެޕްޓެމްބަރ 2021 ވާ ހޯމަ ދުވަހުގެ 14:00 ގެ ކުރިންނެވެ.
މި މުބާރާތުގައި ހިމެނެނީ މައިގަނޑު 3 ކެޓަގަރީއެކެވެ. އެއީ އޯޕެން ކެޓެގަރީ (ފިރިހެން އަދި އަންހެން)، 18 އަހަރުންދަށް (ފިރިހެން އަދި އަންހެން) އަދި 15 އަހަރުންދަށް (ފިރިހެން އަދި އަންހެން) ކެޓަގަރީއެވެ.
މޯލްޑިވްސް ބާސްކެޓްބޯލް އެސޯސިއޭޝަނުން ބުނީ މިފަދަ މުބާރާތެއް އެންމެ ފަހުން ބޭއްވީ 2019 ވަނަ އަހަރު ކަމަށެވެ. އެއަހަރު ވަރަށް ބޮޑުކޮށް މުބާރާތް ބޭއްވި ކަމަށާއި މިއީ ޕެންޑަމިކްގެ ފަހުން ބާއްވާ ފުރަތަމަ މުބާރާތް ކަަމަށް އެ އެސޯސިއޭޝަނުން ބުންޏެވެ.
