ތައިލެންޑަށް އެތެރެވާ، ވެކްސިން ފުރިހަމަކޮށްފައިވާ މީހުން މިހާރު ކަރަންޓީނުވާން ޖެހޭ ދެ ހަފްތާގެ މުއްދަތު ދެބައިކުޅަ އެއް ބަޔަށް ކުޑަކުރުމަށް ތައިލެންޑްގެ ޑިޒީސް ކޮންޓްރޯލް ކޮމިޓީން ނިންމައިފިއެވެ.

އެކޮމިޓީން މިގޮތަށް ނިންމާފައިމިވަނީ އަންނަ މަހުން ފެށިގެން ކަރަންޓީނަށް ލުއިތަކެއް ދިނުމަށާއި ބެންކޮކާއި ފަތުރުވެރިންގެ މެދުގައި މަގުބޫލު އެހެން ތަންތަން އަލުން ހުޅުވާލުމުގެ ޕްލޭނަށް އަމަލުކުރުން ލަސްކުރަން ނިންމާފައިވަނިކޮށެވެ. ތައިލެންޑް ހުޅުވާލުމަށް މަސައްކަތްކުރަމުން މިއަންނަނީ ގާތްގަނޑަކަށް 18 މަސްދުވަހު އެގައުމު ބަންދުކޮށްފައި އޮތުމަށްފަހުއެވެ. މިއާއެކު އެގައުމުގެ ޓޫރިޒަމް އިންޑަސްޓްރީ ވަނީ އެއްކޮށް ކަހަލަގޮތަކަށް ހުއްޓުމަކަށް އައިސްފައެވެ. 2019 ވަނަ އަހަރު އެކަނިވެސް އެގައުމަށް 40 މިލިއަން ޓޫރިސްޓުން ޒިޔާރަތްކުރިއެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެގައުމުގެ ސިއްހީ އިސް އޮފިޝަލަކު ވިދާޅުވީ ކަރަންޓީނުގެ މުއްދަތު މަދުކުރަނީ ހަމައެކަނި ފަތުރުވެރިންނަށް ނޫންކަމަށެވެ. ކަރަންޓީނުގެ މުއްދަތު މަދުކުރުމަށް ނިންމުމުން އެކަމުގެ ފައިދާތައް ވިޔަފާރިވެރިންނަށާއި އެގައުމަށް ކިޔަވަން އަންނަ ކުދިންނަށް ވެސް ވާނެކަމަށް އޮފިޝަލް ވިދާޅުވިއެވެ.

މިހާރު ކޮމިޓީން ނިންމާފައިވާ ނިންމުން ހޯމަ ދުވަހު ސަރުކާރަށް ހުށަހަޅާނެއެވެ. މިނިންމުމުގައި ވެކްސިން ފުރިހަމަކޮށްފައިނުވާ މީހުން ވައިގެ މަގުން އަންނަނަމަ 10 ދުވަސް އަދި އެއްގަމުން އަންނަނަމަ 14 ދުވަހު ކަރަންޓީނުވާން ޖެހޭނެއެވެ.

ތައިލެންޑްގެ ކަމާބެހޭ ފަރާތްތަކުން އަންނަ މަހު އެގައުމު ހުޅުވާލުމަށް އެކުލަވާލި ޕްލޭނަށް އަމަލުކުރުން ނޮވެމްބަރ މަހަށް ވަނީ ފަސްކޮށްފައެވެ. އެއީ އެގައުމުގައި ވެކްސިން ޖަހާފައިވާ މީހުންގެ އަދަދު މަދުވަމުންނެވެ. އެގައުމުން މަސައްކަތްކުރަމުން އަންނަނީ ވެކްސިންގެ ދެ ޑޯޒް ފުރިހަމަކޮށްފައިވާ މީހުން އެއްވެސް ގޮތަކަށް ކަރަންޓީނުވާން ނުޖެހޭނެ ގޮތްހެދުމަށެވެ.

މިޕްލޭންގެ ދަށުން މިހާތަނަށް ވެކްސިން ފުރިހަމަކޮށްފައިވާ މީހުންނަށް ކަރަންޓީނުގެ ލުއިތަކެއް ދީގެން އެތެރެވަމުން އަންނަނީ ޕުކެޓްގެ އިތުރުން ސައުމީ އައިލެންޑްސް އަށެވެ.

ތައިލެންޑްގެ 72 މިލިއަން މީހުން ދިރިއުޅެމުން އަންނަ އާބާދީގެ ވެކްސިންގެ ދެ ޑޯޒް ފުރިހަމަކޮށްފައިވާ މީހުންގެ އަދަދު ތިންބައިކުޅަ އެއްބަޔަށް ވެސް ނާރައެވެ.

ތައިލެންޑްގައި މިހާތަނަށް 1.5 މިލިއަން މީހުންނަށް ކޮވިޑް ޖެހިފައިވެއެވެ. އަދި 15،884 މީހުން ވަނީ މިބަލީގައި މަރުވެފައެވެ.