ފްރޭމްކޮށް، ބޭރުކުރީ މަގާމުގެ ދަހިވެތިކަމުގައި: ޢަލީ ވަޙީދު
ފްރޭމްކުރީ ސަރުކާރުގެ ތެރެއިން
ކުރީގެ ޓުއަރިޒަމް މިނިސްޓަރު ޢަލީ ވަޙީދު
ތުހުމަތު އަޅުވައި، ޓުއަރިޒަމް މިނިސްޓަރ ކަމުން ވަކިކުރެއްވީ މަގާމުގެ ދަހިވެތިކަމުގައި ކަމަށް ކުރީގެ ޓުއަރިޒަމް މިނިސްޓަރ ޢަލީ ވަޙީދު ވިދާޅުވެއްޖެއެވެ.
ހޯމަ ދުވަހުގެރޭ ދިވެހިރާއްޖޭގެ މީޑިއާތަކާ ބައްދަލުކުރައްވައި ވާހަކަދައްކަވަމުން, ތަކުރާރުކޮށް އޭނާ ވިދާޅުވީ ޓުއަރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކޮށްފައިނުވާނެ ކަމަށެވެ. އެއީ ފްރޭމް ކުރުމުގެ މަގުސަދުގައި ސަރުކާރުގެ ތެރެއިން ކޮށްފައިވާކަމެއް ކަމަށެވެ. މިކަން ކޮށްފައިވަނީ ފިރިހެނުންތަކެއް ބައިވެރިވެގެން ކަމަށްވެސް އޭނާ ވިދާޅުވިއެވެ.
މަގާމުން އިސްތިއުފާދެއްވުމަށް އެދި އެންމެ ފުރަތަމަ އެމަނިކުފާނަށް ގުޅުއްވީ ރައީސް އޮފީހުގެ ސެކެޓްރީ ޖެނެރަލް ކަމަށް ޢަލީ ވަޙީދު ވިދާޅުވިއެވެ. އެއަށްފަހު ރައީސުލްޖުމްހޫރިއްޔާވެސް ގުޅުއްވައި އިސްތިއުފާ ދެއްވުމަށް އެދިވަޑައިގެންފައިވާކަމަށް އޭނާ ވިދާޅުވިއެވެ. އޭރުވެސް މިކަން ކޮށްފައިނުވާނެ ކަމަށް ރައީސުލްޖުމްހުރިއްޔާއަށް ދަންނަވާފައިވާކަމަށާއި، ނުކުރާ ކަމެއްގެ އިލްޒާމު އެޅިގެން މަގާމުން އިސްތިއުފާ ނުދެއްވާނެ ކަމަށް ވިދާޅުވި ކަމަށް, އޭނާ ވިދާޅުވިއެވެ. އެހެންނަމަވެސް ޓުއަރިޒަމް މިނިސްޓްރީގެ މުވައްޒަފުންތަކެއްގެ ފަރާތުން އައި ޝަކުވާއާ ގުޅިގެން އެގޮތަށް ނިންމެވީ ކަމަށް ވިދާޅުވި ކަމަށް ޢަލީ ވަޙީދު ވިދާޅުވިއެވެ.
އެއަށްފަހު އައީ މިނިސްޓަރ ކަމުން ވަކި ކުރި ކަމުގެ ސިޓީ ކަމަށް އޭނާ ވިދާޅުވިއެވެ. އަދި ނުކުރާ ކަމެއްގެ އިލްޒާމު އަޅުވައި މަގާމުން ވަކި ކުރުމުން، މިއީ މަގާމުގެ ބޭނުމުގައި ސަރުކާރުގެ ތެރެއިން ހިންގާފައިވާ އަމަލެއްކަން ވަރަށް ބޮޑަށް ސާފުވާ ކަމަށް ޢަލީ ވަޙީދު ވަނީ ވިދާޅުވެފައެވެ. އަދި މިވަގުތު ޓުއަރިޒަމް މިނިސްޓަރ ކަމުގެ މަގާމުގައި ހުންނެވީ ސަރުކާރުން ބޭނުންފުޅުވާ ބޭފުޅެއް ކަމަށް އޭނާ ވިދާޅުވިއެވެ.
އަލީ ވަހީދު ތަކުރާރުކޮށް ވިދާޅުވީ, އެއްވެސް މީހަކަށް ގަދަކަމުން ޖިންސީ ގޯނާއެއް ނުވަތަ އެނޫންވެސް ގޯނާއެއް ކޮށްފައި ނޯންނާނެ ކަމަށެވެ. މިކަން އެނގޭނެ މީހުން ޓުއަރިޒަމް މިނިސްޓްރީގައި މިހާރުވެސް ތިބޭނެ ކަމަށެވެ. އަދި އޭރު އެމަނިކުފާނުގެ ސެކިއުރިޓީ ބަލަހައްޓަން ތިބި އެމްއެންޑީއެފް ބޭފުޅުންނަށްވެސް އެމަނިކުފާނަކީ ކޮންކަހަލަ ބޭފުޅެއްކަން އެނގިވަޑައިގަންނަވާނެ ކަމަށް އޭނާ ވިދާޅުވިއެވެ.
ޢަލީ ވަޙީދު ޓޫރިޒަމް މިނިސްޓަރ ކަމުގެ މަގާމުގައި ހުންނެވިއިރު، އެ ވުޒާރާގެ އަންހެން މުވައްޒަފުންތަކަކަށް ޖިންސީ ގޯނާކުރި މައްސަލައެއްގައި އޭނާގެ މައްޗަށް ދައުވާ އުފުލައި, ޝަރީއަތް ކުރިއަށްދާއިރު އޭނާ ހުންނެވީ ބޭސްފަރުވާއަށް ރާއްޖެއިން ބޭރުގައެވެ. އެ މައްސަލަ ފެންމަތިވުމާއެކު އޭނާގެ ޕާސްޕޯޓު ހިފެހެއްޓުމަށްފަހު ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސްވެ، ޝަރީއަތް ފެށުނު އިރު ވެސް އޭނާ ރާއްޖެއަށް އެނބުރި ވަޑައިގެންފައެއް ނުވެއެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.
އޭގެ އިތުރުން، ވިސާ އޯވަރ ސްޓޭވެގެން އެގައުމުގެ ގާނޫނާ ޚިލާފުވި މައްސަލައިގައި ޢަލީ ވަޙީދު ހައްޔަރުކޮށް ޑިޓެންޝަންގައި ބަހައްޓާފައިވެއެވެ. އޭނާ ރާއްޖެ ގެނައުމުގެ މަސައްކަތް ކުރަމުން ދަނީ ސުޕްރީމް ކޯޓުގެ ޙުރުމަތް ކެނޑިކަމުގެ ކުށުގައި އޭނާގެ މައްޗަށް އިއްވާފައިވާ 2 މަހާއި 12 ދުވަހުގެ ހުކުމް ތަންފީޒު ކުރުމަށް އޭނާ މާލެ ގެނައުމަށް ކަރެކްޝަންގެ މައްޗަށް އަންގާފައިވާތީ, ކަރެކްޝަނުން ފުލުހުންގެ އެހީތެރިކަމަށް އެދިފައިވާތީއެވެ.
