އަލީ ވަހީދު އެމްޑީޕީއަށް
7 ޑިސެމްބަރު 2023 | ބުރާސްފަތި 05:57އަލީ ވަހީދު ވިދާޅުވީ، 7 އަހަރާއި 7 ދުވަހަށް ފަހު އެނބުރި އެމްޑީޕީއާ އަލުން ގުޅިވަޑައިގެންފައިވާ ކަމަށް
ކުރީގެ ޓޫރިޒަމް މިނިސްޓަރު އަލީ ވަހީދު
ކުރީގެ ޓޫރިޒަމް މިނިސްޓަރު އަލީ ވަހީދު އެމްޑީޕީއާ ގުޅިވަޑައިގެންފިއެވެ.
އެކަން ހާމަ ކުރައްވައި އެކްސްގައި ކުރެއްވި ޕޯސްޓެއްގައި އަލީ ވަހީދު ވިދާޅުވީ، 7 އަހަރާއި 7 ދުވަހަށް ފަހު އެނބުރި އެމްޑީޕީއާ އަލުން ގުޅިވަޑައިގެންފައިވާ ކަމަށެވެ.
އެމް.ޑީ.ޕީއަށާއި މުޅި ރާއްޖެއާއި ރާއްޖޭގެ ރައްޔިތުންނަށް ކާމިޔާބަށް އެދިވަޑައިގެން ހިތްވަރާއި މުރާލިކަމާއެކު ޚިދުމަތް ކުރައްވާނެކަމަށް ވެސް އަލީ ވަޙީދު ވިދާޅުވިއެވެ.
ޖިންސީ ގޯނާގެ ގިނަ ދައުވާތަކެއް އަލީ ވަހީދުގެ މައްޗަށް ކުރިއެވެ. މި ދައުވާތައް ކޮށްފައިވަނީ، ޓުއަރިޒަމް މިނިސްޓަރުގެ މަގާމުގައި ހުންނަވައިގެން އެ މިނިސްޓްރީގެ ގިނަ އަދަދެއްގެ އަންހެން މުވައްޒަފުންތަކަކަށް ޖިންސީ ގޯނާ ކުރެއްވިކަމުގެ ތުހުމަތުގައެވެ. އަލީ ވަހީދު ވަނީ މި ތުހުމަތުތައް ދޮގުކުރައްވާފައެވެ.
އަދި އެ ދައުވާތައް ޕްރޮސެކިއުޓަރ ޖެނެރަލް އޮފީހުން އަނބުރައި ގެންދިއުމާ ގުޅިގެން، 3 އަހަރު ދުވަހު އިނގިރޭސިވިލާތުގައި އުޅުއްވުމަށްފަހު އޭނާ ރާއްޖެ ވަޑައިގަތީ 11 ޖުލައި 2023 ވީ އަންގާރަ ދުވަހުއެވެ.
އެއަށްފަހު ރިޔާސީ އިންތިޚާބުގެ ފުރަތަމަ ބުރަށްފަހު އަލީ ވަޙީދު ވަނީ އޭރު ހުންނެވި ޖުމްހޫރީ ޕާޓީއިން ވަކިވެވަޑައިގެންފައެވެ.
