އެމްއާރުއެމްގެ ޒައީމުގެ މަގާމަށް މައުމޫން ކުރިމަތިލައްވައިފި

މޯލްޑިވްސް ރިފޯމް މޫވްމެންޓް (އެމްއާރުއެމް)ގެ ޒައީމުގެ މަގާމަށް އެޕާޓީ އުފެއްދެވި ކުރީގެ ރައީސް މައުމޫން އަބްދުލްޣައްޔޫމް ކުރިމަތިލައްވައިފިއެވެ.

މައުމޫން ވަނީ ޒައީމް ކަމަށް ކުރިމަތިލައްވާ ފޯމު އެޕާޓީގެ ސެކެޓްރީ ޖެނެރަލް އަބްދުލްއަލީމް އާ ހަވާލުކުރައްވާފައެވެ.

އެމްއާރުއެމް އިން އަންނަނީ އޮކްޓޯބަރ މަހުގެ 2 ވަނަ ދުވަހު އެޕާޓީގެ ފުރަތަމަ ނޭޝަނަލް ކޮންވެންޝަން ބޭއްވުމަށް ތައްޔާރުވަމުންނެވެ. އެމްއާރުއެމްގެ ނޭޝަނަލް ކޮންވެންޝަންގައި ޕާޓީގެ އިސްމަގާމުތަކާއި ކޮމިޓީތަކަށް އިންތިޚާބުކުރުމަށް ޕާޓީގެ އަސާސީ ގަވާއިދުގައި ބަޔާންކޮށްފައިވާ މަގާމުތަކަށް މީހުން އިންތިޚާބުކުރާނެއެވެ.

ނޭޝަނަލް ކޮންވެންޝަންގައި 16 މަގާމަކަށް މީހުން އިންތިޚާބުކުރުމަށް ވަނީ ހަމަޖެހިފައެވެ. އޭގެތެރޭގައި ޒައީމް ކަމާއި، ޕާޓީގެ ރައީސް އަދި ނާއިބުރައީސާއި ޕާޓީގެ އަންހެން ނާއިބުރައީސްކަން ހިމެނެއެވެ.  

މައުމޫން އިސްވެ ހުންނަވައި އެމްއާރުއެމް އުފެއްދެވީ ޕީޕީއެމް ދެބައިވެ ޕީޕީއެމްގެ ބާރު ކުރީގެ ރައީސް އަދި މައުމޫންގެ ކޮއްކޯފުޅު އަބްދުﷲ ޔާމީން ހޯއްދެވުމުންނެވެ. ޕީޕީއެމްގެ ރައީސްކަމުގައި ހުންނަވައި ފެއްޓެވި އިސްލާހީ މަސައްކަތުގެ ތެރެއިން އެމްއާރުއެމް އުފެއްދެވިއިރު ޕީޕީއެމް އުފައްދަވާފައިވަނީވެސް މައުމޫން އިސްވެ ހުންނަވައެވެ.

ޕީޕީއެމްގެ ކުރިން މައުމޫން ވަނީ ޑީއާރުޕީ އުފައްދަވާފައެވެ. އެޕާޓީވެސް އެމަނިކުފާނަށް ގެއްލުނީ އޭރު ޑީއާރުޕީ ހިންގަވަން ތިއްބެވި ބޭފުޅުންނާއި މައުމޫނާ ދެމެދު އުފެދުނު ސިޔާސީ ޚިޔާލުތަފާތުވުންތަކުގެ ސަބަބުންނެވެ.

އެމްއާރުއެމް އަކީ ރައީސް މައުމޫން އުފެއްދެވި ތިން ވަނަ ސިޔާސީ ޕާޓީއެވެ.