ބާސާގެ ދަނޑުގައި ބަޔާނަށް ފަސޭހަ މޮޅެއް

މި ސީޒަނުގެ ޔުއެފާ ޗެމްޕިއަންސް ލީގުގައި ކުޅުނު ފުރަތަމަ މެޗުން ބާސެލޯނާ އަތުން ފަސޭހަކަމާއެކު ބަޔާން މިއުނިކް މޮޅުވެއްޖެއެވެ.

އަންގާރަ ދުވަހުގެރޭ ބާސާގެ ދަނޑުގައި ކުޅުނު ބަޔާން މޮޅުވީ 3-0 ގެ ނަތީޖާއަކުންނެވެ.

މި ފަހަރުގެ ގްރޫޕް އީގައި މި ދެ ޓީމު ހިމެނޭއިރު، މި ދެ ޓީމުގެ އެންމެ ފަހުން ބައްދަލުކުރީ މިދިޔަ ސީޒަނުގެ ޗެމްޕިއަންސް ލީގުގެ ކުއާޓާ ފައިނަލުގައެވެ. އެ މެޗުން ބާސާ ވަނީ ލަދުވެތި ގޮތަކަށް ބަޔާން އަތުން 8-2 ގެ ނަތީޖާއަކުން ބަލިވެފައެވެ.

އަންގާރަ ދުވަހުގެރޭ ކުޅުނު މެޗުގައި ބަޔާނުން މޮޅު ކުޅުމެއް ދެއްކި ނަމަވެސް، ބާސާއަށް މި މެޗުގައި އެންމެ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން މުޅި މެޗުގައިވެސް ބަޔާނުގެ ގޯލާ އަމާޒުކޮށް ބާސާއަށް ހަމަލާއެއް އުފެއްދިފައެއް ނުވެއެވެ. އޭގެ ބަދަލުގައި ބަޔާނުން ގިނަ ހަމަލާތަކެއް އުފެއްދިއިރު، މެޗުގެ 34 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ތޯމަސް މުލާއެވެ. މިއީ މުލާގެ ކެރިއަރުގައި ބާސާ ކޮޅަށް ޖެހި ހަތްވަނަ ލަނޑެވެ. އެއާއެކު ޗެމްޕިއަންސް ލީގުގައި ބާސާ ކޮޅަށް އެންމެ ގިނަ ލަނޑު ޖެހި ކުޅުންތެރިއަކީ މުލާއެވެ.

މުލާގެ ލަނޑުން ބަޔާނުން މި މެޗުގައި ލީޑު ނެގިއިރު، ދެވަނަ ހާފު ފަށައިގެން 11 ވަނަ މިނެޓުގައި އިތުބާރު ފޯވާޑް ރޮބަޓް ލެވަންޑޯސްކީ ވަނީ ބަޔާނަށް ލިޑު ފުޅާކޮށްދީފައެވެ. އަދި މެޗު ނިމެން ފަސް މިނެޓަށް ވެފައި ވަނިކޮށް އޭރިއާ ތެރެއިން ލިބުނު ފުރުސަތަކުން ލެވަންޑޯސްކީ ވަނީ ބަޔާނުގެ ތިންވަނަ ލަނޑު ކާމިޔާބުކޮށްދީފައެވެ.

މި މެޗުން ފަސޭހަކަމާއެކު ބަޔާން މޮޅުވިއިރު، އެ ޓީމުން މި މުބާރާތުގައި ދެން ކުޅޭ މެޗުގައި މި މަހުގެ 30 ވަނަ ދުވަހު ނުކުންނާނީ ޔޫކްރޭނުގެ ޑީނަމޯ ކިއެވްއާ ދެކޮޅަށެވެ.