ބާލީގައި އަޅާފައިވާ ކޮވިޑްގެ ފިޔަވަޅުތަކަށް ލުއިތަކެއް ދީފި

އިންޑޮނޭޝިޔާއިން ކޮވިޑް-19 ފެތުރުން ކޮންޓްރޯލްކުރުމަށް، ޓޫރިސްޓުންގެ މެދުގައި މަގުބޫލު މަންޒިލެއް ކަމުގައިވާ ބާލީގައި އަޅާފައިވާ ފިޔަވަޅުތަކަށް ލުއިތަކެއް ދީފިއެވެ.

އެހެންނަމަވެސް އެހެން ގައުމުތަކުން ބާލީއަށް އަންނަ ފަތުރުވެރިން އަދިވެސް އަމަލުކުރަންޖެހޭ ހަރުކަށި ގަވައިދުތަކެއް އެކުލަވާލާފައިވާކަމަށް އެގައުމުގެ ސީނިއަރ މިނިސްޓަރ ވަނީ ވިދާޅުވެފައެވެ. އެއީ އައު ވޭރިއަންޓްތައް ފެތުރުން ކޮންޓްރޯލްކުރުމުގެ ގޮތުުންނެވެ.

ވަރޗުއަލްކޮށް ކުރިޔަށް ގެންދިޔަ ނޫސްވެރިންގެ ބައްދަލުވުމެއްގައި އިންޑޮނޭޝިޔާގެ މެރިޓައިމް އަދި އިންވެސްޓްމަންޓް މިނިސްޓަރ ވިދާޅުވީ ބާލީއަށް ފަތުރުވެރިންނަށް އާދެވޭނީ ވެކްސިން ފުރިހަމަކޮށްފައިވާކަން، އެގައުމުގެ ސަރުކާރުން ގަބޫލުކޮށްފައިވާ ފޯނު އެޕްލިކޭޝަނަކުން ވެރިފައިޑް ކުރުމުންކަމަށެވެ.

އެހެން ގައުމުތަކުން ބާލީއަށް އަންނަ ފަތުރުވެރިންނަށް އެރަށަށް އެރޭނީ 8 ދުވަހުގެ ކަރަންޓީނަކަށްފަހުއެވެ. އަދި 3 ޕީސީއާރު ޓެސްޓް އެރަށަށް އެރުމުގެ ކުރިން ހައްދަންޖެހޭނެކަމަށް މިނިސްޓަރ ވިދާޅުވިއެވެ.

އަދި މިކަންތައްތަކާ ޚިލާފުވާ ފަތުރުވެރިންނާމެދު ހަރުކަށި ފިޔަވަޅު އެޅޭނެކަމަށް މިނިސްޓަރ ވިދާޅުވިއެވެ. ނަމަވެސް އަޅާނީ ކޮން ފިޔަވަޅުތަކެއްކަމެއް މިނިސްޓަރ ހާމައެއްނުކުރައްވައެވެ.

މި ނޫސް ކޮންފެރެންސްގައި ވާހަކަދައްކަވަމުން އިންޑޮނޭޝިޔާގެ ހެލްތު މިނިސްޓަރ ވިދާޅުވީ ބޯޑަރ ސަރަހައްދުގައި އަދިވެސް އަމަލުކުރަމުން އަންނާނީ ހަރުކަށި ގޮތަކަށްކަމަށެވެ. އެގޮތުން ގައުމަށް ވަންނަ ތަންތަނުގައި ޓެސްޓްކުރުންތައް ކުރިޔަށްދާއިރު ކަރަންޓީނުވާންޖެހޭނެކަމަށް ވަނީ ވިދާޅުވެފައެވެ.

މި އަހަރުގެ ކުރީކޮޅު ބާލީ ފަތުރުވެރިންނަށް ހުޅުވާލުމަށް މަސައްކަތްކުރިނަމަވެސް އެކަން ކާމިޔާބުނުވީ އިންޑޮނޭޝިޔާއަށް ކުރިމަތިވި ކޮވިޑްގެ ދެވަނަ ރާޅާއެކުއެވެ. ޑެލްޓާ ވޭރިއަންޓާއެކު އިންޑޮނޭޝިޔާގައި ކޮވިޑްގެ ހާލަތު ވަނީ ގޯސްވެފައެވެ.

އިންޑޮނޭޝިޔާގައި 4 މިލިއަން މީހުންނަށް ކޮވިޑް ޖެހިފައިވާއިރު ބަލީގައި މަރުވި މީހުންގެ އަދަދު 138،000ށް އަރައެވެ.

ޖުލައި މަހުގެ 15 ވަނަ ދުވަހު 56،000 ކޭސް ފެނުމަށްފަހު އެގައުމުގައި ދުވާލެއްގެ މައްޗަށް ފެންނަމުންދާ ކޮވިޑް ކޭސްތަކުގެ އަދަދު އަންނަނީ މަދުވަމުންނެވެ. ހޯމަ ދުވަހު އެގައުމުގައި ކޮވިޑް ޖެހިފައިވަނީ 3000 މީހުންނަށެވެ.