އާދިއްތަ ދުވަހު 2000ށް ވުރެ ގިނަ މީހުން ވެކްސިން ފުރިހަމަކޮށްފި
ފުރަތަމަ ޑޯޒު ޖަހާފައިވަނީ 389،235 މީހުން
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
އާދިއްތަ ދުވަހު 2000ށް ވުރެ ގިނަ މީހުން ވެކްސިން ފުރިހަމަކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ އާދިއްތަ ދުވަހު 2،490 މީހުން ވެކްސިން ފުރިހަމަ ކޮށްފައިވާ ކަމަށެވެ. އެއީ މާލެ ސަރަހައްދުން 1،376 މީހުންނާއި އަތޮޅުތެރޭގެ ރަށްތަކުން 1،114 މީހުންނެވެ. އެއާއެކު ޖުމްލަ 321،570 މީހުން ވެކްސިން ފުރިހަމަ ކޮށްފައިވާ ކަމަށް އެޗްޕޭއިން ބުނެއެވެ.
އެޗްޕީއޭއިން ބުނީ ފުރަތަމަ ޑޯޒު ޖަހާފައިވަނީ 459 މީހުން ކަމަށެވެ. އެއީ މާލެ ސަރައްހަދުން 146 މީހުންނާއި، އަތޮޅުތެރޭގެ ރަށްތަކުން 313 މީހުންނެވެ. އެއާއެކު ފުރަތަމަ ޑޯޒު ޖެހި މީހުންގެ އަދަދު 389،235 ށް އަރާފައިވާ ކަމަށް އެޗްޕީއޭއިން ބުނެއެވެ.
ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ. އެއީ ބަލިން ދިފާއުވުމަށް ވެކްސިން ވަރަށް މުހިންމު ކަމަށާއި، ބައްޔަށް ޕޮޒިޓިވްވި ނަމަވެސް ވެކްސިން ފުރިހަމަކޮށްފައިވާނަމަ ބަލިން މީހާއަށް ކުރާ އަސަރު ކުޑަ ކަމަށް ޑޮކްޓަރުން ވިދާޅުވެއެވެ.
މީގެ އިތުރުން ރާއްޖޭގައި ކޮވިޑް-19ގައި ނިޔާވާ ގިނަ މީހުންނަކީ ވެސް ވެކްސިންގެ ޑޯޒު ފުރިހަމަ ނުކުރާ މީހުން އެޗްޕީއޭއިން ބުނެފައިވެއެވެ. އެޗްޕީއޭއިން ބުނީ މެއި މަހުގެ އެއްވަނަ ދުވަހުގެ ނިޔަލަށް މިބަލީގައި ނިޔާވި މީހުންގެ ތެރެއިން 89 އިންސައްތަ މީހުންނަކީ ވެކްސިންގެ ޑޯޒު ފުރިހަމަ ނުކުރާ މީހުން ކަމަށެވެ. އެޗްޕީއޭއިން ބުނީ 3 ޖޫން އިން 23 އޮގަސްޓަށް އެޑްމިޓްކޮށްގެން ފަރުވާ ދޭން ޖެހުނު މީހުންގެ ތެރެއިން ހާލު ސީރިއަސްވެ، ހުޅުމާލެ މެޑިކަލް ފެސިލީޓީގެ އައިސީޔޫގައި ފަރުވާ ދޭން ޖެހުނު 82 އިންސައްތަ މީހުންނަކީ ވެސް ވެކްސިންގެ ޑޯޒު ފުރިހަމަ ނުކުރާ މީހުން ކަމަށެވެ.
ކޮވިޑް-19 ކޮންޓްރޯލް ކުރުމަށް އާބާދީގެ ބޮޑު އިންސައްތަ ވެކްސިން ފުރިހަމަ ކުރަން ޖެހެއެވެ. އެގޮތުން އާބާދީގެ ގިނަ ބަޔަކު ވެކްސިންޖަހައި ނިންމުމަށް ބާރު އެޅުމުގެ ގޮތުން ސަރުކާރުން މިހާރު ވެކްސިނޭޝަން ޕްރޮގްރާމެއް ކުރިއަށްގެންދެއެވެ.
