ޓްރަމްޕް ވިދާޅުވީ، މާބަނޑު އިރު ޕެރަސެޓަމޯލް ބޭނުން ކުރުމުންނާއި ކުޑަކުދިންނަށް ވެކްސިން ދިނުމުން އޯޓިޒަމްގެ ނުރައްކާ އޮންނަ ކަމަށް، ޑަބްލިޔުއެޗްއޯ އިން ބުނަނީ އެފަދަ ހެތްކެއް ނެތް ކަމަށް!
ޓްރަމްޕްގެ ވާހަކަފުޅުތަކާ ގުޅޭގޮތުން އިތުރަށް ތަފްސީލު ދިނުމަށް އެދުމުން، ޑަބްލިޔުއެޗްއޯ ގެ ތަރުޖަމާނު ވިދާޅުވީ، ވެކްސިން ދީގެން އޯޓިޒަމް ނުޖެހޭ ކަމަށާއި އަދި ވެކްސިން އަކީ ފުރާނަ ސަލާމަތްކުރާ އެއްޗެއްކަން ކަށަވަރުކޮށްދީފައި ކަމަށެވެ. "މިއީ ސައިންސް އިން ސާބިތުކޮށްދީފައިވާ ކަމެކެވެ. އަދި މިފަދަ ކަންކަމާމެދު ސުވާލު އުފައްދާކަށް ނުޖެހޭނެއެވެ،"
މިހާރުގެ ސިއްހީ އިރުޝާދަކީ މާބަނޑު މީހުންނާއި ގާތުން ކިރުދޭ އަންހެނުންނަށް ޕެރަސިޓަމޯލް ރައްކާތެރިކަމާއެކު ބޭނުންކުރެވިދާނެ ކަމަށް
މާބަނޑު އިރު ޕެރަސެޓަމޯލް ބޭނުންކުރުމާއި އޯޓިޒަމްއާ ދެމެދު ގުޅުމެއް ހުރިކަން ކަށަވަރުކޮށްދޭ އެއްވެސް ސައިންޓިފިކް ހެކިތަކެއް މިވަގުތު ނެތް ކަމަށް ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން ބުނެފިއެވެ.
ދުނިޔޭގެ ސިއްހަތު ޖަމްއިއްޔާ އިން މިހެން ބުނެފައިވާއިރު މާބަނޑު މީހުން ޕެރަސެޓަމޯލް ބޭނުން ކުރުމާ އޯޓިޒަމް ބައްޔާ ގުޅުން ހުރި ކަމަށް ދޭހަވާ ގޮތައް އެމެރިކާގެ ރައީސް ޑޮނަލްޑް ޓްރަމްޕް ވަނީ ހޯމަ ދުވަހު ވާހަކަފުޅު ދައްކަވާފައެވެ.
އޭގެ އިތުރުން ޓްރަމްޕް ވިދާޅުވީ ކުޑަކުދިންނަށް ދޭ ވެކްސިން ގެ ސަބަބުން އޯޓިޒަމް ޖެހުމުގެ ފުރުސަތު އޮތް ކަމުގައެވެ.
ޔޫރަޕިއަން މެޑިސިންސް އޭޖެންސީ (އީއެމްއޭ) އިން އަންގާރަ ދުވަހު ބުނެފައިވަނީ، އެމެރިކާގައި ޓައިލެނޯލްގެ ނަމުގައި މަޝްހޫރު ޕެރަސެޓަމޯލް މާބަނޑު ދުވަސްވަރު ބޭނުންކުރުމާ ގުޅޭގޮތުން މިހާރު އެ ސަރަޙައްދުގައި ދެވިފައިވާ ލަފާތަކަށް ބަދަލެއް ގެންނަންޖެހޭ ފަދަ އައު ހެއްކެއް ނެތް ކަމަށެވެ.
"މާބަނޑު ދުވަސްވަރު ޕެރަސެޓަމޯލް ބޭނުންކުރުމާއި އޯޓިޒަމްއާ ދެމެދު ގުޅުމެއް ވާކަމަށް ލިބިފައިވާ ހެކިތަކުން ދައްކާފައެއް ނުވެއެވެ،" އީއެމްއޭ އިން ނެރުނު ބަޔާނެއްގައި ބުނެފައިވެއެވެ. އަދި އިތުރަށް ބުނެފައި ވަނީ ބޭނުންވެއްޖެ ހިނދެއްގައި މާބަނޑު ދުވަސްވަރު ޕެރަސެޓަމޯލް ބޭނުންކުރެވިދާނެ ކަމަށެވެ. ނަމަވެސް ބޭސް ބޭނުން ކުރުމުގައި އެންމެ ދަށް އަދި އެކަށީގެންވާ މިންވަރަކަށް ބޭނުން ކުރުމަށާއި ތަކުރާރުކޮށް ބޭނުންކުރުމަށް އިރުޝާދު ދީފައިވެއެވެ.
ހޯމަ ދުވަހު އިނގިރޭސިވިލާތުގެ ސިއްޙަތާ ބެހޭ އޮފިޝަލުން ބުނެފައިވަނީ މިއީ ރައްކާތެރިކަމާއެކު ބެކު ބޭނުންކުރެވިދާނެ ބޭހެއް ކަމަށެވެ.
މާބަނޑު ދުވަސްވަރު ޕެރަސެޓަމޯލް ބޭނުންކުރުމާއި އޯޓިޒަމްއާ ދެމެދު އޮތް ގުޅުމާ ބެހޭގޮތުން ކުރެވުނު ސުވާލަކަށް ޖަވާބު ދެއްވަމުން ޖެނީވާގައި ބޭއްވުނު ނޫސްވެރިންގެ ބައްދަލުވުމެއްގައި ޑަބްލިޔުއެޗްއޯގެ ތަރުޖަމާނު ޠާރިޤް ޖަޝާރެވިޗް، ވަކި ދިރާސާ އަކަށް ހަވާލާ ނުދެއްވާ ވިދާޅުވީ، އަދި މިހާތަނަށް ސާބިތު ނުކުރެވޭ ބައެއް ހޯދުންތަކުން އެފަދަ ނަތީޖާ އެއް ފެނިދާނެ ކަމަށް ބުނި ނަމަވެސް ފަހުން ކުރެވުނު ދިރާސާތަކުން މިކަން ކަށަވަރުކޮށްދީފައި ނުވާ ކަމުގައެވެ.
ހޯމަ ދުވަހު ވައިޓް ހައުސްގައި ބޭއްވުނު ނޫސްވެރިންގެ ބައްދަލުވުމެއްގައި ޓްރަމްޕް ވަނީ މާބަނޑު އަންހެނުންނަށާއި ތުއްތު ކުދިންގެ މައިންބަަފައިންނަށް ސިއްހީ އިރުޝާދު ދެއްވާފައެވެ. އޭނާ ތަކުރާރުކޮށް ވިދާޅުވީ ތަދު ކެނޑުވުމަށް ބޭނުން ކުރާ މި ބޭސް ބޭނުން ނުކުރުމަށާއި ދަރިފުޅަށް ނުދިނުމަށް ބާރު އަޅުއްވާ ކަމުގައެވެ. އަދި އޭނާ ވަނީ އާންމު ވެކްސިންތައް އެއްފަހަރާ ކުޑަކުދިންނަށް ނުދިނުމަށާއި ކުއްޖާގެ އުމުރުން ވަރަށް ހަގު އިރު ނުދިނުމަށް ލަފާ ދެއްވާފައެވެ.
ޓްރަމްޕްގެ މި ލަފާ ސިއްހީ ތަޖުރިބާރާކުން ދީ ފައިވާ ލަފަޔާ ދިމާ އިދިކޮޅުކަން ފާހަގަ ކުރެވެއެވެ. ގިނަ ދިރާސާތަކުގެ މަޢުލޫމާތުތަކަށް ހަވާލާދީ، އެ ފަރާތްތަކުން ބުނެފައިވަނީ ޓައިލެނޯލްގައި ހިމެނޭ މައިގަނޑު މާއްދާއެއް ކަމުގައިވާ އެސެޓަމިނޯފެން އަކީ މާބަނޑު އަންހެނުންގެ ދުޅަހެޔޮކަމަށް ރައްކާތެރި ދައުރެއް އަދާކުރާ މާއްދާއެއް ކަމަށެވެ.
ޓްރަމްޕްގެ ވާހަކަފުޅުތަކާ ގުޅޭގޮތުން އިތުރަށް ތަފްސީލު ދިނުމަށް އެދުމުން، ޑަބްލިޔުއެޗްއޯ ގެ ތަރުޖަމާނު އިތުރަށް ވިދާޅުވީ، ވެކްސިން ދީގެން އޯޓިޒަމް ނުޖެހޭ ކަމަށާއި އަދި ވެކްސިން އަކީ ފުރާނަ ސަލާމަތްކުރާ އެއްޗެއްކަން ކަށަވަރުކޮށްދީފައި ކަމަށެވެ. "މިއީ ސައިންސް އިން ސާބިތުކޮށްދީފައިވާ ކަމެކެވެ. އަދި މިފަދަ ކަންކަމާމެދު ސުވާލު އުފައްދާކަށް ނުޖެހޭނެއެވެ،" އޭނާ އިތުރަށް ވިދާޅުވިއެވެ.
