މާލެ ސަރަހައްދު ވައި ނުސާފުވެ އޮރެންޖު އެލަރޓް ނެރެފި
މާލޭގައި ޔޫއެސް އައިކިއުއައި 117 ގައި ހުރިއިރު ވިލިމާލޭގައި 155 ގައި ހުރެ ނުރައްކާތެރި ވަރަށް އަރާފައިވޭ. ނާޒުކު ހާލަތުގައިވާ މީހުންނަށް ބޭރަށް ނިކުންނަން ޖެހޭނަމަ މާސްކު އެޅުމަށާއި ދޮރުތައް ލައްޕާފައި ބެހެއްޓުމަށް އެޗްޕީއޭއިން އިލްތިމާސްކޮށްފައިވޭ.
މޫސުން - މާލެއަށް ބޯކޮށް ވާރޭވެހުން
މާލެ ސަރަހައްދަށް ހޭޒް ނުވަތަ ދުންފުނީގެ އަސަރުކޮށް، ވައި ނުސާފުވުން ބޮޑުވެފައިވާތީވެ އޮރެންޖް އިންޒާރު ނެރެ، ސަމާލުވުމަށް އެޗްޕީއޭއިން އިލްތިމާސްކޮށްފި އެވެ.
ވައިގެ ސާފުކަން ދައްކައިދޭ އައިކިއު އެއާއިން ދައްކާ ގޮތުގައި، މާލޭގައި ޔޫއެސް އައިކިއުއައި ހުރީ 117 ގަ އެވެ. އެއީ، ނުރައްކަލުގެ އޮރެންޖު ސަމާލު ލެވެލް ކަމަށްވާއިރު، ފައިން ޕާޓިކިއުލޭޓް މެޓާ ނުވަތަ ޕީއެމް2.5 މާލޭގައި ހުރީ، ކޮންމެ ކިއުބިކް މީޓާއަކަށް 42 މައިކްރޯގްރާމްގަ އެވެ. އަދި ވިލިމާލޭގައި ޔޫއެސް އައިކިއުއައި ހުރީ 155ގައި ނުރައްކަލުގެ ރަތް ސަމާލު ލެވެލްގަ އެވެ.
ނުރައްކާތެރި ވަރަކަށް ވައި ނުސާފުވުމުން ނާޒުކު ހާލަތުގައިވާ މީހުންނާއި އެހެން މީހުންނަށް ވެސް ނޭވާލާ ނިޒާމުގެ މައްސަލަ ޖެހުމުގެ ފުރުސަތު ބޮޑު ކަމަށް އެޗްޕީއޭއިން ބުނެ އެވެ.
އެހެން ކަމުން ރައްކާތެރި ކަމުގެ ފިޔަވަޅުތައް އަޅަން އެ އެޖެންސީ ވަނީ އިލްތިމާސްކޮށްފަ އެވެ. މިގޮތުން، ނާޒުކު ހާލަތްތަކުގައިވާ މީހުން ބޭރަށް ނިކުންނަން ޖެހޭ ހާލަތްތަކުގައި މާސްކު އެޅުމަށާއި ވައި ނުވަންނަހެން ދޮރުތައް ލައްޕާފައި ބެހެއްޓުމަށާއި އެއާ ޕިއުރިފަޔާ ބޭނުންކުރުމަށް އެޗްޕީއޭއިން ވަނީ އެދިފަ އެވެ.
މީގެ އިތުރުން މެޓް އޮފީހުން ބުނީ، ދުންފިނީގެ ސަބަބުން އުތުރާއި މެދުރާއްޖެ ތެރޭގައި ވައި ނުސާފުވެ ހަމަ ލޮލަލަށް ސާފުކޮށް ފެންނަ ދުރުމިން ދަށްވެފައިވާ ކަމަށެވެ. އަދި ކުރިއަށް އޮތް ހަފްތާގައި ވެސް ދުންފުނީގެ އަސަރު މި ސަރަހައްދުތަކަށް ކުރާނެ ކަމަށް ބެލެވޭ ކަމަށް އެ އިދާރާއިން ބުނެފައިވެ އެވެ.
މާލެ ސަރަހައްދަށް ވައި ނުސާފުވުމުން އޮރެންޖު އެލާޓު ނެރުނުއިރު، ކުރިއަށް އޮތް ހަފްތާ ގައި ވެސް މާލެ ހިމެނޭހެން ރާއްޖޭގެ ބޮޑު ބަޔަކަށް ވައި ނުސާފުވާނެ ކަމަށް ބެލެވޭ ކަމަށް މޫސުމާ ބަހެެ ގައުމީ އިދާރާއިން ވަނީ ބުނެފަ އެވެ.
