'ދުނިޔޭގެ ފުރަތަމަ' ގޮނޯރިއާ ވެކްސިން އިނގިރޭސިވިލާތުގައި ދޭން ފަށައިފި

ރެކޯޑް މިންވަރަކަށް ބަލީގެ މީހުންގެ އަދަދު މައްޗަށް ގޮސްފައި ވަނިކޮށް 'ދުނިޔޭގެ ފުރަތަމަ' ގޮނޯރިއާ ވެކްސިން އިނގިރޭސިވިލާތުގައި ދޭން ފަށައިފިއެވެ.

މިއަހަރުގެ ކުރީކޮޅު، އިނގިރޭސިވިލާތުގެ އެންއެޗްއެސް އިން އިޢުލާނު ކޮށްފައި ވަނީ، ގޮނޯރިއާ ބަލީގެ ކޭސްތައް ރެކޯޑު އަދަދަކަށް އަރާފައިވުމާއި، އެންޓިބަޔޮޓިކް އަށް ނުގުޑާ ބާވަތްތައް އިތުރުވަމުން ދިއުމާއެކު، ޝަރުތު ހަމަވާ ބަލިމީހުންނަށް އޯގަސްޓު މަހުގެ ކުރީކޮޅުން ފެށިގެން މި ވެކްސިން ދޭން ފަށާނެ ކަމަށެވެ.

މިހާރު، ޑިޕާޓްމަންޓް އޮފް ހެލްތު އެންޑް ސޯޝަލް ކެއަރ (ޑީއެޗްއެސްސީ) އިން ބުނެފައި ވަނީ ހޮނިހިރު ދުވަހުން ފެށިގެން ޖިންސީ ގުޅުމުން ފެތުރޭ މި ބައްޔަށް ހިލޭ ވެކްސިން ދިނުމުގެ ފުރުޞަތު ޖިންސީ ޞިއްޙަތާބެހޭ ކްލިނިކްތަކުން ލިބެން ފަށާނެ ކަމަށެވެ.

އާންމު ޞިއްޙަތާއި ރައްކާތެރިކަމާބެހޭ ވަޒީރު އޭޝްލީ ޑޯލްޓަން ބަޔާނެއްގައި ވިދާޅުވެފައި ވަނީ މި ވެކްސިން ދޭން ފެށުމަކީ "ރެކޯޑު އަދަދަކަށް ފެތުރިފައިވާ ބައްޔެއް ކޮންޓްރޯލު ކުރުމަށް ކުރެވޭ މަސައްކަތައް ލިބޭ ވަރަށް މުހިންމު ކުރިއެރުމެއް" ކަމަށެވެ.

އޭނާ އިތުރަށް ވިދާޅުވެފައި ވަނީ އިނގިރޭސި ސަރުކާރުން ހިންގާ ދުނިޔޭގެ ފުރަތަމަ ވެކްސިން ޕްރޮގްރާމުން ބަލި ޖެހޭ މީހުންގެ އަދަދު މަދުކުރުމަށް އެހީތެރިވެދޭނެއެވެ. އަދި އެންޓިބަޔޮޓިކް އަށް ނުގުޑާ ބާވަތްތަކުގެ ބަލި ހައްލުކުރުމަށްވެސް މަގުފަހިވާނެއެވެ."

އިނގިރޭސިވިލާތުގައި 2023 ވަނަ އަހަރު ގޮނޯރިއާ ބަލި ޖެހުނު މީހުންގެ އަދަދު 85,000 އަށް އަރާފައިވެއެވެ. މިއީ 1918 ވަނަ އަހަރުން ފެށިގެން ރެކޯޑު ބަލަހައްޓަން ފެށި ފަހުން ރެކޯޑް ކުރެވިފައިވާ އެންމެ މަތީ އަދަދެވެ. އަދި 2012 ވަނަ އަހަރާ އަޅާބަލާއިރު 3 ގުނަ އިތުރު އަދަދެކެވެ.