ފާނަބަސަންދު ފެތުރެމުންދާތީ ސަމާލުވުމަށް އިލްތިމާސްކޮށްފި

ރާއްޖޭގައި ފާނަބަސަންދު ފެތުރެމުންދާތީ ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

ހުކުރު ދުވަހު އެޗްޕީއޭއިން ބުނީ 2024 ވަނަ އަހަރުގެ ނޮވެމްބަރު މަހު ކ.ގުޅިން ފާނަބަސަންދުގެ 11 ކޭސް ރިޕޯޓް ކޮށްފައިވާ ކަމަށެވެ. މީގެ ތެރެއިން ދެ މީހަކަށް އައިޖީއެމްއެޗުގައި އެޑްމިޓްކުރެވި އިތުރު ފަރުވާދެމުންދާ ކަމަށް އެޗްޕީއޭއިން ބުނެއެވެ.

ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކުވެސް ރިޕޯޓްކުރާކަން ފާހަގަކޮށް އެޗްޕީއޭއިން ބުނީ 2024 ވަނަ އަހަރުގެ ނޮވެންބަރާއި ހަމައަށް މުޅި ރާއްޖެއިން 2977 ކޭސް ރިޕޯޓް ކޮށްފައިވާ ކަމަށެވެ.

އެގޮތުން މިހާތަނަށް މާލެ ސަރަހައްދުން 1506 ކޭސް، އަތޮޅު ތަކުން 1471 ކޭސް ރިޕޯޓުކޮށްފައިވާ ކަމަށް އެޗްޕީއޭއިން ބުނެއެވެ.

ފާނަބަސަންދުއަކީ ވައިރަހަކުން ޖެހޭ ބައްޔެކެވެ. މި ބައްޔަކީ އާއްމުކޮށް ކުޑަކުދިންނަށް ޖެހޭ ބައްޔެއް ނަމަވެސް ބޮޑެތި މީހުންނަށް ވެސް މި ބަލި ޖެހެއެވެ.

ބަލީގެ އަލާމަތްތަކުގެ ތެރޭގައި، ހުންއައުން، ވަރުދެރަވުން، ނޭފަތުން ފެންއައުން އަދި ހަމުގައި ބިހިތަކެއް ނެގުން ހިމެނެއެވެ. މި ބިހިތައް ފެންފޮޅުތަކަކަށް ބަދަލުވެއެވެ. (މި ބިހިތަކަކީ ހިރުވާ އަދި ފަސޭހައިން ފަޅައިގެންދާ ބިހިތަކެއް. އަދި ދެތިން ދުވަސްތެރޭގައި ހަށިގަނޑުގެ އެކިތަންތާ ފެންބިހި ނަގާ)

މި ބަލި ފެތުރޭ ގޮތަށް ބަލާއިރު، ބަލި ޖެހިފައި ހުރި މީހަކު ކެއްސާ ކިނބިހި އަޅާހަދާއިރު، ނޭވާލާ ނިޒާމުގެ ޒަރީޔާއިން ބަލި ފެތުރޭއެވެ. ބިހިނަގާފައި ހުރި މީހެއްގެ ގައިގައި ބީހުމުން ނުވަތަ އޭނާ ބޭނުންކޮށްފައިވާ ތުވާލި، އަންނައުނު ފަދަ ތަކެތި ބޭނުންކުރުމުން އަދި ގައިގައި ހުރި ބިހިތައް އެއްކޮށް ކުރިމަގާލި ލަންދެން މި ބަލި އެކަކު ގައިން އަނެކެއްގެ ގަޔަށް ފެތުރުމުގެ ފުރުސަތު އޮންނާނެ ކަމަށް އެޗްޕީއޭއިން ބުނެއެވެ.

އެޗްޕީއޭއިން ބުނީ ކުރިން ފާނަބަސަންދަ ނުޖެހޭ ކޮންމެ މީހަކީ މި ބަލިޖެހިދާނެ މީހެއް ކަމަށެވެ. ނަމަވެސް އެއްފަހަރު މިބަލި ޖެހިއްޖެނަމަ ދެވަނަ ފަހަރަށް މި ބަލި ޖެހުމުގެ ފުރުސަތު ވަރަށް ކުޑަ ކަމަށް އެޗްޕީއޭއިން ބުނެއެވެ.