އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ލާޒިއޯ އަތުން މިލާން މޮޅުވިއިރު، އެ ދުވަހުގެ މެންދުރުފަހު ކުޅުނު މެޗުން ސަމްޑޯރިއާ އާއި އެންމެ ފަހުގެ ޗެމްޕިއަން އިންޓަ މިލާން އެއްވަރުވެއްޖެއެވެ.

އަމިއްލަ ދަނޑުގައި ކުޅުނު މެޗުން މިލާން މޮޅުވީ ލާޒިއޯ އަތުން 2-0 ގެ ނަތީޖާއަކުންނެވެ.

މި މެޗުގައި މިލާނުން ގިނަ ހަމަލާތަކެއް އުފެއްދިއިރު، މެޗުގެ ފުރަތަމަ ހާފު ނިމުމުގެ ކުރިން އެ ޓީމުން ވަނީ ލީޑު ނަގާފައެވެ. މި ހާފުގެ ފަހު މިނެޓުގައި އަންޓެ ރެބިޗް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ރަފައެލް ލެއާއޯއެވެ. އަދި ލީޑު ފުޅާކުރަން ފުރަތަމަ ހާފުގެ އިތުރު ވަގުތުގައި މިލާނަށް ޕެނަލްޓީއެއް ލިބުނު ނަމަވެސް، އެ ޓީމުފެ ފްރޭންކް ކެސިއޭ ފޮނުވާލި ޕެނަލްޓީ އަމާޒުވީ ގޯލުގެ ހުރަސް ދަނޑިއަށެވެ.

އެކަމަކު މި މެޗުގެ ދެވަނަ ހާފުގައި މިލާނުން ވަނީ ލީޑު ފުޅާކޮށްފައެވެ. މެޗުގެ 67 ވަނަ މިނެޓުގައި ރެބިޗް ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ އަނިޔާއިން ރަނގަޅުގެ ކުޅުމުގެ ތެރެއަށް އައި އުމުރުން 39 އަހަރުގެ ފޯވާޑް ޒްލަޓާން އިބްރަހިމޮވިޗެވެ. މި ލަނޑާއެކު އިބްރަހިމޮވިޗް ވެފައިވަނީ އިޓާލިއަން ލީގުގައި ލަނޑު ޖެހި، އިޓަލީ ނޫން އެހެން ގައުމެއްގެ އެންމެ އުމުރުން ދޮށި ކުޅުންތެރިޔާއަށެވެ.

މި މެޗު ނިމުމުގެ ކުރިން ރެފުރީ ވަނީ ލާޒިއޯގެ ކޯޗު މައުރީޒިއޯ ސާރީއަށް ސީދާ ރަތް ކާޑެއް ދައްކާފައެވެ. މެޗުގެ އިތުރު ވަގުތުގައި އޭނާއަށް ރަތް ކާޑެއް ދައްކާފައުވަނީ ރެފުރީއާ ބޭއަދަބީ އިބާރާތުން ވާހަކަ ދެއްކުމުންނެވެ.

މީގެ އިތުރުން ލީގުގައި އާދީއްތަ ދުވަހު ކުޅުނު މެޗުން ޗެމްޕިއަން އިންޓަ އެއްވަރުވީ ސަމްޑޯރިއާއާ ބައްދަލުކޮށް 2-2 ގެ ނަތީޖާއަކުންނެވެ.

ސަމްޑޯރިއާގެ ދަނޑުގައި ކުޅުނު މި މެޗުގެ 18 ވަނަ މިނެޓުގައި އިންޓައިން ވަނީ ލީޑު ނަގާފައެވެ. ލިބުނު ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ފެޑެރީކޯ ޑިމާކޯއެވެ. އެކަމަކު މެޗުގެ 32 ވަނަ މިނެޓުގައި މާޔާ ޔޮޝީޑާ ވަނީ ލަނޑެއް ޖަހައި، ސަޕްޑޯރިއާއަށް ނަތީޖާ އެއްވަރުކޮށްދީފައެވެ.

މި މެޗުގައި އިންޓައިން ދެވަނަ ފަހަރަށް ލީޑު ނަގާފައިވަނީ ފުރަތަމަ ހާފު ނިމެން މިނެޓަކަށް ވެފައި ވަނިކޮށެވެ. ނިކޯލޯ ބަރެއްލާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ލަޓާރޯ މާޓިނޭޒެވެ. އެކަމަކު ދެވަނަ ހާފުގައި ޓޮމާސޯ އާޗެލޯ ވަނީ ލަނޑެއް ޖަހައި، ސަޕްޑޯރިއާއަށް ދެވަނަ ފަހަރަށް ނަތީޖާ އެއްވަރުކޮށްދީފައެވެ.

މި ނަތީޖާތަކާއެކު އިންޓަ އޮތީ ތާވަލުގެ ހަތަރުވަނައިގައި ކުޅުނު ތިން މެޗުން ލިބުނު ހަތް ޕޮއިންޓާއެކުއެވެ. ތާވަލުގެ އެއްވަނައިގައި އޮތް ރޯމާ އާއި ދެވަނައިގައި އޮތް މިލާން އަދި ތިންވަނައިގައި އޮތް ނާޕޮލީއަށް ތިން މެޗުން ވަނީ ނުވަ ޕޮއިންޓް ލިބިފައެވެ.