ރައީސް ޔާމީން އަމަލީގޮތުން މުޒާހަރާގައި ބައިވެރިވެވަޑައިގެންފި
10 ސެޕްޓެމްބަރު 2021 | ހުކުރު 13:56ކުޑަދޮރު ކައިރީގައި ހުންނަވައި މުޒާހަރާގެ ބައިވެރިންނަށް އަތުން އިޝާރާތް ކުރައްވައި ހިތްވަރުދެއްވި
ރައީސް ޔާމީން ޕީޕީއެމްގެ ދިދަ ހިފައިގެން ސަޕޯޓަރުންނަށް ހިތްވަރު ދެއްވަނީ
ޖަލު ހުކުމެއްގައި ހުންނެވި ކުރީގެ ރައީސް އަބްދުﷲ ޔާމީން ޕީޕީއެމުން ހުކުރު ދުވަހު މާލޭގައި ބޭއްވި މުޒާހަރާގައި އަމަލީގޮތުން ބައިވެރިވެވަޑައިގެން މުޒާހަރާގެ ބައިވެރިންނަށް ހިތްވަރު ދެއްވައިފިއެވެ.
''އިންސާފު ކޮބާ" މިނަމުގައި ކުރިއަށް ގެންދިޔަ މުޒާހަރާގައި އިދިކޮޅު ކޯލިޝަނުގެ ލީޑަރޝިޕްގެ ގިނަ ބޭފުޅުން ބައިވެރިވެވަޑައިގެންފައިވެއެވެ. މާފުށީ ޖަލުގައި ކޮވިޑް ފެތުރޭތީ އާއި ގައިދީންގެ ބަލި ހާލަތު ހުރިގޮތުން ކޮވިޑުގެ ސަބަބުން ނުރައްކާތެރި ގޮތެއް މެދުވެރިވެދާނެ މީހުންނަށް ބަލައިގެން ކަރެކްޝަން ސާރވިސްގެ ފަރާތުން ވަނީ ވަގުތީގޮތުން ރައީސް ޔާމީން ގޭ ބަންދަށް ބަދަލުކޮށްފައެވެ. މިއަދުގެ މުޒާހަރާގައި ރައީސް ޔާމީން ބައިވެރިވެވަޑައިގެންނެވީ ގޭގައި ހުންނަވައިގެންނެވެ.
މުޒާހަރާގެ ބައިވެރިން ރައީސް ޔާމީނުގެ ގޭގެ ކުރިމައްޗަށް އެއްވުމުން އެމީހުންނަށް ފެންނަ ގޮތަށް ކުޑަދޮރެއްގެ ކައިރީގައި ހުންނަވައި އިޝާރާތުން ހިތްވަރުދެއްވައި ސިޔާސީ މެސެޖުތައްވެސް ދެއްވިއެވެ. ޕީޕީއެމްގެ ދިދައެއްވެސް ހޫރުވިއެވެ.
ރައީސް ޔާމީނު މިބީދައިން މުޒާހަރާގައި ބައިވެރިވެ ވަޑައިގެންނެވިއިރު އިދިކޮޅު ކޯލިޝަނުގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ ދިވެހިރާއްޖޭގެ އެއްވެސް ރައްޔިތަކަށް އަދުލު އިންސާފުގެ ޔަގީންކަމެއް ނެތް ކަމަށެވެ.
ސަރުކާރުން ބޭނުންހާ ގޮތަކަށް ހުކުމްތައް ކުރަމުންދާ ކަމަށް ތުހުމަތުކޮށް އަދުރޭ ވިދާޅުވީ އިންސާފު ހޯދުމަށް ހުރިހާ ރައްޔިތުން އަޑު އުފުލަން ޖެހޭ ކަމަށެވެ. އަދި ވިދާޅުވީ މުޅި ރާއްޖޭގައި ކުރިއަށް ގެންދިޔަ މިހަރަކާތަކީ ސުލްހަވެރި ހަރަކާތެއް ކަމަށާއި ކުރިއަށް އޮތްތަނުގައި މިހަރަކާތްތައް ވަރުގަދަ ކުރާނެ ކަމަށެވެ.
ޕީޕީއެމް އޮފީސް ކައިރީން މުޒާހަރާ ފަށައިގެން ކުރިއަށް ދަނިކޮށް ބޮޑުތަކުރުފާނު މަގުގެ ޕެޓްރޯލް ޝެޑް ކައިރިން ފުލުހުން ހުއްޓުވިއެވެ. އަދި ފަހުން އަޑު އުފުލާފައިވަނީ ޕީޕީއެމް އޮފީސް ސަރަހައްދުގައެވެ. މުޒާހަރާ ކުރިއަށް ގެންގޮސްފައިވަނީ ހުކުރު ދުވަހުގެ ހަވީރު 4:00ން އިރުއޮއްސި 6:00 ށެވެ. މުޒަހަރާ ކުރިއަށް ދިޔަ ވަގުތު އެސަރަހައްދުގައި އެސްއޯ ފުލުހުންނާއި ޓްރެފިކް ފުލުހުން ހަރަކާތްތެރިވެފައިވެއެވެ.
