ސާފުން ވަކިނުވެ އިންޑިއާ ސެންޓްރަލް އޭޝިއާއަށް

ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ވަކިނުވެ، އަންނަ އަހަރުން ފެށިގެން ސެންޓްރަލް އޭޝިއާ ފުޓްބޯލް އެސޯސިއޭޝަން (ސީއޭއެފްއޭ) އާ ގުޅެން އިންޑިއާއިން ނިންމައިފިއެވެ.

ސެންޓްރަލް އޭޝިއާގައި މި ވަގުތުު އޮތީ ހަ ގައުމެކެވެ. އެއީ މީގެ ކުރިން ސާފުގައި ވާދަކުރި އަފްޣާނިސްތާންގެ އިތުރުން އީރާނާއި، ކިރްގިސްތާނާއި، ތުރުކުމެނިސްތާނާއި، އުޒްބެކިސްތާން އަދި ތަޖިކިސްތާނެވެ. އެކަމަކު ހުކުރު ދުވަހު އިންޑިއާއިން ވަނީ އެ އެސޯސިއޭޝަނުގައި އެ ގައުމު ރަސްމީކޮށް ބައިވެރިކުރިކަން ނިންމާފައިވާކަން އިއުލާންކޮށްފައެވެ.

އޭޝިއަން ފުޓްބޯޅަ ކޮންފެޑްރޭޝަން (އޭއެފްސީ) ގެ ގެ ދަށުން ސެންޓްރަލް އޭޝިއާ އުފައްދާފައިވަނީ 2014 ވަނަ އަހަރެވެ. މީގެ ކުރިން ސާފުގެ މެންބަރު ގައުމެއްގެ ގޮތުގައި އޮތް އަފްޣާނިސްތާނަކީ މިހާރު ސެންޓްރަލް އޭޝިއާގެ ދާއިމީ މެންބަރެކެވެ. އިންޑިއާއިން ހާމަކޮށްފައިވާ ގޮތުން ސެންޓްރަލް އޭޝިއާގެ މުބާރާތްތަކުގައި އެ ގައުމު ވާދަކުރި ނަމަވެސް، އެ ގައުމު އަދިވެސް އޮންނާނީ ސާފުގެ މެންބަރު ގައުމެއްގެ ގޮތުގައެވެ.

އަންނަ އަހަރުން ފެށިގެން ސެންޓްރަލް އޭޝިއާގތައި އިންޑިއާ ވާދަކުރާއިރު، އެ އަހަރުގެ އޮކްޓޯބަރު މަހާއި ނޮވެމްބަރު މަހު އެ އެސޯސިއޭޝަނުން ބާއްވާ ފިރިހެނުންގެ 18 އާއި 15 އަހަރުން ދަށުގެ މުބާރާތްތަކުން އިންޑިއާ ފެނުމުގެ ފުރުސަތު އެބައޮތް ކަމަށް ރިޕޯޓުތައް ބުނެއެވެ.

ސެންޓްރަލް އޭޝިއާގައި އިންޑިއާ ވާދަކުރާއިރު، ސާފް ސަރަހައްދުގައި މި ވަގުތު ހަތް ގައުމެއް ހިމެނެއެވެ. އެއީ އިންޑިއާގެ އިތުރުން ރާއްޖެ އާއި، ނޭޕާލާއި، ބަންގްލަދޭޝް އާއި، ސްރީ ލަންކާ އާއި، ބޫޓާން އަދި ޕާކިސްތާނެވެ. އެކަމަކު ޕާކިސްތާން މި ވަގުތު އޮތީ ފީފާގެ ސަސްޕެންޝަނެއްގައެވެ.

އެހެންކަމުން މި އަހަރުގެ އޮކްޓޯބަރު ބާއްވާ ސާފް ސަރަހައްދުގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ސާފް ޗެމްޕިއަންޝިޕުގައި ވާދަކުރާނީ ފަސް ގައުމެކެވެ. ސަސްޕެންޝަނުގެ ސަބަބުން ޕާކިސްތާނަށް މުބާރާތުގައި ވާދަނުކުރެވޭއިރު، ކޮވިޑް-19 ގެ ސަބަބުން ބުޓާނުން ވަނީ މި މުބާރާތުގައި ވާދަނުކުރަން ނިންމާފައެވެ.

އެންމެ ފަހުން 2018 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕުގައި އިންޑިއާއިން ޒުވާން ޓީމެއް ބައިވެރިކުރުވި ނަމަވެސް، އަންނަ މަހު ރާއްޖޭގައި ބާއްވާ ސާފް ޗެމްޕިއަންޝިޕުގައި އިންޑިއާގެ ސީނިއާ ޓީމު ވާދަކުރާނެ ކަމަށް ރިޕޯޓުތައް ބުނެއެވެ.