ކުށް މަދު، އަމާން ގައުމެއްގެ ގޮތުގައި ފާހަގަވެފައި އޮންނަ ނިއުޒިލޭންޑުގައި އަނެއްކާވެސް ޓެރަރިސްޓު ހަމަލާއެއް ދީފިއެވެ.
ނިއުޒިލެންޑްގެ ސަހަރެއް ކަމަށްވާ އޯކްލެންޑުގެ ސުޕަމާކެޓެއްގައި 6 މީހެއްގެ ގަޔަށް ވަޅި ޖެހުމުގެ މި ހާދިސާ ހިނގާފައިވަނީ ހުކުރު ދުވަހުގެ ވަގުތެއްގައެވެ. އެކަން ކޮށްފައިވަނީ ސްރީލަންކާއަށް ނިސްބަތްވާ މީހެއްކަމަށް ނިއުޒިލޭންޑުގެ ބޮޑުވަޒީރު ޖަސިންޑާ އާޑެން ވަނީ ވިދާޅުވެފައެވެ. އޭނާއަކީ އައިސިސް ޖަމާއަތަށް ސަޕޯޓު ކުރާ މީހެއްކަން ޖަސިންޑާ ފާހަގަ ކުރެއްވިއެވެ.
ބީބީސީގައި ރިޕޯޓު ކޮށްފައިވާ ގޮތުން، ފުލުހުން ވަނީ ވަގުތުން އޭނާގެ ގަޔަށް ބަޑި ޖަހައި މަރާލާފައެވެ. އޭނާ ވަޅީގެ ހަމަލާ ދިން މީހުންގެ ތެރެއިން 3 މީހުން ސީރިއަސް ޙާލަތުގައިވާއިރު، އެކެއްގެ ހާލު ވަރަށް ގޯސްކަމަށް ރިޕޯޓުތައް ބުނެއެވެ.
ނިއުޒިލޭންޑުގެ ޕޮލިސް ކޮމިޝަނަރ އެންޑްރޫ ކޮސްޓާއާ ހަވާލާދީ ބީބީސީގައި ރިޕޯޓު ކޮށްފައިވާ ގޮތުން އޭނާ ދިރިއުޅޭ ގެއިން ނުކުމެގެން ސުޕަމާކެޓަށް ދިޔައިރުވެސް ފުލުހުން ގެންދިޔައީ ޝައްކު ކުރެވޭ ކަންތައްތަކެއް ހުރުމުން އޭނާއަށް ފާރަލަމުންނެވެ. ނަމަވެސް މާކެޓަށް ވަދެ ކުއްލިއަކަށް ވަޅީގެ ހަމަލާތަކެއް ދީފާނެކަމަށް ބެލެވިފައި ނެތްކަން ފުލުހުން ފާހަގަކޮށްފައިވެެއެވެ. އެގޮތުން އޭނާ ހަމަލާ ދިނުމަށް ބޭނުންކުރި ވަޅިއަކީވެސް އެތަނުގެ ތެރެއަށް ވަނުމަށްފަހު ފިހާރައިން ނެގި އެއްޗެއްކަމަށް ފުލުހުންނާ ހަވާލާދީ ބޭރުގެ މީޑިއާތަކުން ރިޕޯޓު ކޮށްފައިވެއެވެ.
ނިއުޒިލޭންޑުގައި މީގެ ކުރިންވެސް އެފަދަ ހާދިސާއެއް ވަނީ ހިނގާފައެވެ. އެގޮތުން ނިއުޒިލެންޑުގެ ކްރައިސްޓްޗާޗުގެ މިސްކިތަކަށް ދިން ބަޑީގެ ހަމަލާގައި 40 މީހަކު މަރާލާފައި ވާއިރު މިސްކިތުގައި ނަމާދުކުރަން 100 އަށްވުރެ ގިނަ މީހުން ތިބި ކަމަށް ނޫސްތަކުގައި ބުނެފައިވެއެވެ.
