ޒަމާނީ ފެންވަރުގެ ހޮސްޕިޓަލާއި ޖޫނިއަރ ކޮލެޖެއް ތަރައްގީކުރުމުގެ މަޝްރޫއު ލަސްވަމުންދާތީ އެ މަސައްކަތް އަވަހަށް ފައްޓަވައިދެއްވުމަށް ކެނދިކުޅުދޫ ކައުންސިލުން ރައީސް އަރިހުގައި އެދިއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މިލަދުންމަޑުލު ދެކުނުބުރީ ކެނދިކުޅުދޫ ކައުންސިލަރުންނާއެކު ބޭއްވި ބައްދަލުވުމުގައި, މި ސަރުކާރުން ކެނދިކުޅުދޫގެ ތަރައްގީއަށް ޚާއްސަ ސަމާލުކަމެއްދޭކަން ފާހަގަކޮށް ކައުންސިލުންވަނީ ކެނދިކުޅުދޫގައި ހިންގާ ތަރައްގީގެ މަޝްރޫއުތައް ކުރިއަށްގެންދިއުމުގައި ހުރި ކަންބޮޑުވުންތަކާއި، ރަށުގެ އެކި މުއައްސަސާތަކަށް ކުރިމަތިވާ ގޮންޖެހުންތައް ހިއްސާކޮށްފައެވެ.
އެގޮތުން، ޒަމާނީ ފެންވަރުގެ ހޮސްޕިޓަލަކާއި ޖޫނިއަރ ކޮލެޖެއް ތަރައްގީކުރުމުގެ މަޝްރޫއު ލަސްވަމުންދާތީ, އެ މަސައްކަތް ވީ އެންމެ އަވަހަށް ފައްޓަވައިދެއްވުމަށް އެދިފައިވާ ކަމަށެވެ. ހަމަ އެއާއެކު ހުޅަނގު މޫސުމުގައި ބަނދަރުގެ އެއްބައި ބޭނުންކުރަން ޖެހުމުގެ ސަބަބުން ރައްޔިތުންނަށް ކުރިމަތިވާ ގޮންޖެހުންތައް ވެސް ކައުންސިލުން ވަނީ ފާހަގަކޮށްފައެވެ.
މީގެ އިތުރުން ކެނދިކުޅުދޫއަކީ ގިނަ ކުޅިތަކެއް އެކުލެވޭ ރަށަކަށްވާތީ މިހާރު ރަށުގެ ބައެއް ކުޅިތައް ހިކުމުގެ ބިރު އޮތްކަމުގައި ފާހަގަކޮށް, އެކަމަށް ހައްލެއް ހޯދަންޖެހިފައި އޮތް ކަމަށް ކައުންސިލްގެ ފަރާތުން ރައީސަށް ދަންނަވާފައި ވެއެވެ. އަދި ނަރުދަމާގެ މަޝްރޫއުގެ މަސައްކަތް އަވަސްކޮށް ދެއްވުމަށް ކައުންސިލުން އެދިފައިވެއެވެ. މީގެ އިތުރުން ރަށުގައި ސީ އެމްބިއުލާންސެއް ނެތުމުން ރައްޔިތުންނަށް ކުރިމަތިވާ ގޮންޖެހުންތަކާއި، ބޭންކުގެ ޚިދުމަތް ފުޅާކޮށްދެއްވުމަށާއި، ބޯހިޔާވަހިކަން އިތުރަށް ބޭނުންވާކަން ކައުންސިލުން ފާހަގަކުރެއްވިއެވެ. އެގޮތުން އިތުރު ހައުސިންގ ޔުނިޓް އަދި ގެވަޅުތަކުގައި ގެ އެޅުމަށް މަގުފަހިވާނެ ގޮތެއް ހަމަޖައްސައިދިނުމަށް އެދިފައިވެއެވެ.
ރަށުގެ އެކި މުއައްސަސާތަކަށް ކުރިމަތިވާ ގޮންޖެހުންތައް ހިއްސާކޮށް ކައުންސިލުންވަނީ ރަށުގެ ސްކޫލަށް, އެކަށީގެންވާ ޖާގައިގެ ބަހެއް ނެތުމުގެ ސަބަބުން ދިމާވާ ދަތިތަކާއި، ދަރިވަރުންނަށް ކުރިމަތިވާ ދަތިތައް ހިއްސާކޮށްފައެވެ. އަދި ސިއްހީ މަރުކަޒަށް ބޭނުންވާ މުހިންމު ވަސީލަތްތައް ނެތުމުގެ ސަބަބުން ކުރިމަތިވާ ދަތިތައްވެސް ކައުންސިލްގެ ފަރާތުން ވަނީ ރައީސްއާ ހިއްސާކުރައްވާފައިވެއެވެ.
މި ބައްދަލުވުމުގައި ރައީސުލްޖުމްހޫރިއްޔާ ވަނީ ކެނދިކުޅުދޫ ފެންނަނީ ތަރައްގީގެ ގިނަ މަޝްރޫއުތަކެއް ހިންގޭނެ ގާބިލުކަންހުރި ރަށެއްގެ ގޮތުގައިކަން ފާހަގަކުރައްވާފައެވެ. އަދި ކައުންސިލުން ފާހަގަކުރި ކަންތައްތައް އެކަމާގުޅޭ އިދާރާތަކާ މަޝްވަރާކުރެއްވުމަށްފަހު އެކަންކަމަށް ހައްލު ހޯއްދަވައިދެއްވަން މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.
މި ސަރުކާރުން ކެނދިކުޅުދޫގައި ހިންގަން އަދި ޕްލޭން ކުރެވިފައިވާ މަޝްރޫއުތަކުގެ ތެރޭގައި ފެނާއި ނަރުދަމާ ނިޒާމް ގާއިމުކުރުމާއި، ސްލިޕްވޭ ހެދުމާއި، ކުނި މެނޭޖްކުރާ މަރުކަޒު އަޕްގްރޭޑް ކުރުމާއި، ސިއްހީ މަރުކަޒުގެ އެކްސްޓެންޝަންގެ މަސައްކަތާއި، ސްކޫލް 4 ކްލާސްރޫމާއި އޮފީސް އިމާރާތްކުރުމުގެ މަޝްރޫއާއި، ޖޫނިއަރ ކޮލެޖް ގާއިމުކުރުމުގެ މަސައްކަތާއި، ގޭދޮށު މަސް ޕްލާންޓް ގާއިމުކުރުމުގެ މަސައްކަތާއި، ފެނަކަ އޮފީސް އިމާރާތާއި ވަށާފާރު ރޭނުމުގެ މަޝްރޫއު އަދި އައު އިންޖީނުގެ އެޅުމުގެ މަޝްރޫއު ހިމެނެއެވެ. އަދި މިހާތަނަށް މި ސަރުކާރުން ނިންމާފައިވާ މަޝްރޫއުތަކުގެ ތެރޭގައި ސޯލާ ހައިބްރިޑް ސިސްޓަމް ގާއިމުކުރުމާއި، ކެނދިކުޅުދޫ ސްކޫލްގެ 2 ކްލާސްރޫމާއި ހޯލްގެ މަސައްކަތާއި، ފުޓުބޯޅަ ދަނޑު ތަރައްގީކުރުމުގެ މަސައްކަތް ހިމެނެއެވެ.
