ރައީސް ސާލިހް ސަރުކާރުން ކެނދިކުޅުދޫގައި އަޅަން ހަވާލުކުރި ޖޫނިޔަރ ކޮލެޖުގެ ބިންގާ ޑރ މުއިއްޒު ސަރުކާރުން އަޅައިފި

ރައީސް ސާލިހް ސަރުކާރުން ކެނދިކުޅުދޫގައި އަޅަން ހަވާލުކުރި ޖޫނިޔަރ ކޮލެޖުގެ ބިންގާ ޑރ މުއިއްޒު ސަރުކާރުން އަޅައިފިއެވެ.

ބިންގާ އަޅުއްވައިދެއްވީ ހުކުރު ދުވަހު ހަވީރު ކެނދިކުޅުދޫގައި ބޭއްވި ރަސްމިއްޔާތެއްގައި ހަޔަރ އެޑިއުކޭޝަން މިނިސްޓަރ ޑރ. އަލީ ޙައިދަރެވެ.

ނ. ކެނދިކުޅުދޫގައި ބިންގާ އެޅުނު ޖޫނޮޔަރ ކޮލެޖަކީ އެމްޑީޕީ ސަރުކާރުގެ މެނިފެސްޓޯގައި ހިމެނިގެން ކުރިއަށް ގެންދަން ނިންމި މަޝްރޫއެކެވެ.

86،000 އަކަފޫޓުގެ ބިމެއްގައި ތަރައްގީ ކުރާ މި ކޮލެޖް ޚާއްސަ ކޮށްފައިވަނީ މަތީ ފަންތީގެ ޓޫރިޒަމާއި، ހޮސްޕިޓަލިޓީ ދާއިރާގެ ފަންނީ އެކި ލެވެލްތަކުގެ ކޯސްތައް ހިންގުމަށެވެ.

ޕަބްލިކް ޕްރައިވެޓް ޕާޓްނާޝިޕް (ޕީޕީޕީ) ގެ ދަށުން ކެނދިކުޅުދޫގައި ޖޫނިޔަރ ކޮލެޖެއް އަޅަން ކުރި އިއުލާނާ ގުޅިގެން، އެ މަޝްރޫއު ކާމިޔާބުކުރި ވިލާ އެޑިޔުކޭޝަނަލް ސަރވިސަސް އާއެކު އެއްބަސްވުމުގައި ސޮއެކުރެވުނީ 2 ނޮވެމްބަރު 2022 ގައި އެމްޑީޕީ ސަރުކާރުގު ވެރިކަމުގައެވެ.

މި އެއްބަސްވުމުގައި ވިލާ އެޑިޔުކޭޝަނަލް ސަރވިސަސްއިން ސޮއި ކުރެއްވީ ވިލާ ކޮލެޖުގެ ވައިސްރެކްޓައ ޑރ ނަޖީބުއެވެ. އެމްޑީޕީގެ ސަރުކާރުގެ ފަރާތުން ސޮއެ ކުރެއްވީ މިނިސްޓްރީ އޮފް ހަޔަރ އެޑިޔުކޭޝަންގެ ޕާމަނަންޓް ސެކްރަޓަރީއެވެ. މިކަމަށްޓަކައި މިނިސްޓްރީ އޮފް ހަޔަރ އެޑިޔުކޭޝަންގައި ބޭއްވުނު ޚާއްސަ ރަސްމިއްޔާތު ޝަރަފުވެރި ކޮށްދެއްވީ އޭރުގެ މިނިސްޓަރ އޮފް ހަޔަރ އެޑިޔުކޭޝަން ޑރ އިބްރާހިމް ޙަސަންއެވެ.

ކެނދިކުޅުދޫގައި ކުރިއަށް ގެންދާ ޖޫނިއަރ ކޮލެޖް މަޝްރޫއަކީ ރައްޔިތުންނާއި ގާތުން މަސައްކަތްކޮށް، ކެނދިކުޅުދޫގެ ކައުންސިލާއި ގުޅިގެން ކުރިޔަށް ގެންދެވުނު މަޝްރޫއެކެވެ. މި މަޝްރޫއު ފުރިހަމަ ކުރެވޭއިރު ކޮލެޖުގައި ކިޔަވައިދިނުމަށް ބޭނުންކުރާ އިންސްޓިޓިއުޓް ބްލޮކެއްގެ އިތުރުން އެކޮމަޑޭޝަން ބްލޮކެއްގެ އިތުރުން ޓޫރިޒަމާއި ހޮސްޕިޓަލިޓީގެ ފަންނީ ތަމްރީނުތައް ދިނުމަށާއި ޢަމަލީ ތަޖުރިބާ ހޯދައިދިނުމަށްޓަކައި ޓޫރިސްޓް ފެސިލިޓީއެއް އިންސްޓިޓިއުޓާއެކު ތަރައްޤީކުރުމަށް ވަނީ ހަމަޖެހިފައެވެ. ކިޔަވައިދިނުމަށް މަދުވެގެން 6 ކްލާސް ރޫމާއި ސީ.ޓީ ލެބޯރެޓަރީއަކާއި، އޮޑިޓޯރިއަމެއްގެ އިތުރުން ލައިބްރަރީއެއްވެސް ހުންނާނެ ކަމަށް މައުލޫމާތު ލިބިފައިވެއެވެ.

އެމްޑީޕީ ސަރުކާރުންގެ ވިސްނުމަކަށް ވެފައިއޮތީ އަތޮޅު ތެރެޔަށް ޓެކްނިކަލް އެންޑް ވޮކޭޝަނަލް ނުވަތަ މަސައްކަތުގެ ތަޢުލީމާއި ތަމްރީނު ފޯރުކޮށްދީ ދިވެހި ޒުވާނުންނަކީ ގާބިލު މަސައްކަތްތެރި ބަޔަކަށް ހެދުމަށް ކަމަށް އޭރު ސަރުކާރުން ވަނީ ހާމަ ކޮށްފައެވެ.

މިގޮތުން، ހއ ދިއްދޫ އާއި ރ އަލިފުށީގައި ޓިވެޓް ސެންޓަރުތަކުގެ ބިންގާއެޅި އެތަންތަން އިމާރާތް ކުރުމުގެ މަސައްކަތް ކުރީ ސަރުކާރުގެ ދުވަސްވަރު ހަލުއިކޮށް ކުރިޔަށް ދިޔަކަން ވަނީ ފާހަގަ ކުރެވިފައެވެ. އެހެންނަމަވެސް ރައީސް މުއިއްޒު ވެރިކަމާ ހަވާލުވެވަޑައިގަތުމާއެކު އެމަސައްކަތްތަކަށް ދޭ އިސްކަން ގެއްލި މަސައްކަތްތައް މަޑުޖެހިފައިވާކަން އެ ރަށްރަށުގެ ރައްޔިތުން އަންނަނީ ފާހަގަ ކުރަމުންނެވެ.