ދެފުށް ފެންނަ ސަރުކާރެއް ހިންގާނެކަމުގެ ވައުދާއެކު އައިސް މި ސަރުކާރުން ސިޔާސީ މަޤާމުތަކަށް މީހުން އައްޔަނު ކުރަމުންދަނީ ރޭގަނޑު ދަންވަރުގެ ވަގުތުގައިކަމަށް ކެނދިކުޅުދޫ ދާއިރާގެ ކުރީގެ މެމްބަރު އަހުމަދު އީސަ ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން އީސަ ވިދާޅުވީ، މި ހިނގަމުންދަނީ ނުހަނު މަތިބަރު ސަރުކާރެއް ކަމަށާއި، އޭގެ އެއް ހެއްކަކީ ހައްދެއް ނެތް މިންވަރަށް ސިޔާސީ މަޤާމުތައް ދެއްވުން ކަމަށެވެ. އެގޮތުން މިދިޔަ އެއްވެސް ސަރުކާރަކުން އައްޔަނު ނުކުރައްވާ މިންވަރަށް ސިޔާސީ އިސް މަޤާމުތަކަށް މި ސަރުކާރުން މީހުން އައްޔަނު ކޮށްފައިވާކަން އސަ ފާހަގަ ކުރެއްވިއެވެ.

އީސަ ވިދާޅުވީ، އެންމެ ކުޑަމިނުން ސިޔާސީ މަޤާމުތަކަށް އައްޔަނު ކުރާ މީހުންގެ މައުލޫމާތުވެސް ސަރުކާރުން ހާމަ ނުކުރާ ކަމަށާއި، އެހެންކަމުން ރައްޔިތުންނަށް މިއަދު ހަގީގަތެއް ނޭނގޭ ކަމަށެވެ. މިއީ ދެފުއް ފެންނަ ސަރުކާރެއް ހިންގަވާނެކަމަށް ވިދާޅުވި ވެރިކަމުގެ ޙާލަތުކަން އީސަ ފާހަގަ ކުރެއްވިއެވެ.

އީސަ ސިފަ ކުރައްވާ ގޮތުގައި ދެފުއް ފެންނަ ސަރުކާރެއް ހިންގާނެކަމުގެ ވައުދާއެކު އައިސް މި ސަރުކާރުން ސިޔާސީ މަޤާމުތަކަށް މީހުން އައްޔަނު ކުރަމުންދަނީ ރޭގަނޑު ދަންވަރުގެ ވަގުތުގައިކަމަށް ޤަބޫލު ކުރެވެއެވެ.

އޭގެ އިތުރުން، ސަރުކާރުން އައްޔަނު ކޮށްފައިވާ ސިޔާސީ މަޤާމުތަކުގެ އަދަދު ރައްޔިތުންނަށް ސާފުވަން ޖެހޭކަން ފާހަގަ ކުރައްވައި އީސަ ވިދާޅުވީ، ދައުލަތުގެ ބަޖެޓުން ރައްޔިތުންގެ ފައިސާއިން މުސާރަދޭ މަޤާމުތަކުގެ އަދަދު ސާފުކޮށްދޭން ޖެހޭނެ ކަމަށެވެ.

އީސަ ވިދާޅުވީ، މި ހުރިހާ ކަމެއް މިހެން އޮއްވައި ދެން އައީ އިޤްތިސާދީ ދަތިކަމުގެ ވާހަކަ ކަމަށެވެ. އެގޮތުން ބޭސްވެރިކަމަށް ސަލާން ޖެހުމާއި، ރައްޔިތުން ޙާލުގައި ޖެހުން އާންމުވަމުންދާކަމަށް އީސަ ވިދާޅުވިއެވެ.

އީސަ އިތުރަށް ވިދާޅުވީ، އެންމެ ފަހުން ސަރުކާރު ހިންގާ ޕާޓީން ބައިވެރިވި ބައި އިލެކްޝަނަށްވެސް 14 މީހުން އަލަށް ވަޒީފާތަކަށް ވައްދާފައިވާ ކަމަށެވެ. މިކަންކަމުން އެނގިގެންދަނީ ސަރުކާރުގެ އެއްވެސް ހަމައެއް ލަމައެއް ނެތްކަން ކަމަށް އީސަ ވިދާޅުވިއެވެ.

އޭގެ އިތުރުންވެސް އީސަ ވަނީ ކުންފުނިތަކުގެ ޑީއެމްޑީންނާއި އިސް މަޤާމުތައްވެސް މިއިން ދުވަހަކު އިތުރުނުވާ މިންވަރަށް އިތުރުވެފައިވާކަމަށް ވިދާޅުވެފައެވެ.

އެހެންނަމަވެސް މިދިޔަ ސަރުކާރުގައި އިޤްތިސާދީ ގޮތުން އެންމެ ދަތިވި ދަނޑިވަޅުގައިވެސް އިސްކޮށްފައިވަނީ އާންމު ރައްޔިތުންކަމަށް އީސަ ވިދާޅުވިއެވެ.

މި ހިނގަމުންދާ ސަރުކާރަކީ އަޑިނުބައި ސަރުކާރެއްގެ ގޮތުގައި ސިފަ ކުރައްވަމުން އީސަ އިތުރަށް ވިދާޅުވީ، މި ސަރުކާރުން ނުކުރާނަމޭ ބުނި ހުރިހާ ކަމެއް ކުރަމުންދާ ކަމަށެވެ. އެގޮތުން ރައްޔިތުންނަށް ވެފައިވާ ވައުދުތައް މިއަދު ހަނދާން ނައްތާލާފައިވާކަން ފާހަގަ ކުރައްވައި އީސަ ވިދާޅުވީ، ސަރުކާރުން ރައްޔިތުންނަށް ބޮޑު ލަދުވެތިކަމެއް ކުރިމަތި ކުރުވަމުންދާ ކަމަށެވެ.

ސަރުކާރުން މިހާރު ކަން ކުރާ ގޮތުގެ ސަބަބުން ރައްޔިތުންނަށް ހުރިހާ ތަކުލީފެއް ކުރިމަތިވަމުންދާކަމަށްވެސް އީސަ ވިދާޅުވިއެވެ.