ރައީސް ޔާމީނަށް ކުރި ހުކުމް ލިޔުއްވީ ހިސާން - ސައީދު
ފާޑު ކިޔޭވަރު ޕާޓީއެއް ރާއްޖޭގެ ސިޔާސީ މަސްރަހުގައި ނެތް
މުހައްމަދު ސައީދު - މާވަށު ދާއިރާގެ މެމްބަރު
ރައީސް ޔާމީނަށް ކުރި ހުކުމް ލިޔުއްވީ، ޖުޑީޝަލް ސަރވިސް ކޮމިޝަންގެ ރައީސް އަދި ތުޅާދޫ ދާއިރާގެ މެމްބަރު ހިސާން ހުސައިން ކަމަށް މާވަށު ދާއިރާގެ މެމްބަރު މުހައްމަދު ސައީދު ތުހުމަތު ކުރައްވައިފިއެވެ.
އިދިކޮޅު ކޯލިޝަނުން ބޭއްވި، ޖަލްސާގައި ވާހަކަ ދައްކަވަމުން ސައީދު ވަނީ ބޮޑެތި ތުހުމަތުކެއް ސަރުކާރަށް އަމާޒުކުރައްވާފައެވެ. ސައީދު ވިދާޅުވީ، ރައީސް ޔާމީނަށް ކުރެއްވި ހުކުމަކީ ފަނޑިޔާރުން ލިޔުއްވި ހުކުމެއް ކަމަށް އެއްވެސް ފަނޑިޔާރަކަށް ވިދާޅުވާން ކެރިވަޑައި ނުގަންނަވާނެ ކަމަށެވެ. އެ ހުކުމަކީ ސަރުކާރުގެ ނުފޫޒާއެކު ހިސާން ލިޔުއްވި ހުކުމެއް ކަމަށް ސައީދު ވިދާޅުވިއެވެ. އަދި ހުކުމް އޮތީ ރައީސް ޞާލިހުގެ މޭޒުކޮޅުގައި ކަމަށް ސައީދު ތުހުމަތު ކުރެއްވިއެވެ.
ސަރުކާރު ކޯލިޝަނަށްވުރެ ބޮޑަށް ރާއްޖޭގެ ރައްޔިތުންނަށް އަނިޔާވެރިވި ބަޔަކު ވެރިކަމަށް ނާންނަ ކަމަށާއި، ކޯލިޝަން ލީޑަރުންނަކީ ވެސް ގައުމުގެ މަސްލަހަތު ދޫކޮށް މާއްދީ ފައިދާއަށް އުޅުއްވާ ބައެއްގެ ގޮތުގައި ސައީދުވަނީ ސިފަކުރައްވާފައެވެ. އެހެންކަމުން އެ ލީޑަރުން ދެން ރައްޔިތުން ބަލައި ނުގަންނާނެ ކަމަށް ސައީދު ވިދާޅުވިއެވެ.
ސައީދު ވިދާޅުވީ، ކަންކަމުގައި ފާޑު ކިޔޭވަރު ޕާޓީއެއް ރާއްޖޭގެ ސިޔާސީ މަސްރަހުގައި ނެތް ކަަމަށެވެ. އިދިކޮޅު ކޯލިޝަނުން ރައްދުދޭވަރުގެ ޕާޓީތަކެއް ކޯލިޝަންގައި ނެތްކަމަށް ވެސް ސައިދު ވިދާޅުވިއެވެ. ރައީސް ޔަމީން އެމްޑީޕީ ނެތި ކޮއްލަން ބޭނުންފުޅު ނުވާނެ ކަމަށާއި، އެމްޑީޕިީށް ފާޑު ކިޔުމުގެ ފުރުސަތު އެމަނިކުފާނުގެ ވެރިކަމުގައި ދެއްވިކަމަށް ސައީދު ވިދާޅުވިއެވެ.
