ދެކުނު އެފްރިކާއިން އަނެއްކާވެސް ކޮވިޑްގެ އައު ވޭރިއަންޓެއް ފެނިއްޖެ

ދެކުނު އެފްރިކާގެ ސައިންސްވެރިން, އެސަރަހައްދުގައި ފެތުރެމުން އަންނަ ކޮވިޑްގެ އައު ވޭރިއަންޓެއް ހޯދައިފިއެވެ.

އައު ވޭރިއަންޓަކީ ގިނަ މިޔުޓޭޝަންތަކާއެކު އުފެދިފައިވާ ވޭރިއަންޓެއް ކަމަށާއި އެހެންކަމުން މިއީ ކިހާ މިންވަރަކަށް ފެތުރޭ އަދި މިހާރު ދެމުން އަންނަ ވެކްސިނުން ދިފާއުވެވޭ ވޭރިއަންޓެއްތޯ ބެލުމުގެ އިތުރު ދިރާސާތަކެއް ކުރަމުން އަންނަކަމަށް ސައިންސްވެރިން ވަނީ ބުނެފައެވެ.

އައު ވޭރިއަންޓަށް ދީފައިވާ ނަމަކީ ސީ.1.2 އެވެ. މިވޭރިއަންޓް އެންމެ ފުރަތަމަ ފެނިފައިވަނީ މިއަހަރުގެ މެއި މަހުއެވެ. އޭގެފަހުން ދެކުނު އެފްރިކާގެ ދެކުނުގެ ޕްރޮވިންސްތަކުގެ އިތުރުން 7 ގައުމެއްގައި ވަނީ މިހާތަނަށް އައިއިރު މި ވޭރިއަންޓް ފެތުރިފައެވެ. އޭގެތެރޭގައި އެފްރިކާގެ ގައުމުތަކާއި، ޔޫރަޕްގެ ގައުމުތައް އަދި އޭޝިޔާ އާއި އޯޝޭނިއާގެ ގައުމުތަކުން މިވޭރިއަންޓް ފެނިފައިވާކަމަށް ދިރާސާތަކުން ވަނީ އެނގިފައެވެ.

މިވޭރިއަންޓާ ގުޅޭގޮތުން މިހާތަނަށް ދެނެގަނެވިފައިވާ ކަންކަމަށް ބަލާއިރު މިވޭރިއަންޓްގައި އެހެން ވޭރިއަންޓްތަކުގައި ހިމެނޭ ގިނަ މިޔުޓޭޝަންތަކެއް ހިމެނެއެވެ. އޭގެ ސަބަބުން މިވޭރިއަންޓް ފެތުރޭ މިންވަރު ވަނީ އިތުރުވެފައެވެ. އަދި ހަށިގަނޑުގައި ހުންނަ އެންޓިބޮޑީސް އަށް ވައިރަސްއާ ދެކޮޅަށް މަސައްކަތްކުރުމުގެ ބާރު ދަށްކޮށްލައެވެ. ސައިންސްވެރިން އަންނަނީ މިވޭރިއަންޓްގެ ސަބަބުން ކޮވިޑް-19 ވައިރަސްއަށް އަންނަ ބަދަލުތައް ދެނެގަންނަމުންނެވެ. އެގޮތުން މިހާރު ކުރިޔަށްދަނީ ލެބޯޓްރީގެ ޓެސްޓްތަކެވެ. މިޓެސްޓްތަކުގެ ޒަރީޢާއިން އެންޓިބޮޑީސް މިވައިރަސްއާ ދެކޮޅަށް މަސައްކަތްކުރާ މިންވަރު ދެނެގަންނާނެއެވެ.

ދެކުނު އެފްރިކާއަކީ އެންމެ ފުރަތަމަ ބީޓާ ވޭރިއަންޓް ފެނުނު ގައުމުވެސްމެއެވެ. އަދި ވޭރިއަންޓް އޮފް ކޮންސަރންގައި ލޭބަލްކޮށްފައިވާ ހަތަރު ވޭރިއަންޓްގެ ތެރެއިން އެއް ވޭރިއަންޓްވެސްމެއެވެ. ބީޓާއަކީ ކޮވިޑްގެ އަސްލު ވައިރަސްއަށްވުރެ ހަލުވިކަމާއެކު ފެތުރި އަދި ވެކްސިންއާ ދެކޮޅަށް މަސައްކަތްކުރާ މިންވަރު ދަށް ވޭރިއަންޓެކެވެ. އެކަމުގެ ސަބަބުން ބައެއް ގައުމުތަކުން ވަނީ ދެކުނު އެފްރިކާއަށް ދަތުރުކުރުން މަނާކޮށްފައެވެ.

އައު ވޭރިއަންޓެއް ފެނުމާއެކު މާހިރުން ބުނަމުން އަންނަނީ މިއިން އަންގައިދެނީ ޕެންޑަމިކް ނިމެން އަދި ނޫޅޭކަން ކަމަށެވެ. އަދި ވައިރަސް އަންނަނީ އަދިވެސް މިޔުޓޭޓްވަމުން ކަމަށާއި ބާރުގަދަ ވޭރިއަންޓްތައް އުފައްދަމުން ކަމަށެވެ.

ސީ.1.2 ވޭރިއަންޓްގެ ޖިނޯމިކް ސީކުޔެންސް ހަދާފައިވާއިރު އަދި މިހާތަނަށް ހޯދިފައިވާ ގޮތުގައި ދުނިޔޭގައި މިވަގުތު އެންމެ އާންމު ވޭރިއަންޓް ކަމުގައިވާ ޑެލްޓާ ވޭރިއަންޓާ އަޅާ ބަލާއިރު އަދި މިވޭރިއަންޓް ފެތުރޭ މިންވަރު ވަރަށްވެސް ދަށެވެ.