އަމަރު އަކްބަރު އެންތަނީގެ ލަނގިރި ދަތުރު
މުއިއްޒު އުޅުއްވަނީ އެކަނި އުންމަތެއްހެން ވަކިވަކިން ސުރުޚީ ހެއްދެވުމުގައި
މާލޭގެ މޭޔަރު ޑރ.މުއިއްޒު
އިދިކޮޅު ޕީޕީއެމްގެ ފަރާތުން ކުރެވޭ މާބޮޑު ކަމެއް، ހިންގޭ ސިޔާސީ ހަރަކާތެއް ނުފެނެއެވެ. ރަނގަޅު އިހުތިޖާޖެއް ކޮށްލައި ހޫނު ތަނުގައި ޖެހިލާނެ ހިތްވަރެއް ވެސް އަމުދުން ނެތީއެވެ.
މޭޔަރު މުއިއްޒު އުޅުއްވަނީ އެކަނި އުންމަތެއްހެން ވަކިވަކިން ސުރުޚީ ހެއްދެވުމުގައެވެ. ވަޒީރުކަމުގައި ހުންނެވިއިރު އަމިއްލަފުޅަށް ކުރެއްވި ހުރިހާ ކަމެއް ގޯސްވެގެން ކުސަ ދެމުމުގައެވެ. އޭރުގެ ސިޓީ ކައުންސިލް ހުރި އިމާރާތުން އެމީހުން ނެރެ މީދާ ހާއްޔެއްގެ ތެރެއަށް އެތަން ގަނބިއްސާލިއެވެ. އެތަނުގެ ލިޔެކިއުމާއި ފައިލްތަކާއި ކޮމްޕިއުޓަރުތައް ފުލުހުން މެދުވެރިކޮށް ނެރެ މުޅިތަން އެފުއް މިފުށަށް ޖަހައިލިއެވެ.
ދިރިއުޅެން ކަމުނުދާތީ ބިން ލިބުނު އެންމެން މަގުމަތިކޮށް ގުޅިފަޅު ފަޅުތަނެއްގެ ގޮތުގައި ބޭއްވުމަށް ނިންމިއެވެ. ޖަޕާނު މީހުންގެ ދިރާސާތަކުގެ މައްޗަށް ވެލި އަޅައިގެން އިންޑަސްޓްރިއަލް ވިލެޖް ހިއްކިއެވެ. މާލޭގެ ދެކުނު ކަނޑުތޮށިން ވާދޫ ކަނޑު އެއްގަންކޮށް ނުރައްކާތެރި ހާދިސާތަކަށް ދައުވަތު ދިނެވެ.
އެނޫން ގޮތެއް ނެތިގެން އެތަނަކަށް ވަނަސް ތަން ފުރާ މީހުން ދިރިއުޅޭން ފެށުމުން ހިޔާފްލެޓުން އުފެދޭ މައްސަލަ ދިރިތިބި ބަޔަކު ދެކޭނެއެވެ. ތިޔަ ކަމެއް ކުރީ ކޮން ބޭނުމަކުކަން މާކުރިން ރައީސް ނަޝީދު ވިދާޅުވިއެވެ. ބޭނުމަކަށްވީ ރަށްތައް ވިއްކާލައި، ރާއްޖެތެރެ އުވާލައި ހިއްކިބިމެއްގެ ހަތަރެސްކަން ގޮޅިތަކަށް ދިވެހިންގެ ބޯމަހާލައި ދިރިއުޅުން ނަގާލުމަށެވެ.
އުޑަށް ވާހަކަ ގޮވޭ ވަރަށް މާފަންނު ކޮޅުގައި އުސްކޮށްފައި އެހުރި އަމިއްލަ ބާލްޚާނާގައި ބޮޑު އަގުގައި ދިރިއުޅޭ މީހުން ލިފްޓުން ކުނިބާލާތީ މިދޭތެރެއަކުން ވެމްކޯއަށް ނޭނގި ވެމްްކޯ މުވައްޒަފުން ސިޑިން އަރުވައިގެން ކުނިބާލަން ވެސް އުޅުއްވައިފިއެވެ. ހުރިހާ ކަމެއް ގޯހުން ގޯހަށް ދުއްވާލުމަށްފަހު ނިކަމެތި ރައްޔިތުންނާ ބޯހިޔާވަހިކަން ގުޅުވައިގެން ނޫނީ އެހެން ގޮތަކުން ވެސް ދުވާލަކު ތިން ސުރުޚީ ހައްދަވަނީ ޕީޕީއެމްގެ އެތެރެއަށް ނޭނގި ރިޔާސި ޓިކެޓް އޮޓޯއަށް ލެވޭނެ ފޯމިއުލާއެއް ހޯއްދެވުމަށެވެ.
ޕީޕީއެމްގެ ކުރީސަފުގައި މިހާރު ތިބީ ޓިކެޓިން އޭޖެންޓުންނެވެ. ތުރާކުނަކަސް ނައިފަރަކަސް ފައިނަކަސް މަޖިލިސް ތެރެއިން ވެސް ސުރުޚީ ހައްދަވަނީއެވެ. އެތަނުގައިވެސް އަމަރު އަކްބަރު އެންތަނީއެވެ. އުރައްޕެއް ހުރި ސިޔާސީ މަސައްކަތެއް ނުކުރެވުމުން ހެދިނިމިފައި އޮތް ޕާޓީއެއްގެ ނަމުގައި ގޮސް އަލަށް ޕާޓީއެއް ހަދަން އުޅޭހެން އަތޮޅުތަކުގައި ހޭވުނަކަސް ނުވާނެއެވެ.
ޕެޓިޝަން ހެދުމާއި ގަރާރު ހުށައެޅުމާއި ޓްވީޓް ކުރުމެކޭ ޕީޕީއެމްގެ ނަމުގައި މާފަތި ނެށުމާއި ލަނގިރި ޖެހުމާއި މާލިހެދިގެން ރަށްރަށަށް ދަތުރުކުރުމެކޭ ތަފާތެއް ނެތެވެ.
