އެމްއެންޔޫއިން ފަތުރުވެރިކަމުގެ ދާއިރާއިން މީހުން ބިނާކުރުމުގެ އެއްބަސްވުމެއްގައި ސޮއިކޮށްފި
އިންޓަރންޝިޕް ފުރިހަމަ ކުރުމުގެ ފުރުސަތު ލިބޭނެ
ފަތުރުވެރިކަމުގެ ދާއިރާއިން މީހުން ބިނާކުރުން
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްއާއި ފަތުރުވެރިކަމުގެ ދާއިރާއާ އޮންނަ ގުޅުން ބަދަހިކޮށް މީހުން ބިނާކުރުމުގެ އެއްބަސްވުމެއްގައި އެމްއެންޔޫއާއި ކޮންސްޓަންސް ރިޒޯޓްސް މޯލްޑިވްސް ސޮއިކޮށްފިއެވެ.
މިއެއްބަސްވުމުގައި ސޮއިކޮށްފައިވަނީ ބުރާސްފަތި ދުވަހު ދިވެހިރާއްޖޭގެ ޤައުމީ ޔުނިވަރސިޓީގައެވެ. މިއެއްބަސްވުމުގައި ސޮއިކުރެއްވީ އެމްއެންޔޫގެ ވައިސް ޗާންސެލަރ، ޑރ. މުޙައްމަދު ޝަރީފްއާއި ކޮންސްޓަންސް މޫފުށީގެ ޖެނެރަލް މެނޭޖަރ މިސްޓަރ އޮންރީ އާނަލްފީއާއި ކޮންސްޓަންސް ހަލަވެލީގެ ޖެނެރަލް މެނޭޖަރ މިސްޓަރ ޓެންޖީ ލެ ގްރޭންޑްއެވެ.
މިއެއްބަސްވުމުގެ މައިގަނޑު މަގުސަދަކީ އެމްއެންޔޫއާއި ކޮންސްޓަންސް ރިޒޯޓްސް މޯލްޑިވްސްއާ ދެމެދު އޮންނަ ގުޅުން ހަރުދަނާކޮށް ގައުމު ބިނާކުރުމަށް ހެދިފައިވާ ޕްލޭންތަކާއި އެއްހަމައެއްގައި މަސައްކަތްކުރުމެވެ.
މިއެއްބަސްވުމާ ގުޅޭގޮތުން އެމްއެންޔޫއިން ބުނީ މިކަމުގެ ސަބަބުން ދެ މުއައްސަސާގެ ދަރިވަރުންނާއި މުވައްޒަފުންގެ މެދުގައި އިލްމާއި، މަސައްކަތުގެ ތަޖުރިބާއާއި, އިންޓަރންޝިޕް ފުރުސަތާއި ތަފާތު ފަންނީ މަސައްކަތްތައް ކުރިއަށް ގެންދިޔުމުގެ މަގު ފަހިވެގެންދާނެ ކަމަށެވެ. އަދި އިންޓަރންޝިޕް ނިންމާ ދަރިވަރުންނަށް ވަޒީފާގެ ފުރުސަތު ވެސް މި ރިޒޯޓްތަކުން ފޯރުކޮށް ދިނުމަށް ހަމަޖެހިފައިވާ ކަމަށް އެމްއެންޔޫއިން ބުނެއެވެ.
މީގެ އިތުރަށް އެމްއެންޔޫއިން ބުނީ މިއެއްބަސްވުމުގެ ސަބަބުން ދެ މުއައްސަސާގެ މަސައްކަތުގެ ފެންވަރު ރަނގަޅުވެ ކުރިއެރުމުގެ ފުރުސަތުތައް ހުޅުވިގެންދާނެ ކަމަށެވެ. އޭގެ ސަބަބުން ފަތުރުވެރިކަމުގެ ދާއިރާއާއި ތައުލީމީ ދާއިރާގެ ހަރަކާތްތަކަށް އެދެވޭ، ރަނގަޅު ބަދަލުތަކެއް ލިބިގެންދާނެ ކަމަށް އެމްއެންޔޫއިން ބުނެއެވެ.
1975 ވަނަ އަހަރުން ފެށިގެން ފަތުރުވެރިކަމުގެ ދާއިރާއަށް ތައާރަފްވި ކޮންސްޓަންސް ގްރޫޕުން ރާއްޖޭގައި ހަރަކާތްތެރިވާން ފެށީ 2009 ވަނަ އަހަރު ކޮންސްޓަންސް ހަލަވެލި ރިޒޯޓާއެކުއެވެ. އެއަށްފަހު ޖެހިގެން އައި އަހަރު، ކޮންސްޓަންސް މޫފުށިވެސް ރާއްޖޭގައި ހުޅުވުނެވެ. ލަގްޒަރީ ރިޒޯޓް ޗެއިންއެއްގެ ހައިސިއްޔަތުން، ކޮންސްޓަންސް ގްރޫޕުން އަންނަނީ ރާއްޖޭގެ އިތުރުން، މަޑަގަސްކާރ، މޮރިޝަސް އަދި ސީޝެލްސްގައި 7 ރިޒޯޓު ހިންގަމުންނެވެ.
