ރާއްޖޭގެ އެންމެ އުތުރުން އިހަވަންދިއްޕޮޅުގައި ބައިނަލްއަގްވާމީ ކޮންޓެއިނަރ ޓްރާންސްޝިޕްމެންޓް ބަނދަރެއް ޕްރައިވެޓް ޕާޓްނަރޝިޕްގެ އުސޫލުން ތަރައްގީކުރުމަށް ފެށި ޕްރޮޖެކްޓު ކުރިއަށް ގެންދެވޭނެ އިތުރު ގޮތްތަކެއް ހޯދަމުންދާކަމަށް ސަރުކާރުން ބުނެފިއެވެ.

"ރާއްޖެއެމްވީ" އަށް އެނގިފައިވާ ގޮތުގައި މި މަސައްކަތުގެ ފީސިބިލިޓީ އާއި ކޮންސެޕްޓް ޕްލޭން އެކުލަވާލައި، އޭރު މި މަސައްކަތުގެ ކޮންސަލްޓެންސީ އެއްބަސްވުމުގައި ނެދަރލެންޑްސްގެ އެމް.ޓީ.ބީ.އެސް އަދި ޑެންމާރކްގެ ނީރާސްގެ ޖޮއިންޓްވެންޗަރ އާއި 860،626 (އައްލައްކަ ފަސްދޮޅަސް ހާސް ހަސަތޭކަ ސައްބީސް) އެމެރިކާ ޑޮލަރަށް ސޮއިކޮށްފައިވެއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ އެދުމުގެ މަތިން ރާއްޖޭގެ އުތުރުގައި މި ޕޯޓް ތަރައްގީކުރުމަށް "އެކްސްޕްރެޝަން އޮފް އިންޓްރެސްޓް" (އީއޯއައި) ހުށަހެޅުމުގެ ދައުވަތު އެކަމަށް ޝަރުތުހަމަވާ ހުރިހާ ފަރާތްތަކަށް ފިނޭންސް މިނިސްޓްރީން ހުޅުވާލީ މި އަހަރުގެ މާރޗު މަހުއެވެ. މި މަސައްކަތުގެ އީއޯއައި ހުށަހެޅުމަށް ފުރުސަތު ހުުޅުވާލުމުން 6 ފަރާތަކުން ވަނީ ޝައުޤުވެރިކަން ފާޅުކޮށްފައެވެ. އެހެންނަމަވެސް، މި ޕްރޮޖެކްޓް ހިންގުމަށްޓަކައި ޝަރުތު ހަމަވާ ފަރާތެއް ހޯދުމަށް ކުރިއަށް ގެންދިޔަ އިވެލުއޭޝަނުން އެއްވެސް ފަރާތެއް ފާސްވެފައި ނުވާކަން ރާއްޖެއެމްވީއަށް ވަނީ މައުލޫމާތު ލިބިފައެވެ. ވުމާއެކު އެ މިނިސްޓްރީން ވަނީ މި ޕްރޮޖެކްޓުގެ އީއޯއައި ޕްރޮސެސް މަޑު ޖައްސާލާފައެވެ.

މައުލޫމާތު ލިބޭ ގޮތުގައި ސަރުކާރުން މިހާރު ގެންދަނީ މި ޕްރޮޖެކްޓު ކުރިއަށް ގެންދެވިދާނެ އިތުރު ގޮތްތަކެއް ހޯދުމުގެ މަސައްކަތް ކުރަމުންނެވެ.

މީގެ ކުރިން އިކޮނޮމިކް މިނިސްޓަރު ފައްޔާޒް އިސްމާއިލްވަނީ ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީ ނުކުރެވި މިހާރު މާ ލަސްވެއްޖެ ކަމަށް ވިދާޅުވެފައެވެ. މިނިސްޓަރު ފައްޔާޒު ވަނީ ރާއްޖޭގައި ޓްރާންސްޝިޕްމަންޓް ޕޯޓެއް ތަރައްގީކުރުމަށް ދިރާސާތައް ހަދައި ނިމިފައިވާކަމަށް ވިދާޅުވެ، މި މަޝްރޫއުގެ މުހިއްމުކަން ފާހަގަކުރައްވާފައެވެ.

މި މަޝްރޫއުއަށް 466 މިލިޔަން ޑޮލަރުގެ އިންވެސްޓްމަންޓެއް ބޭނުންވާނެކަމަށް އަންދާޒާ ކުރެވޭކަމަށް އިކޮނޮމިކް މިނިސްޓްރީން ބުނެފައިވެއެވެ.

ސަރުކާރުގެ އަމާޒަކީ މި ޕްރޮޖެކްޓުގެ ދަށުން ރާއްޖޭގެ އިޤްތިޞާދު ޑައިވަރސިފައި ކުރެވި، ދިގު މުއްދަތަކަށް ދެމިގެންދާނެ އިންގިލާބީ ހެޔޮ ބަދަލުތަކެއް އިޤްތިޞާދަށް ގެނައުމެވެ. އަދި މާލެ ސަރަހައްދު ނޫން އެހެނިހެން ސަރަހައްދުތައް ވެސް ތަރައްޤީވުމަށް މަގުފަހިވެ، ވަޒީފާގެ ފުރުސަތުތައް އިތުރުވެ، ރައްޔިތުންގެ ދިރިއުޅުމުގެ ފެންވަރަށް އެދެވޭ ހެޔޮ ބަދަލުތައް އައުމަކީ ވެސް މި ޕްރޮޖެކްޓުގެ އަމާޒެއްކަމަށް ސަރުކާރުން ބުނެފައިވެއެވެ.