ޓްރާންސްޝިޕްމަންޓް ބަނދަރު ހެދުމަށް އަންނަ އަހަރު ބިން ހިއްކުމުގެ މަސައްކަތް ފަށާނެ ކަމަށް ލަފާ ކުރެވޭ: އެމްޕީއެލްގެ ޗެއާމަން
މިހާރު ވެސް ބޭރުގެ ޝިޕިންގް ލައިންތަކާއެކު ކާގޯ ހޯދުމުގެ މަޝްވަރާތައް ކުރަމުންދަނީ
މޯލްޑިވްސް ޕޯޓްސް ލިމިޓެޑްގެ ޗެއާމަން މުހައްމަދު ޝަރީފު (ސެންކޯ)
އިހަވަންދިއްޕޮޅުގައި ތަރައްގީކުރުމަށް ހަމަޖެހިފައިވާ ޓްރާންސްޝިޕްމަންޓް ބަނދަރު ހެދުމަށް އަންނަ އަހަރުގެ ޖެނުއަރީ މަހު ބިން ހިއްކުމުގެ މަސައްކަތް ފަށާނެ ކަމަށް ލަފާ ކުރެވޭ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޗެއާމަން މުހައްމަދު ޝަރީފު (ސެންކޯ) ވިދާޅުވެއްޖެއެވެ.
ޝަރީފު ވިދާޅުވީ ޓްރާންސްޝިޕްމަންޓް ބަނދަރަކީ ތިން ބިލިއަން ޑޮލަރު ހޭދަވާނެ މަސައްކަތެއް ކަމަށާއި މި ސަރުކާރުން ވިސްނީ އެހާ ބޮޑު ލޯނެއް ނަގައިގެން އެ މަސައްކަތް ކުރުމުން ފައިދާ ނުވާނެ ކަމަށެވެ.
އެހެންކަމުން ސަރުކާރު ހިއްސާވާ ކުންފުނިތައް ހިމަނައިގެން މި މަސައްކަތް ކުރިއަށް ގެންދިޔުމަށް ނިންމި ކަމަށާއި އެގޮތުން އެޗްޑީސީ، އެމްޓީސީސީ، އެސްޓީއޯ އާއި އެމްޕީއެލް އާއި އިކޮނޮމިކް މިނިސްޓްރީން އުފައްދާފައިވާ ކުންފުންޏެއް ވެސް ކޮންސަލްޓް ފާމް ހެދުމަށް ހިމެނޭ ކަމަށެވެ.
އެ ކުންފުނި ރަޖިސްޓްރީ ކުރުމުގެ މަސައްކަތް ކުރިއަށްދާކަން ފާހަގަކުރައްވާ ޝަރީފު ވިދާޅުވީ ކޮންސަލްޓް ޓީމްގެ ތެރެއިން ހުރިހާ މަސައްކަތެއް ކުރެވޭނެ ކަމަށެވެ. އަދި ސަރުކާރު ހިއްސާވާ ކުންފުނިތަކަކީ މިހާރު ވެސް އެކި މަރުހަލާތަކުގައި އެކި ކަހަލަ މަސައްކަތްތައް ކުރަމުންދާ ކުންފުނިތަކެއްކަން ފާހަގަކުރެއްވިއެވެ.
މިހާރު ވެސް ބޭރުގެ ޝިޕިންގް ލައިންތަކާއެކު ކާގޯ ހޯދުމުގެ މަޝްވަރާތައް ކުރަމުންދާ ކަމަށް ޝަރީފު ވިދާޅުވިއެވެ. އިހަވަންދިއްޕޮޅުގައި ތަރައްގީކުރުމަށް ހަމަޖެހިފައިވާ ޓްރާންސްޝިޕްމަންޓް ބަނދަރާއެކު އުތުރުގައި އެކި ސިނާއަތްތައް ކުރިއަރައި, ގިނަ އަދަދެއްގެ ވަޒީފާގެ ފުރުސަތުތައް ފަހިވެގެންދާނެ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވެސް ވަނީ ވިދާޅުވެފައެވެ.
މި މަޝްރޫއަކީ ރާއްޖެއަށް، އަދި ޚާއްސަކޮށް އުތުރުގައި އިތުރު ސިނާއަތްތައް އުފެދޭނެ މަޝްރޫއެއްކަން ފާހަގަކުރައްވައި ފައްޔާޒު ވިދާޅުވީ، އެންމެ ރަނގަޅު ގޮތަކަށް ބޮޑު ސިނާއަތެއް ގާއިމްކުރެވޭނެ ގޮތްތައް ބައްލަވަމުން ގެންދަވާ ކަމަށެވެ. އަދި ޓްރާންސްޝިޕްމަންޓް ބަނދަރާއެކު އުފެދޭ ސިނާއަތްތަކަކީ މުސްތަގުބަލުގައި ފައިދާކުރާނެ ސިނާއަތްތައް ކަމަށް އޭނާ ވިދާޅުވިއެވެ.
މި މަޝްރޫއު ހިންގުމަށް އިހަވަންދިއްޕޮޅު ޚިޔާރުކުރި ސަބަބު ހާމަކުރައްވައި ފައްޔާޒު ވިދާޅުވީ، އެއީ އިހަވަންދިއްޕޮޅަކީ ދުނިޔޭގެ އިރުމަތީ ބިތުން ފެށިގެން ހުޅަނގަށް ބޯޓުފަހަރު ދަތުރުކުރާ މައިގަނޑު ޝިޕިންގ ރޫޓްތަކާ ވަރަށް ކައިރި ސަރަހައްދެއް ކަމަށްވާތީ ކަމަށެވެ. އަދި އެ ސަރަހައްދަކީ މިފަދަ ބަނދަރެއް ގާއިމްކުރުމަށް އެކަށީގެންވާ ސަރަހައްދެއްކަމުގައި ދިރާސާތަކުން ދައްކާކަމަށްވެސް އޭނާ ވިދާޅުވިއެވެ.
ފައްޔާޒު ވަނީ މިއީ މުޅި ރާއްޖޭގެ އިގްތިސާދަށް ވެސް ފައިދާ ކުރާނެ ޕްރޮޖެކްޓެއްކަމަށާއި މީގެ ސަބަބުން އުތުރުގައި އިގްތިސާދީ ވަރުގަދަ ހަބެއް ގާއިމުވެގެންދާނެކަން ފާހަގަކުރައްވާފައެވެ.
