އަލީ ވަހީދުގެ ޝަރީޢަތް ސިއްރުކޮށްފި
އަލީ ވަހީދު ހައްޔަރު ކޮށްފައިވަނީ ބުދަ ދުވަހު ޔޫކޭއިން
އަލީ ވަހީދު - ކުރީގެ ޓޫރިޒަމް މިނިސްޓަރ
ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންދިޔުމަށް ތާވަލްކުރި އަލީ ވަހީދުގެ ޝަރީޢަތުގެ އަޑު އެހުން ސިއްރުކޮށްފިއެވެ.
އަލީ ވަހީދުގެ މައްޗަށް ކްރިމިނަލް ކޯޓުގައި ދައުވާ އުފުލާފައިވަނީ ޓޫރިޒަމް މިނިސްޓަރު ކަމުގައި ހުންނަވައިގެން އެ މިނިސްޓްރީގެ އަންހެން މުވައްޒަފުން ތަކަކަށް ޖިންސީ ގޯނާ ކުރި މައްސަލައިގައެވެ. މި މައްސަލައިގައި އަލީ ވަހީދުގެ މައްޗަށް 7 ދައުވާއެއް އުފުލާފައިވެއެވެ. ކްރިމިނަލް ކޯޓުން ބުނީ މައްސަލައިގެ ބާވަތުން ބުރާސްފަތި ދުވަހުގެ އަޑުއެހުން ސިއްރުކުރެވިފައިވާ ކަމަށެވެ.
ކޯޓުތަކަށް ފިއްލަވައިގެން އިނގިރޭސި ވިލާތުގައި ހުންނަވަނިކޮށް އަލީ ވަހީދު ހައްޔަރު ކުރީ، ބުދަ ދުވަހުގެ ވަގުތެއްގައެވެ. އަލީ ވަހީދު ހައްޔަރު ކުރީ ވިސާ ހަމަވެފައިވާތީ ކަމަށް މައުލޫމާތު ލިބެއެވެ. އަލީ ވަހީދުގެ ވިސާ ހަމަވެފައިވަނީ، މި މަހުގެ 10 ވަނަ ދުވަހުއެވެ. މިހާރު ހުންނެވީ ޑިޓެންޝަން ސެންޓަރެއްގައި ކަމަށް ވެސް މައުލޫމާތު ލިބެއެވެ.
އަލީ ވަހީދު ހައްޔަަރު ކުރީ ރާއްޖޭގެ ބައެއް މީޑިއާތަކާއެކު ޕްރެސް ކޮންފަރެންސެއް ބާއްވަން ތައްޔާރުވެވަޑައިގެން އިންނަަވަނިކޮށެވެ. އެހެންނަަވެސް ފުލުހުން ބުނެފައިވަނީ މިކަމާ ގުޅޭ މައުލޫމާތު ލިބިފައި ނުވާ ކަަމަށެވެ. ކޯޓުގެ ހުރުމަތް ކެނޑިކަމުގެ ކުށުގައި އަލީ ވަހީދުގެ މައްޗަށް އިއްވާފައިވާ 2 މަހާއި 12 ދުވަހުގެ ހުކުމް ތަންފީޒުކުރުމަށް އޭނާ މާލެ ގެނައުމަށް އިންޓަރ ޕޯލްގެ އެހީތެރިކަމަށް ރާއްޖެއިން ވަނީ އެދިފައެވެ.
އަލީ ވަހީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށްޓަކައި، އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީއަތް ފެށުނު އިރު ވެސް އަލީ ވަހީދު އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.
ޕާސް ޕޯޓު ދޫކުރި މައްސަލަ ދައުލަތުން ހައިކޯޓާއި ސުޕްރީމް ކޯޓުގައި ވެސް އިސްތިއުނާފުކުރިއެވެ. ނަމަވެސް، އަލީ ވަހީދު އުޅޭ އެޑްރެސް ނޭނގޭ ކަމަށް ބުނެ، ޗިޓް ނުފޮނުވިގެން އޭނާގެ ޕާސްޕޯޓް ހިފަހައްޓައިދޭން ހައިކޯޓަށާއި ސުޕްރީމް ކޯޓަށް ހުށަހެޅި މައްސަލަ ވެސް ވަނީ ބޭރު ކޮށްލާފައެވެ. އަލީ ވަހީދުގެ ޕާސްޕޯޓް ހިފަހައްޓަން ކުރިމިނަލް ކޯޓުގައި އެދުމުން އެ އަމުރު ނެރެނުދިން މައްސަލަ ޕީޖީން ހައި ކޯޓަށް ހުށަހެޅިއެވެ. އެހެންނަމަވެސް، އަލީ ވަހީދުގެ ޣައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ބުނެ، ހައި ކޯޓުން މައްސަލަ ބަލައިގެންފައެއް ނުވެއެވެ.
ހައިކޯޓުގެ ރެޖިސްޓްރާގެ އެ ނިންމުން ރިވިއުކޮށްދޭން 10 އޮގަސްޓްވީ އަންގާރަ ދުވަހު ޕްރޮސިކިއުޓާ ޖެނަރަލްގެ ފަރާތުން ވަނީ އަނެއްކާވެސް އެ މައްސަލަ ހައި ކޯޓުގެ ފަނޑިޔާރުންގެ ބެންޗަށް ހުށަހަޅާފައެވެ.
