13 އަހަރުގެ ކުއްޖާގެ މަރުގެ މައްސަލައިގެ ޝަރީއަތް ބުރާސްފަތި ދުވަހު
އަޑުއެހުން ތާވަލް ކޮށްފައިވަނީ ބުރާސްފަތި ދުވަހުގެ 11:00ށް
ކްރިމިނަލް ކޯޓް - މި މައްސަލައިގެ ދައުވާ އުފުލާފައިވަނީ 2 މީހެއްގެ މައްޗަށް
ހުޅުމާލޭގެ ދެވަނަ ފިޔަވަހީގައި އުމުރުން 13 އަހަރުގެ ކުޑަ ފިރިހެން ކުއްޖަކު ރަހީނުކޮށް މަރާލި މައްސަލައިގައި މަރުގެ ދައުވާ އުފުލާފައިވާ ނ. ލަންދޫ، ބަގީޗާގޭ އުމުރުން 27 އަހަރުގެ އިބްރާހިމް ޒިހާންގެ ޝަރީއަތް މާދަމާ ފަށަން ކްރިމިނަލް ކޯޓުގައި ތާވަލު ކޮށްފިއެވެ.
އަޑުއެހުން ތާވަލް ކޮށްފައިވަނީ ބުރާސްފަތި ދުވަހުގެ 11:00ށެވެ. މިއީ މި މައްސަލައިގެ ފުރަތަމަ އަޑުއެހުމެވެ.
އުމުރުން 13 އަހަރުގެ ކުއްޖާގެ މަރާ ގުޅިގެން ދައުވާ އުފުލާފައިވަނީ އިބްރާހިމް ޒިހާންގެ އިތުރުން 17 އަހަރުގެ ފިރިހެން ކުއްޖެއްގެ މައްޗަށެވެ. ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލާފައިވާއިރު މި ދައުވާތައް ސާބިތު ވެއްޖެނަމަ 100 ވަރަކަށް އަހަރުގެ ޖަލު ހުކުމެއް އަންނާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވަނީ ވިދާޅުވެފައެވެ. ޕީޖީ ވިދާޅުވެފައިވަނީ، ދައުވާ ސަބިތުކުރެވޭ ވަރަށް ހެކި އެބަހުރި ކަމަށެވެ.
ޒިހާންގެ މައްޗަށް އުފުލާފައިވާ ދައުވާތަކުގެ ތެރޭގައި:
ގަސްތުގައި މީހަކު މެރުން
މަސްތުވާތަކެތި ދީގެން ޖިންސީ އަމަލު ހިންގަން އުޅުން
ގްރޫމްކުރުން
މައްޔިތާގެ ބޭނުން ނަހަމަގޮތުގައި ހިފުން
ހުއްދަ ނޫން ގޮތެއްގައި ހިފެހެއްޓުން
ޖިނާއީ ކުށެއްގައި ކުޑަކުއްޖަކު ބޭނުންކުރުން
ޖިންސީ ނިޔަތެއް އޮވެގެން އަތްލުމުގެ ފަސް ދައުވާ
ކުޑަކުދިންނަށް ޖިންސީ ގޯނާކުރުމުގެ އިތުރު ދައުވާތަކެއް
ކުޑަކުއްޖާގެ މައްޗަށް އުފުލި ދައުވާތަކުގެ ތެރޭގައި:
ގަސްތުގައި މީހަކު މެރުން
ހުއްދަ ނޫން ގޮތެއްގައި ހިފެހެއްޓުން
މައްޔިތާގެ ބޭނުން ނަހަމަ ގޮތެއްގައި ހިފުން
ކުޑަ ކުއްޖާ މަރާލުމަށްފަހު ފޮއްޓަކަށް ލާފައި އޮއްވައި ފެނުނީ ހުޅުމާލޭ ދެވަނަ ފިޔަވަހީގެ މޫދުންނެވެ. އެ ކުއްޖާގެ ހަށިގަނޑު ފެނިފައިވަނީ މިދިޔަ ޖޫން މަހުގެ 21 ވަނަ ދުވަހުގެރޭ ދަންވަރުގެ ވަގުތެއްގައެވެ. މި މައްސަލައިގެ ދައުވާ އުފުލާފައިވަނީ އޮގަސްޓު މަހުގ 19ވަނަ ދުވަހުއެވެ.
13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ފޮނުވީ ޖުލައި 5 ވަނަ ދުވަހުއެވެ. ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ ޖުލައި 12 ވަނަ ދުވަހުއެވެ.
