ޠާލިބާން ޖަމާޢަތް ބަލައެއް ނުގަންނަން، އެޖަމާޢަތާއެކު ވާހަކައެއް ނުދައްކާނަން: އީޔޫ

ޔޫރަޕިއަން ޔޫނިއަން (އީޔޫ)ން, އަފްޣާނިސްތާނުގެ ކޮންޓްރޯލް މިހާރު ހޯދާފައިވާ ޠާލިބާން ޖަމާޢަތް ބަލައިނުގަންނަކަމަށާއި އެއްވެސް ބާވަތެއްގެ ސިޔާސީ ވާހަކަތަކެއް އެޖަމާޢަތާއެކު ކުރިޔަށް ނުގެންދާނެކަމަށް އީޔޫ ކޮމިޝަންގެ ރައީސް އުސުލާ ވޮން ޑެރ ލަޔެން ވިދާޅުވެއްޖެއެވެ.

ޠާލިބާނުން ވަނީ އެއްވެސް ހަމަނުޖެހުމެއް ނުހިންގައި, ކާބުލް އެމީހުންގެ ބާރުގެ ދަށަށް ގެނެސްފައެވެ. އަދި އެއާއެކު މިހާރު މަސައްކަތްކުރަމުންދަނީ އަފްޣާނިސްތާނުގައި އައު ސަރުކާރެއް އެކުލަވާލުމުގެ މަސައްކަތެވެ.

އީޔޫގެ ރައީސް ވިދާޅުވީ އަފްޣާނިސްތާނުގެ އިންސާނީ އެހީތެރިކަމަށް 67 މިލިއަން ޑޮލަރު މިއަހަރު ތެރޭގައި އިތުރަށް ކަނޑައެޅުމަށް ހުށަހަޅުއްވާނެކަމަށެވެ. އަދި އީޔޫގެ އެހީތެރިކަން ލިބޭނީ އިންސާނީ ޙައްޤުތަކަށް އިޙްތިރާމްކޮށް، އަންހެނުންނާއި އަންހެން ކުދިންގެ ޙައްޤުތަކަށް ރައްކާތެރިވެ، މުޖުތަމަޢުގައި ދިރިއުޅޭ މައިނޯރިޓީ ނަސްލުތަކަށް އިޙްތިރާމް ކުރާނަމަ ކަމަށެވެ.

"ޠާލިބާނުން ދައްކަމުންދާ ވާހަކަތައް އަހަރުމެން އެންމެންނަށްވެސް އިވޭ. ނަމަވެސް އަހަރުމެން ބަލާނީ ޠާލިބާންގެ ޢަމަލުތައް ހުންނަނީ ކޮންގޮތަކަށްތޯ." އީޔޫ ކޮމިޝަންގެ ރައީސް ވިދާޅުވިއެވެ.

އުސުލާ އިތުރަށް ވިދާޅުވީ އަފްޣާނިސްތާނުގެ ރެފިޔުޖީންނަށް އެހީތެރިކަން ފޯރުކޮށްދޭ ގައުމުތަކަށް އީޔޫން އެހީތެރިކަން ފޯރުކޮށްދޭނެކަމަށެވެ. އެގޮތުން ފަންޑެއް މެދުވެރިކޮށް އެހީތެރިކަން ފޯރުކޮށްދިނުމަށް ވިސްނަވާ ކަމަށާއި އެކަމަށް ކުރިޔަށް އޮތް ޖީ7ގެ ބައްދަލުވުމުގައި އަލިއަޅުވާލައްވާނެ ކަމަށެވެ.