ޠާލިބާން ހަނގުރާމަވެރިން ކާބުލްއަށް ވަދެއްޖެ

ޠާލިބާންގެ ހަނގުރާމަވެރިން، އަފްޣާނިސްތާނުގެ ވެރިރަށް ކާބުލްއަށް ވަދެއްޖެއެވެ.

މީޑިއާތަކުން ރިޕޯޓުކޮށްފައިވާ ގޮތުގައި، ޠާލިބާން ހަނގުރާމަވެރިން ކާބުލްގެ މަގުތަކުގައި، ސަރުކާރުގެ ސިފައިންނަށް ހަމަލާތައް ދޭން ވަނީ ފަށާފައެވެ.

ޠާލިބާނުންގެ ލީޑަރު ވަނީ، ކާބުލް ދޫކޮށް ދާން ބޭނުންވާ ހުރިހާ ފަރާތްތަކަށް އެފުރުސަތު ފަހިކޮށް ދިނުމަށް ހަނގުރާމަވެރިންނަށް އަންގާފައިވާ ކަމަށް ބުނެފައެވެ. އަދި، އެއްވެސް ހަމަނުޖެހުމަކަށް ޖާގަ ނުދިނުމަށާއި، ގަދަ ބާރުން އެސިޓީ ހިފުމަށް ނިންމާފައި ނުވާކަމަށް ވެސް ޠާލިބާނުންގެ ލީޑަރޝިޕާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.

ސަރުކާރުގެ އިސް އޮފިޝަލުން ބައެއް މީޑިއާތަކަށް މައުލުމާތު ދީފައިވާ ގޮތުގައި، ޠާލިބާނުންގެ ހަނގުރާމަވެރިން ވަނީ ކާބުލް ވަށާލާފައެވެ. އަފްޣާނިސްތާނުގެ ރައީސް އަސްރަފް ޢަނީގެ ސަރުކާރުން، ވެރިރަށް ކާބުލް ހިމާޔަތްކުރުމަށް ރައްދުގައި ހަމަލާ ދޭނެކަމެއް އަދި ހާމަކޮށްފައެއް ނުވެއެވެ.

ކާބުލްއަށް ޠާލިބާން ހަނގުރާމަވެރިން ވަދެފައިވާއިރު، އާދީއްތަ ދުވަހު ގަތަރުގެ ދޯހާގައި ތިބި، ޠާލިބާންގެ ލީޑަރޝިޕްއިން ވަނީ، އެ ސިޓީ ގަދަބާރުން ހިފުމަށް ނިންމާފައި ނުވާކަން ހާމަކޮށް ބަޔާނެއް ވެސް ނެރެފައެވެ. އަދި، ކާބުލްގެ ގޭޓުތައް ފަހަނައަޅައި ކުރިޔަށް ނުޖެހުމަށް، ހަނގުރާމަވެރިންނަށް އިރުޝާދު ދީފައިވާ ކަމަށް ވެސް މި ބަޔާނުގައި ބުނެފައިވެއެވެ.

ބޭންކުތަކާއި، ފިހާރަތަކާއި، ވިޔަފާރިވެރިންނަށް ވެސް އެމީހުންގެ ފައިސާއާއި މުދާ ހަނގުރާމަވެރިން ފޭރި ނުގަންނާނެކަން ޔަގީން ކޮށްދިނުމުގެ ގޮތުން، ޠާލިބާނުން ވަނީ އިތުރު ބަޔާނެއް ވެސް ނެރެފައެވެ.

އެމެރިކާއިން ވަނީ ކާބުލްގައި ތިބި އެގައުމުގެ ސިފައި ބޭލުމަށް ހެލިކޮޕްޓަރުތަކުގައި މަސައްކަތް ފަށާފައެވެ.