އެމެރިކާ އާއި އަފްޣާނިސްތާނުގެ ޠާލިބާން ޖަމާއަތާއި ދެމެދު ކުރިއަށް ގެންދާ ސުލްހައިގެ ވާހަކަތަކުގެ އައު ބުރެއް ފަށަން ތައްޔާރުވެފައިވާ ކަމަށް އެ ޖަމާއަތުން ބުނެފިއެވެ.

ޠާލިބާނުގެ ތަރުޖަމާނެއް ކަމަށްވާ ޒަބިއުﷲ މުޖާހިދު، އޭއެފްޕީއަށް ވިދާޅުވި، ޠާލިބާނާއި އެމެރިކާއާ ދެމެދު ކުރިއަށްދާ ސުލްހައިގެ ވާހަކަތަކުގެ ހަވަނަ ބުރު ގަތަރުގެ ވެރިރަށް ދޯހާގައި ފެށުމަށް ތައްޔާރުވަމުންދާ ކަމަށެވެ.

ސުލްހައިގެ ވާހަކަތަކުގެ އައު ބުރާ ގުޅޭ ގޮތުން ކާބުލްގައި ހުންނަ އެމެރިކާގެ އެމްބަސީން މިހާތަނަށް އެއްޗެއް ބުނެފައި ނުވާއިރު، އެމެރިކާއިން ކަނޑައަޅާފައިވާ އަފްޣާނިސްތާން ޕީސް އެންވޯއީ، ޒަލްމޭ ޚަލީލްޒާދް، ޠާލިބާނާ އެކު މަޝްވަރާތައް ބޭއްވުމަށް މި މަހު ދޯހާއަށް ވަޑައިގަންނަވާނެ ކަމަށް އެމެރިކާގެ ސްޓޭޓް ޑިޕާޓްމަންޓުން ކުރިން ވަނީ ބުނެފައެވެ.

އެމެރިކާ އާއި ޠާލިބާނުގެ ސުލްހައިގެ ވާހަކަތައް ދޯހާގައި ބާއްވާއިރު، އެމެރިކާގެ އެދުމުގެ މަތިން ޤަތަރުން ވަނީ ޠާލިބާނުގެ ސިޔާސީ އޮފީސް އެ ޤައުމުގައި ޤާއިމްކޮށްދީފައެވެ.

މި އަހަރުގެ ފެބްރުއަރީ މަހާއި މާރޗު މަހާ ދެމެދު 11 ދުވަހަށް ކުރިއަށްދިޔަ ސުލްހައިގެ ވާހަކަތަކުގެ ފަސް ވަނަ ބުރު ނިމިގެން ގޮސްފައިވަނީ އެއްވެސް ކާމިޔާބެއް ނުލިބިއެވެ.

އަފްޣާނު ހަނގުރާމަ ނިމުމަކަށް ގެނައިމުގެ މަޤުސަދުގައި ކުރިއަށްގެންދާ މި މަޝްވަރާތަކުގައި ކުރިން ބޭއްވުނު ބައްދަލުވުންތަކުގައި ދެ ފަރާތުން ވަނީ ސުލްހަ ޤާއިމް ކުރުމަށް ޑްރާފްޓް ފްރޭމްވަރކްއަކަށް އެއްބަސްވެފައެވެ. އެ ފްރޭމްވަރކްގައި ވާ ކަންތައްތަކުގެ ތެރޭގައި އެމެރިކާގެ ސިފައިން އަފްޣާނިސްތާނުން ބޭލުމަށް އެމެރިކާއިން ވާހަކަ ދައްކާފައިވާއިރު، އަފްޣާނިސްތާނުގެ ބިންތަކުގައި ޓެރަރިސްޓް ޖަމާއަތްތައް ހަރަކާތްތެރިވިޔަ ނުދިނުމަށް ޠާލިބާނުގެ އެއްބާރުލުން ހޯދުމަށް ވެސް ވަނީ މަޝްވަރާކޮށްފައެވެ.

އެމެރިކާގެ ގިނަ އަދަދެއްގެ ސިފައިން އަފްޣާނިސްތާނުގައި ހަރަކާތްތެރިވެފައިވާއިރު، މިހާރު ވެސް އެ ޤައުމުގައި އެމެރިކާގެ 14000 ސިފައިން އެބަތިއްބެވެ.

ނިމިގެންދިޔަ އަހަރުގެ ޖުލައި މަހު އެމެރިކާ އާއި ޠާލިބާނާ ދެމެދު ފެށި ވާހަކަތަކުގެ އެއްވެސް ބުރެއްގައި، ޠާލިބާނުން ގޮނޑިކޮއްކޮ ސަރުކާރެއްގެ ގޮތުގައި ދެކޭ އަފްޣާން ސަރުކާރު ބައިވެރިކޮށްފައެއް ނުވެއެވެ. އެހެންކަމުން، އެމެރިކާ އާއި ޠާލިބާނާ ދެމެދު އެއްބަސްވުމަކަށް އާދެވި، 17 އަހަރުވީ ހަނގުރާމަ ނިމުމަކަށް އައިސް، އަފްޣާނުން އެމެރިކާ ސިފައިން ފޭބުމަށް ތާވަލެއް އެކުލަވާލެވުނު ނަމަވެސް، ހަޤީޤީ ނަތީޖާއެއް ނެރެވޭނީ ޠާލިބާނާއި އަފްޣާނުގެ ސިޔާސީ ފަރާތްތައް، އަދި ގަބީލާތަކުގެ ވެރިންގެ މެދުގައި އެއްބަސްވުންތަކެއް ވެގެންނެވެ.

ޖުލައި މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ދެވަނަ ދައުރަކަށް އިންތިޚާބުވެވަޑައިގަތުމަށް މަސައްކަތް ކުރައްވަމުން ގެންދަވާ އަޝްރަފް ޣަނީ، މިހާތަނަށް ސުލްހައަށް ކުރެވޭ މަސައްކަތްތަކުން އެއްފަރާތް ކޮށްފައި ހުރި ނަމަވެސް، މި ހަފްތާގައި އެމަނިކުފާނު ވަނީ އަފްޣާނުގެ ސިޔާސީ ލީޑަރުންނާއި، ގަބީލާތަކުގެ ވެރިންނާއި، ދީނީ ލީޑަރުން ހިމަނައިގެން ޠާލިބާން ޖަމާއަތާ އެކު ސުލްހައިގެ މަޝްވަރާތައް ކުރުމަށް ކައުންސިލެއް އުފައްދަވާފައެވެ.

އެމެރިކާ އިން 2001 ވަނަ އަހަރު އަފްޣާނިސްތާނަށް އަރައި، ތާލިބާނުގެ ވެރިކަން ވައްޓާލުމުން ފެށުނު ހަނގުރާމައިގައި މިހާތަނަށް 32000 އަށް ވުރެ ގިނަ އާންމުން މަރުވެފައިވާއިރު، 60000 އަށްވުރެ ގިނަ މީހުން ވަނީ ޒަޚަމްވެފައެވެ. އަދި މި ހަނގުރާމައިގައި އަފްގާނުގެ ސަލާމަތީ ބާރުތަކަށް ނިސްބަތްވާ 45000 މީހުން މިހާތަނަށް މަރުވެފައިވާއިރު، މިއީ އެމެރިކާއިން އެންމެ ބޮޑު ޚަރަދެއް ކޮށްފައިވާ އެއް ހަނގުރާމައެވެ.