ހަނގުރާމަ މެދުކަނޑާލަން އެއްބަސްވުމެއް ނުހަދަން – ޠާލިބާން
10 އޯގަސްޓު 2021 | އަންގާރަ 10:49އެމެރިކާ ސިފައިން އަފްޣާނިސްތާނުން ފޭބުމަށްވި އެއްބަސްވުމުގައި ޠާލިބާނުން އަފްޣާނުގައި ކުރަމުންދާ ހަނގުރާމަ މެދުކަނޑާލަން އެއްބަސްވެފައެއް ނުވާނެ
ހަތަރު ދުވަހުގެ ތެރޭގައި އަފްޣާން 6 ސިޓީއެއް ޠާލިބާނުން ވަނީ އެމީހުގެ ބާރުގެ ދަށަށް ގެންގޮސްފައި
ހަނގުރާމަ މެދުކަނޑާލަން އަފްޣާނިސްތާން ސަރުކާރާއެކު އެއްބަސްވުމެއް ހަދާފައެއް ނުވާނެ ކަމަށް ޠާލިބާން ޖަމާޢަތުން ބުނެފިއެވެ.
އަފްޣާނިސްތާނު ސަރުކާރާއި ޠާލިބާން ޖަމާޢަތާ ދެމެދު ހިނގަމުންދާ ހަނގުރާމައިގައި ޠާލިބާނުން ވަނީ އެގައުމުގެ އިތުރު ތިން ސިޓީއެއް ޠާލިބާނުންގެ ބާރުގެ ދަށަށް ގެންގޮސްފައެވެ. އޭގެ ތެރޭގައި އަފްޣާނިސްތާނުގެ އެންމެ މުހިންމު އެއް ސިޓީ ކަމުގައިވާ ކުންޑުޒް ވެސް ހިމެނެއެވެ. މިހާރު ޠާލިބާނުންގެ އަތްދަށަށް ޖުމްލަ ފަސް ސަރަހައްދީ ވެރިރަށް ގެންގޮސްފައިވެއެވެ.
ޠާލިބާނުން ބުނީ އެމެރިކާ ސިފައިން އަފްޣާނިސްތާނުން ފޭބުމަށްވި އެއްބަސްވުމުގައި ޠާލިބާނުން އަފްޣާނުގައި ކުރަމުންދާ ހަނގުރާމަ މެދުކަނޑާލަން އެއްބަސްވެފައެއް ނުވާނެ ކަމަށެވެ. އަދި ކުރިޔަށް އޮތް ދުވަސްތަކުގައި ޠާލިބާނުގެ ހަރަކާތްތައް އިތުރުވާނެ ކަމަށާއި، އަފްޣާނިސްތާނުގައި ހިނގަމުން އަންނަ ކޮރަޕްޝަން ސަރުކާރު ވައްޓާލާނެ ކަމަށް ވެސް ޠާލިބާނުން ބުނެއެވެ.
އަފްޣާނިސްތާނުގެ ގިނަ ސަރަހައްދުތައް ޠާލިބާންގެ އަތްދަށުގައިވާއިރު، އެ ސަރަހައްދުތަކުގައި ދިރިއުޅޭ ރައްޔިތުންނަށް ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން ޖެހިފައެވެ.
