އިނގިރޭސިވިލާތުގައި ކޮވިޑް ފެތުރޭ މިންވަރު ނުވަތަ އާރު ވެލިޔު މައްޗަށް ދާން ފަށާފައިވާކަމަށް އެގައުމުން ހާމަކޮށްފައިވާ ރަސްމީ ތަފާސްހިސާބުތަކުން ދައްކައިފިއެވެ.

އެގޮތުން ހުކުރު ދުވަހު އާންމުކޮށްފައިވާ ތަފާސްހިސާބުތަކަށް ބަލާއިރު އާރު ވެލިޔު ވަނީ 0.9 ން 1.2ށް މައްޗަށް ގޮސްފައެވެ. އޭގެ ކުރީ ހަފުތާގައި އާރު ވެލިޔު މައްޗަށް ގޮސްފައިވަނީ 0.8 ން 1.0 އަށެވެ.

މީގެ މާނައަކީ ކޮވިޑް ޖެހޭ ކޮންމެ 10 މީހެއްގެ ފުށުން އެވްރެޖް ގޮތެއްގައި 9 އަދި 12 މީހުންނަށް ކޮވިޑް ޖެހުމެވެ.

ކޮވިޑް-19 ހަލުވި ކަމާއެކު ފެތުރެމުން އައި އިނގިރޭސިވިލާތުގައި ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް ލުއި ދީފައިވަނީ މިދިޔަ މަހުއެވެ. އޭގެތެރޭގައި މާސްކު އެޅުން މަޖުބޫރުކޮށްފައި އޮތްއޮތުން ނިމުމަކަށް ގެނައުން ހިމެނެއެވެ. މީގެއިތުރުން ހޫނު މޫސުމުގެ ބަންދާ ދިމާކޮށް ޗުއްޓީ ހޭދަކުރުމަށް ދާ މީހުން ކަރަންޓީނުވާން ޖެހޭ މުއްދަތަށްވެސް ވަނީ ލުއިތަކެއް ދީފައެވެ.

މިހާރު އިނގިރޭސިވިލާތުގައި ކޮވިޑް ފެތުރެމުންދާ މިންވަރާއި ގުޅޭގޮތުން އެގައުމުގެ ހެލްތު ސެކިޔުރިޓީ އެޖެންސީން ބުނެފައިވަނީ ކޮވިޑް ފެތުރޭ މިންވަރު ހުރީ މީގެ ދެތިން ހަފުތާ ކުރިން ހުރި ހިސާބުގައި ކަމަށެވެ.