ތައިލެންޑްގައި ކޮވިޑް ޖެހުނު މީހުންގެ އަދަދު މިލިއަނަކަށް، 97 އިންސައްތަ ކޭސް ރިޕޯޓްކޮށްފައިވަނީ ފާއިތުވި 5 މަހު
21 އޯގަސްޓު 2021 | ހޮނިހިރު 01:31ހުކުރު ދުވަހު އެގައުމުގައި 19،851 މީހުންނަށް ކޮވިޑް ޖެހުނުއިރު 240 މީހުން ވަނީ މަރުވެފައި
ތައިލެންޑްގައި ވޮލަންޓިއަރަކު ޕީޕީއީ ލައިގެން
ތައިލެންޑްގައި ކޮވިޑް-19 ޖެހުނު މީހުންގެ އަދަދު 1 މިލިއަނަށް އަރައިފިއެވެ.
ތައިލެންޑްގެ ހެލްތު މިނިސްޓްރީން ހާމަކޮށްފައިވާ ގޮތުގައި ތައިލެންޑްގައި ކޮވިޑް ޖެހުނު މީހުންގެ އަދަދު މިލިއަނަކަށް އަރާފައިވަނީ ހުކުރު ދުވަހުއެވެ. ހުކުރު ދުވަހު އެގައުމުގައި 19،851 މީހުންނަށް ކޮވިޑް ޖެހުނުއިރު 240 މީހުން ވަނީ މަރުވެފައެވެ. ވައިރަސް ޖެހުނު މީހުންގެ އަދަދު މިލިއަނަކަށް އެރިއިރު މިބަލީގައި މަރުވި މީހުންގެ އަދަދު ވަނީ 8826ށް އަރާފައެވެ. އެއި ބަލި ޖެހުނު މީހުންގެ 0.87 އިންސައްތަ މީހުންނެވެ.
ތައިލެންޑުން ފެނިފައިވާ ކޭސްތަކުގެ 97 އިންސައްތަ ރިޕޯޓްކޮށްފައިވަނީ ފާއިތުވި 5 މަސް ދުވަހު ކަމަށްވެސް އެގައުމުގެ ހެލްތު މިނިސްޓްރީން ވަނީ ހާމަކޮށްފައެވެ. ތައިލެންޑްގައި ކޮވިޑްގެ ހާލަތު ގޯސްވަމުން ދިޔައިރު އެގައުމަށް ވަނީ ވެކްސިން ލިބުމުގައިވެސް ދަތިތަކާ ކުރިމަތިވެފައެވެ. އެއާއެކު ހަލުވިކަމާއެކު ވެކްސިން ދިނުމުގެ ޕްރޮގްރާމް ކުރިޔަށް ގެންދިޔުމަށް ގޮންޖެހުންތަކާ ވަނީ ކުރިމަތިލާންޖެހިފައެވެ.
ތައިލެންޑްގައި މިއަހަރުގެ އޭޕްރީލް މަހާ ހަމައަށްވެސް ކޮވިޑްގެ ހާލަތު ވަނީ ކޮންޓްރޯލްކޮށްފައެވެ. ނަމަވެސް އޭޕްރީލް މަހު އެގައުމުގައި ކޮވިޑްގެ ހާލަތު ގޯސްވާން ފެށީ އަލްފާ ވޭރިއަންޓާއެކުއެވެ. އަދި އޭގެ ފަހުން ޑެލްޓާ ވޭރިއަންޓްވެސް އެގައުމުގައި ހަލުވި ކަމާއެކު ފެތުރެން ފެށިއިރު އޭރު ވެކްސިން ދެވިފައިވަނީ މަދު ބަޔަކަށެވެ. އެހެންކަމުން ހަލުވި ކަމާއެކު ވައިރަސް ދިޔައީ ފެތުރެމުންނެވެ.
ތައިލެންޑްގައި ވެކްސިން ޖަހަން ޖެހޭ އާބާދީގެ 66 މިލިއަން މީހުންގެ ތެރެއިން ވެކްސިން ޖަހާފައިވަނީ 8.3 އިންސައްތަ މީހުންނެވެ. އެހެންކަމުން ވެކްސިން ޖެހުމުގެ ކަންކަން އަވަސްކުރުމަށް ސިއްހީ އޮފިޝަލުން އަންނަނީ މަސައްކަތްކުރަމުންނެވެ.
އަނެއްކޮޅުން ޑެލްޓާ ވޭރިއަންޓްގެ ސަބަބުން ވެކްސިންގެ އަސަރު ކުރާ މިންވަރު ދަށްވުމާއި ގުޅިގެން ތައިލެންޑްގެ އޮފިޝަލުން އަންނަނީ ބޫސްޓަރ ޝޮޓް ޖެހުމާމެދު ވިސްނަމުންނެވެ. އެގޮތުން ސިނޯވެކް ވެކްސިން ޖަހާފައިވާ 3.4 މިލިއަން މީހުންނަށް އެސްޓްރަޒެނިކާ ވެކްސިން ނުވަތަ އެމްއާރުއެންއޭ ވެކްސިނެއް ބޫސްޓަރ ޝޮޓްގެ ގޮތުގައި ޖަހާނެކަމަށް އެގައުމުގެ އޮފިޝަލުން ބުނެއެވެ.
ސިނޯވެކް ވެކްސިން ޖަހާފައިވާ ފްރޮންޓް ލައިންގައި މަސައްކަތްކުރާ މީހުންނަށް މިހާރުވެސް ވަނީ ބޫސްޓާރ ޑޯޒް ދީފައެވެ.
ތައިލެންޑްގެ ސަރުކާރުން ކޮވިޑް-19 ކޮންޓްރޯލްކުރުމަށް ގެންގުޅޭ އުސޫލުތަކާއި ކޮވިޑް ވެކްސިން ޖެހުމުގެ ކަންކަން ލަސްވަމުންދާތީ އެގައުމުގެ ސަރުކާރާ މެދު އާންމުންގެ މެދުގައި ވަނީ ހިތްހަމަނުޖެހުން އުފެދިފައެވެ.
