ފްރެންޗް ލީގުގައި ހުކުރު ދުވަހުގެރޭ ބްރެސްޓާ ދެކޮޅަށް ކުޅޭ މެޗަށް ޕީއެސްޖީން އެކުލަވާލި ސްކޮޑުގައި އާޖެންޓީނާގެ ތަރި ލިއޮނެލް މެސީ ނުހިމަނަން އެ ޓީމުގެ ކޯޗު މައުރީސިއޯ ޕޮޗެޓީނޯ ނިންމައިފިއެވެ.

އުމުރުން 34 އަހަރުގެ މެސީ ޕީއެސްޖީއަށް ބަދަލުވީ ހިލޭ ޓްރާންސްފާއެއްގެ ދަށުން މި މަހުގެ 10 ވަނަ ދުވަހުއެވެ. އެއަށްފަހު މިދިޔަ ހޮނިހިރު ދުވަހުގެރޭ ޕީއެސްޖީން 4-2 ގެ ނަތީޖާއަކުން ސްޓްރަސްބޯގް ބަލިކުރި މެޗުގައިވެސް މެސީ ބޭނުންކޮށްފައެއް ނުވެއެވެ. އެކަމަކު އެ މެޗުގެ ކުރިން މެސީ ހިމެނޭ ގޮތަށް ޕީއެސްޖީން ވަނީ މި ފަހަރު ޓްރާންސްފާ ބާޒާރުގައި އެ ޓީމަށް އަލަށް ގުޅުނު ކުޅުންތެރިން ސަޕޯޓަރުންނަށް ތައާރަފުކޮށްފައެވެ.

ލީގުގައި ހުކުރު ދުވަހުގެރޭ ރަށުން ބޭރުގައި ބްރެސްޓާ ދެކޮޅަށް ކުޅޭ މެޗުގައިވެސް މެސީ ބޭނުންނުކުރަން ޕޮޗެޓީނޯ ނިންމިއިރު، ރިޕޯޓުތައް ބުނާ ގޮތުން މެސީ އެ ޓީމަށް ކުޅޭނެ ފުރަތަމަ މެޗަކީ މި މަހު 29 ވަނަ ދުވަހު ލީގުގައި ރެއިމްސްއާ ދެކޮޅަށް ޕީއެސްޖީ ނުކުންނަ މެޗެވެ. އަދި އެ މެޗުގައި ޕީއެސްޖީގެ އައު ގޯލްކީޕަރު ޖިއަންލުއީޖީ ޑޮންނަރުންމާވެސް ފެނުމުގެ ފުރުސަތު އެބައޮތް ކަމަށް ރިޕޯޓުތައް ބުނެއެވެ.

މީގެ ކުރިން ދިން އިންޓަވިއުއެއްގައި ޕޮޗެޓީނޯ ބުނީ މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށެވެ. އެގޮތުން ކޮޕަ އެމެރިކާ ފުޓްބޯޅަ މުބާރާތަށްފަހު މިވީ މަހެއްހާ ދުވަސް ފަހުން މެސީ މާގިނައިން ފަރިތަކޮށްފައިނުވާ ކަމަށާއި، އެހެންކަމުން ބޭނުންވަނީ ފިޔަަވަޅަކަށް ފަހު ފިޔަވަޅެއް ކުރިއަށްދާން ކަމަށްވެސް ބުންޏެވެ. އަދި މެޗުގައި މެސީ ބޭނުންކުރާނީ ފިޓްނަސްއާ ހުރިހާ ކަމަކަށް ބެލުމަށްފަހު ކަމަށްވެސް ޕޮޗެޓީނޯ ބުންޏެވެ.

މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށް ޕޮޗެޓީނޯ ބުނިއިރު، މި ފަހަރުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގެ ދަށުން ޕީއެސްޖީއާ ގުޅުނު ރެއާލް މެޑްރިޑުގެ ކުރީގެ ކެޕްޓަން ސާޖިއޯ ރާމޯސްއަށް ވަނީ އަނިޔާވެފައެވެ. ފަޔަށް ލިބިފައިވާ އެ އަނިޔާއިން ރަނގަޅުވެ، އޭނާއަށް ޕީއެސްޖީގެ މެޗުތަކުގައި ކުޅެވޭނީ އަންނަ ސެޕްޓެމްބަރު މަހުގައި ކަމަށް ރިޕޯޓުތައް ބުނެއެވެ.