އިޓަލީގެ ރޯމާއަށް ކުޅެމުން އައި ސްޕެއިންގެ ފޯވާޑް ޕެޑްރޯ ރޮޑްރިގޭޒް ލާޒިއޯއަށް ބަދަލުވެއްޖެއެވެ.

މިދިޔަ އަހަރުގެ އޯގަސްޓް މަހު ހިލޭ ޓްރާންސްފާއެއްގެ ދަށުން އުމުރުން 34 އަހަރުގެ ޕެޑްރޯ ރޯމާއާ ގުޅުނުއިރު، އެ ފަހަރު އޭނާ ވަނީ އެ ކުލަބާއެކު ތިން އަހަރުގެ އެއްބަސްވުމެއް ހަދާފައެވެ. އެކަމަކު ރޯމާގައި އެއް ސީޒަން ހޭދަކުރުމަށްފަހު އެ އެއްބަސްވުން ޕެޑްރޯ އުވާލިއިރު، ބުރާސްފަތި ދުވަހު އޭނާ ވަނީ ހިލޭ ޓްރާންސްފާއެއްގެ ދަށުން ލާޒިއޯއަށް ސޮއިކޮށްފައެވެ.

ރިޕޯޓުތައް ބުނާ ގޮތުން ޕެޑްރޯ ވަނީ ލާޒިއޯއާއެކު ދެ އަހަރުގެ އެއްބަސްވުމެއް ހަދާފައެވެ. ރޯމާގައި އެއް ސީޒަން ހޭދަކުރުމަށްފަހު ޕެޑްރޯ އެ ޓީމު ދޫކޮށްލިއިރު، އޭނާ ވަނީ މިދިޔަ ސީޒަނުގައި ރޯމާއަށް ކުޅެދިން 40 މެޗުގައި ހަ ލަނޑު ޖަހާފައެވެ.

ބާސެލޯނާއިން ކެރިއަރު ފެށި ޕެޑްރޯ އެންމެ ފުރަތަމަ ވިދާލީ އެ ކުލަބުންނެވެ. އެގޮތުން އޭނާ ވަނީ ބާސާއާއެކު ސްޕެނިޝް ލީގު ފަސް ފަހަރު، ސްޕެނިޝް ކަޕް ތިން ފަހަރު އަދި ސްޕެނިޝް ސުޕަ ކަޕް ހަތަރު ފަހަރު ކާމިޔާބުކޮށްފައެވެ. އަދި ވަނީ އެ ޓީމާއެކު ޔުއެފާ ޗެމްޕިއަންސް ލީގާއި ޔުއެފާ ސުޕަ ކަޕް ތިން ފަހަރު، އަދި ފީފާ ކުލަބު ވޯލްޑް ކަޕް ދެ ފަހަރު ކާމިޔާބުކޮށްފައެވެ.

ބާސާ ދޫކޮށް 2015 ވަނަ އަހަރު ޕެޑްރޯ ބަދަލުވީ ޗެލްސީއަށެވެ. ޗެލްސީގައިވެސް ޕެޑްރޯ ގިނަ ކާމިޔާބީތަކެއް ހޯދިއިރު، އޭނާ ވަނީ އެ ކުލަބާއެކު އިނގިރޭސި ޕްރިމިއާ ލީގާއި، އެފްއޭ ކަޕުގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.