ރާއްޖެއަށް 72 ކިލޯގެ ޑައިމޯފިން އެތެރެކުރި މައްސަލައިގައި ދައުވާކުރާ މީހުންގެ ބަންދު މުރާޖަޢާކުރުން މި މަހު 25 ގައި
މި މައްސަލާގައި ހިމެނޭ 10 މީހުންގެ މައްޗަށް އުފުލާފައިވަނީ ޑައިފޯމިން ޓެރެފިކްކުރުމުގެ ކުށުގެ ދައުވާ
ރާއްޖެއަށް 72 ކިލޯ ޑައިމޯފިން އެތެރެކުރި މައްސަލައިގައި ދައުވާކުރާ 10 މީހުން
ރާއްޖެއަށް 72 ކިލޯގެ ޑައިމޯފިން އެތެރެކުރި މައްސަލައިގައ ދައުވާކުރާ މީހުންގެ ބަންދު މުރާޖަޢާކުރުމަށް ބާއްވާ އަޑުއެހުން އޮގަސްޓް 25 ގައި ބޭއްވުމަށް ނިންމައިފިއެވެ.
މި މައްސަލައިގައި ދައުވާކުރާ 10 މިހުންގެ ޝަރީއަތުގެ އަޑުއެހުން ބާއްވާފައިވަނީ ބުރާސްފަތި ދުވަހުގެ ހެނދުނު 10:00ގައެވެ. ވަކިވަކިން ކުރިއަށްދިޔަ މި އަޑުއެހުމުގައި އޮތީ، ދިފާއުން ހުށަހަޅާ ހެއްކާ ބެހޭ ގޮތުން ވާހަކަދެއްކުމެވެ.
ރ. އިނގުރައިދޫ، އެލެސްކާ، މުޙައްމަދު ވިސާމްގެ ފަރާތުން ހެކި ހުށަހަޅުއްވަމުން ދިފާއީ ވަކީލު ވިދާޅުވީ، ދައުވާއަށް އިންކާރު ކުރާ ކަމަށެވެ. އަދި ދައުވާގައި ބަޔާން ކޮށްފައިވާ އެއްވެސް ކަމަކީ ވިސާމްކޮށްފައިވާ ކަމެއް ނޫން ކަމަށް ވެސް ދިފާއުން ވަަނީ ބުނެފައެވެ.
ދިފާއުން ވިދާޅުވީ، "މަސްޖަރީ-2" މަސް ދޯނިން ފެނިފައިވާ ތަކެއްޗަކީ އެ ދޯނީގައި މީގެ 5 އަހަރު ކުރިން ވެސް ބޭނުން ކުރަމުން އައި ތަކެތިކަން ސާބިތު ކުރުމަށް ވެސް ހެކި ހުށަހަޅާފައިވެއެވެ. ދިފާއުން ބުނީ ވިސާމް ބޭނުންވަނީ ވީހާވެސް އަވަހަކަށް ހެކިން ހުށަހަޅައި، އަޑުއެހުން ކުރިއަށް ގެންގޮސް ޝަރީއަތް ނިންމުމަށް ކަމަށެވެ. ޝަރީއަތުގެ ކުރިން ހުށަހަޅާ ކަންކަން ހުށަހެޅުމަށް 10 ދުވަސް ދޭން އެދުމުން އެ މުއްދަތުވަނީ ދީފައެވެ.
ވިސާމުގެ މައްސަލައާ ގުޅިގެން ކޮންމެހެން ބޭނުންވާ ހެކިތައް ހުށަހެޅުމަށް ވެސް ގާޒީ ހަސަން ސައީދު ވަނީ ދައުލަތުގައި އެދިވަޑައިގެންފައެވެ.
ރ. އިނގުރައިދޫ، އެލެސްކާ، ޢަބްދުﷲ ވިސާމްގެ ހެކިންގެ ގޮތުގައި ދިފާއުން ފުލުހުންގެ އޮފިސަރުން ހެކިންގެ ގޮތުގައި ހުށަހެޅިއެވެ. ދިފާއުން ބުނީ ފުލުސް އޮފިސަރުން ހެކިންގެ ގޮތުގައި ހުށަހެޅީ، އެއްވެސް މަސްތުވާއެއްޗެއް އެ ދޯނިން އެހެން ލޯންޗަކަށް އަރުވަނިކޮށް ފެނިފައި ނުވާކަން ސާބިތު ކުރުމަށް ކަމަށާއި، ޓްރެފިކް ކުރުމުގެ އެއްވެސް އަމަލެއް ހިންގާފައި ނުވާކަން ސާބިތުކުރުމަށް ކަމަށެވެ.
އެ ސީންގައި އުޅުނު ބައެއް އޮފިސަރުން ވެސް ހެކިންގެ ގޮތުގައި ހުށަހަޅަމުން ދިފާއުން ބުނީ، މިއީ، ލޯންޗް ބަލައި ފާސް ކުރި އިރު އެއްވެސް އެއްޗެއް ފެނިފައި ނުވާކަން ސާބިތު ކުރުމަށް ހުށަހެޅި ހެކި ކަމަށެވެ. ހަމައެއާއެކު، ދޯންޏަކީ މަސް ދޯންޏެއްކަން ސާބިތު ކުރުމަށާއި، ދައުލަތުގެ ފަރާތުން ސިއްރު ހެކީގެ ގޮތުގައި ހުށަހެޅި އިންޓެލިޖެންސް ރިޕޯޓް ތައްޔާރުކުރި ފަރާތް ވެސް ހެއްކެެއްގެ ގޮތުގައި ދިފާއުން ހުށަހެޅިއެވެ. ކިތާބީ ހެކީގެ ގޮތުގައި ސީންގެ ފޮޓޯ ވެސް ދިފާއުން ވަނީ ހުށަހަޅާފައެވެ.
ދައުލަތުން ބުނީ، އެ ހެކިތައް ދައުލަތަށް ލިބިފައިނުވާ ކަމަށެވެ. އަދި މެއި 3 ގެ ފަހުން ހެކި ހުށަހެޅި ނަމަ އެ ހެކިތައް ބަލައި ގަތުމަށް އިއުތިރާޒުކުރާ ކަމަށެވެ. ޝަރީއަތުން ވެސް އެގޮތަށް އެކަން ބަލައިގެންނެވިއެވެ.
ދ. މާއެނބޫދޫ، އަނބުގޮސްދޮށުގެ، އަޙްމަދު ނަޞީރު އަދި ކ.މާލެ، މއ. ކަނޑޫގެ، ޢަލީ އަޙުމަދު ލިޔުމުން ހެކި ހުށަހަޅާފައިވާނެ ކަމަށް ދިފާއުން ބުނެފައިވެއެވެ. އެގޮތުން 6 ފުލުހެއް ހެކިންގެ ގޮތުގައި ހުށަހަޅާފައިވާ ކަމަށާއި، ދޯންޏަކީ، މަސްދޯންޏެއް ކަން ސާބިތު ކުރުމަށާއި، ދޯނިން މަސްތުވާ ތަކެތި ފެނިފައި ނުވާކަން ސާބިތުކުރުމަށް އިންވެސްޓިގޭޝަން އޮފިސަރާއި، އިންޓެލިޖެންސް ރިޕޯޓް ތައްޔާރު ކުރި ފަރާތް ވެސް ހެކީގެ ގޮތުގައި ހުށަހަޅާފައިވެއެވެ.
ކިތާބީ ހެކީގެ ގޮތުގައި ސީން ރިޕޯޓާއި، ފޮޓޯތައް ވަނީ ހުށަހަޅާފައެވެ. ހަމަ މިއާއެކު، ދައުވާ ކޮށްފައިވަނީ ޖިނާއީ އިޖުރާއަތުގެ ގާނޫނުގައި، ދައުވާކުރަން ދީފައި އޮންނަ މުއްދަތުގެ ފަހަނައަޅާ ދިޔަ ފަހުންކަން ސާބިތުކުރުމަށް ދައުވާ ފޯމް ވެސް ހެކީގެ ގޮތުގައި ހުށަހަޅާފައިވާކަން ދިފާއުން ފާހަގަކުރިއެވެ.
އަޙްމަދު ނަޞީރުގެ ބަލި ހާލަތު ހުރި ގޮތުން ބަންދަށް ގޮތެއް ނިންމައި ދިނުމަށް ވެސް ވަނީ އެދިފައެވެ. އޭނާގެ ފުރަގަސް ފަރާތުގެ އޮޕަރޭޝަނެއް ކުރަން ޑޮކްޓަރު ލަފާ ދީފައިވާކަމަށް ފާހަގަކުރިއެވެ. ދައުލަތުން ބުނީ، ޑޮކްޓަރު ލަފާ ދީފައިވާ އޮޕަރޭޝަން ކުރުމަށް އަހުމަދު ނަސީރު އިންކާރު ކޮށްފައިވާ ކަމަށް ކަރެކްޝަނުން ބުނެފައިވާ ކަމަށާއި، ބޭސް ބޭނުން ކުރަމުންދާ ކަމަށް ކަރެކްޝަނުން މައުލޫމާތު ދީފައިވާ ކަމަށެވެ. އެހެންކަމުން ބަންދުގައި ހުރި ހުރުން ދަމަހައްޓަން ދައުލަތުން އެދޭ ކަމަށެވެ.
އޭނާގެ ފަޔާއެއްކޮށް އައްސިވާ ކަމަށް އަހުމަދު ނަސީރު ޝަރީއަތުގެ މަޖިލީހުގައި ބުނެފައިވެއެވެ.
ޝަރުތުކޮށްފައި ދޫކޮށްލުމާ މެދު ދައުލަތުން ދެކެނީ ކިހިނެއްތޯ ގާޒީ ހަސަން ސައީދު އެއްސެވުމުން ދައުލަތުން ބުނީ، ބަންދުގައި ބަހައްޓައިގެން ފަރުވާ ދެވޭ ބައްޔަކަށްވާތީ އާއި ފަރުވާއަށް އިންކާރުކޮށްގެން ދޫކޮށްލާނަމަ އޭގެ ނާޖާއިޒް ފައިދާ ކުށްވެރިން ނަގާނެ ކަމަށެވެ. އެހެންކަމުން ފަރުވާއަށް އިހުމާލުވާކަން ސާބިތުކޮށް ދީފިނަމަ ބަންދާމެދު ގޮތެއް ނިންމިދާނެ ކަމަށް ޝަރީއަތުން ފާހަގަކުރެއްވިއެވެ.
އަހުމަދު ނަސީރުގެ ސިއްޙީ ކަންކަމާ ގުޅިގެން ކަރެކްޝަންގެ ސިއްޚީ ޓީމަކާއެކުމި މަހުގެ 25 ގައި އަޑުއެހުމެއް ބޭއްވުމަށް ޝަރީއަތުން ނިންމެވިއެވެ.
ސ. ހުޅުދޫ، ދޭލިޔާގެ, ޢިރުފާން ތަޤިއްޔުގެ މައްޗަށް އުފުލާފައިވާ ދައުވާގައި ހެކީގެ ގޮތުގައި ހުށަހަޅާފައިވަނީ، 3 ހެއްކެކެވެ. އިރުފާންގެ ފަރާތުން ހުށަހަޅާފައިވާ ހެކިތައް ދައުލަތަށް ލިބިފައިވާ ކަމަށާއި، ޝަރީއަތުގެ ކުރިން އިތުރު ކަންކަން ހުށަހެޅުމަށް ދައުލަތާއި ދިފާއަށް ވެސް 15 ދުވަސް ވަނީ ދީފައެވެ.
ތ. ތިމަރަފުށި، ތަނޑިރަތްމާގެ، މުޙައްމަދު ވަޖީހު ރ. ރަސްގެތީމު، ފީރޯޒްގެ، އަޙްމަދު ޝިނާން، ލ. ގަން-ތުނޑި، ޕެރިސްހޮލިޑޭ، މުޙައްމަދު ފުރުޤާން، ހދ. ނޮޅިވަރަންފަރު، ނޫރީއާގެ، މުޙައްމަދު ޝަރީފްގެ ހެކިތައް ދައުލަތަށް ލިޔުމުން ލިބިފައި ނުވާ ކަމަށް ދައުލަތުން ފާހަގަކުރިއެވެ. ދިފާއުން ބުނީ، ކޯޓަށް ހެކިތައް ފޮނުވާފައިވާ ކަމަށެވެ. ހެކިތައް ދިރާސާ ކުރުމަށް ފަހު އިތުރު ކަަންކަން ހުށަހެޅުމަށް 15 ދުވަސް ދިނުމަށް އެދުމުން ދިފާޢުއަށާއި ދައުލަތަށް ވެސް ދެއްވިއެވެ.
އަޑު އެހުން ނިންމާލަމުން ގާޒީ ވިދާޅުވީ، ބަންދު މުރާޖަޢާކުރުމަށް ދައުލަތުން ފޮނުވާއިރު، ބަންދުގައި ބަހައްޓަން ބޭނުންވާ ސަބަބު ބަޔާންކޮށް ސާފުވާނެ ގޮތަށް ފޯމް ހުށަހެޅުއްވުމަށެވެ. ބަންދު މުރާޖަޢާކުރުމަށް ބާއްވާ އަޑުއެހުން މި މަހުގެ 25 ގައި ބޭއްވުމަށާއި، މައްސަލައިގެ އިތުރު އަޑުއެހުމެއް ސެޕްޓެމްބަރު މަހު ފަހުކޮޅު ބޭއްވުމަށް ގާޒީ ވަނީ ނިންމަވާފައެވެ.
މި މައްސަލާގައި ހިމެނޭ 10 މީހުންގެ މައްޗަށް އުފުލާފައިވަނީ ޑައިމޯފިން ޓްރެފިކްކުރުމުގެ ކުށުގެ ދައުވާއެވެ. އަދި މި 10 މީހުންގެ ތެރެއިން 3 މީހެއްގެ މައްޗަށް އިތުރު ދައުވާއެއް ވެސް ވަނީ އުފުލާފައެވެ. އެ ތިން މީހުންގެ މައްޗަށް ދެން އުފުލާފައި ވަނީ ކެނަބިސް ބޭނުންކުރުމުގެ ކުށުގެ ދައުވާއެވެ.
ފުލުހުން ވިދާޅުވީ މި މީހުންގެ ތެރެއިން ސ. ހުޅުދޫ / ދޭލިޔާގެ، އިރުފާން ތަޤިއްޔު (32އ) އާއި ރ. އިނގުރައިދޫ / އެލެސްކާ، މުޙައްމަދު ވިޝާމް (28 އ) އަކީ މަސްތުވާތަކެތި ރާއްޖެއަށް އެތެރެކުރުމުގައި އެންމެ އިސްކޮށްތިބި ދެ މީހުން ކަމަށެވެ.
