އަފްޣާނިސްތާނުގެ ދިފާއުގައި އެގައުމުގެ ސަރުކާރުން ނުކުރި ހަނގުރާމައެއް އެމެރިކާ ސިފައިން ނުކުރާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

އަފްޣާނިސްތާނުން އެމެރިކާ ސިފައިން ބާލަމުން ދަނިކޮށް އެގައުމުގެ ޠާލިބާން ޖަމާޢަތުން ވަނީ އަފްޣާނުގެ ކޮންޓްރޯލް ނަގާފައެވެ.

އެއާއިއެކު ބައިޑެން ވަނީ އެމެރިކާ ސިފައިން އަފްޣާނުން ބޭލުމަށް ނިންމި ނިންމުން ދިފާޢު ކުރައްވާފައެވެ. އެގޮތުން ބައިޑެން ވިދާޅުވީ އަފްޣާންގެ ސިފައިން އެމީހުންގެ ދިފާއުގައި ހަނގުރާމަ ކުރަން ތައްޔާރަށް ނެތްހާލަތުގައި އެމެރިކާ ސިފައިން ހަނގުރާމައަށް ނުކުމެ މަރުވެގެން ދިޔުމަކީ އެދޭ ކަމެއް ނޫން ކަމަށެވެ.

ބައިޑެން ވިދާޅުވީ، އަފްޣާންގެ ސަރުކާރުގެ ބޭފުޅުންވެސް އަފްޣާން ދޫކުރައްވާ ދިޔައީ ކަމަށާއި، ގައުމުގެ ދިފާއުގައި ކުރަން ޖެހޭ ކަންކަން ކުރުމަށް އެގައުމުން ނުކުޅެދިފައިވާ ކަމަށެވެ. އަދި އެމެރިކާ ސިފައިން އަފްޣާނިސްތާނުގެ ދިފާޢުގައި ހުރިހާ ވަސީލަތްތަކެއްގެ ބޭނުން ކުރި ކަމަށާއި، 20 އަހަރުގެ ހަނގުރާމައިގައި އެމެރިކާ ސިފައިން ކުރި ހޯދި ކަމަށެވެ.

ބައިޑެން އިތުރަށް ވިދާޅުވީ އެމެރިކާއިން މިހާރު ވިސްނަނީ އަފްޣާނުގެ ރެފިޔުޖީންގެ ސަލާމަތަށް ކަމަށާއި، އެމެރިކާއިން އަފްޣާނުގެ ރެފިޔުޖީންނަށް މަރުހަބާ ކިޔާނެ ކަމަށެވެ. އަދި އެގައުމުން އިތުރު ރެފިޔުޖީން ގެނައުމުގެ މަސައްކަތް ކުރައްވަމުން ގެންދަވާ ކަމަށްވެސް ބައިޑެން ވިދާޅުވިއެވެ.

އަފްޣާންގެ ހާލަތާ ގުޅޭ ގޮތުން ޠާލިބާނުން ބުނެފައިވަނީ މިހާތަނަށް އެ ގައުމުގެ އެއްވެސް ހިސާބެއްގައި ހަމަނުޖެހުމެއް ހިނގާފައިވާ ކަމުގެ ރިޕޯޓެއް ލިބިފައި ނުވާ ކަމަށެވެ. ޠާލިބާނުން މިހެން ބުނެފައިވަނީ ހަތިޔާރު އެޅި, ޠާލިބާންގެ ހަނގުރާމަވެރިން އަފްޣާންގެ ވެރިރަށް ކާބުލް އެމީހުންގެ ބާރުގެ ދަށަށް ގެނެސް، އެމެރިކާއިން ވާގިވެރިވެ އުފެއްދި ސަރުކާރު ވައްޓާލާފައިވަނިކޮށެވެ.

އާދީއްތަ ދުވަހު ކާބުލް ހިސޯރުކޮށް ވެރިކަމުގެ ބާރުތައް ބަދަލުކުރުމުގެ މަޝްވަރާތަކެއް ޠާލިބާނުންނާއި އަފްޣާންގެ ސަރުކާރާ ދެމެދު ކުރެވެމުން ދަނިކޮށް، ރައީސް އަޝްރަފް ޣަނީ ވަނީ ގައުމު ދޫކުރައްވައި ފިއްލަވާފައެވެ.