ނިއު ރޭޑިއަންޓް ސްޕޯޓްސް ކުލަބާއެކު އޭއެފްސީ ކަޕުގައި ހޯދި ކާމިޔާބީ ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއާއެކު ތަކުރާރުކުރަން ބޭނުންވާ ކަމަށް އެ ޓީމުގެ ކޯޗު އޮސްކާ ބްރުޒޮން ބުނެފިއެވެ.

ނިއުއާއެކު އޮސްކާ ހޭދަކުރި ކުރު މުއްދަތުގައި އޭނާ ވަނީ ރާއްޖޭގެ ހުރިހާ މުބާރާތެއް އެ ޓީމާއެކު ކާމިޔާބުކޮށްފައެވެ. ނިއު ދޫކޮށް 2018 ވަނަ އަހަރު އޮސްކާ ބަޝުންދަރާއަށް ބަދަލުވިއިރު، މިއީ ބަޝުންދަރާއާ ހަވާލުވި ފަހުން އޮސްކާ ރާއްޖޭގެ ގައުމީ ފުޓްބޯޅަ ދަނޑުން ފެނިގެންދާނެ ފުރަތަމަ ފަހަރެވެ.

އޭއެފްސީ ކަޕުގެ ގްރޫޕް ޑީގައި ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ބުދަ ދުވަހުގެރޭ ކުޅެން އޮތް މެޗުގެ ކުރިން އަންގާރަ ދުވަހޔު ބޭއްވި ނޫސްވެރިންގެ ބައްދަލުވުގައި ވާހަކަދައްކަމުން އޮސްކާ ބުނީ ރާއްޖޭގައި މީގެ ކުރިން ކުރެވުނު މަސައްކަތާ މެދު ހިތްހަމަޖެހޭ ކަމަށާއި، އަދި ރާއްޖެއަކީ އޭނާގެ ދެވަނަ ގެ ކަމަށެވެ. އަދި އެނބުރި ގައުމީ ފުޓްބޯޅަ ދަނޑަށް ވަދެވުމުން ވަރަށް އުފާވެއްޖެ ކަމަށްވެސް ވަނީ ބުނެފައެވެ.

އޮސްކާ ބުނީ ނިއުގައި ހޭދަކުރި ދުވަސްވަރު އޭނާގެ އެންމެ ވާދަވެރި ޓީމަކީ މާޒިޔާ ކަމަށާއި، މާޒިޔާ އަތުން ނިއު މީގެ ކުރިން ހޯދި ކާމިޔާބީތައް ބަޝުންދުރާ އާއެކު ތަކުރާރުކުރަން ބޭނުންވާ ކަމަށެވެ.

މާޒިޔާއާ ބެހޭ ގޮތުން ވާހަކަދައްކަމުން އޮސްކާ ބުނީ މާޒިޔާއަކީ ރާއްޖޭގައި މި ވަގުތު އޮތް އެންމެ މޮޅު ޓީމު ކަމަށެވެ. އަދި މާޒިޔާގައި މިވަގުތު އޮތް ސްކޮޑަކީ ފުރިހަމަ ސްކޮޑެއް ކަމަށާއި، މާޒިޔާގެ ބައެއް ކުޅުންތެރިންނާއެކު މީގެ ކުރިން މަސައްކަތް ކުރެވިފައިވުމުން އެ ކުޅުންތެރިންގެ ސްޓައިލް އެނގޭ ކަމަށްވެސް އޮސްކާ ބުންޏެވެ. އަދި މާޒިޔާގެ ކޯޗު ރިސްޓޯ ވިޑަކޮވިޗަކީ ސްޕެނިޝް ލީގުގައި 10 އަހަރު ކުޅެފައިވާ ކޯޗެއް ކަމަށާއި، އަދި އޭނާއަކީ އޭއެފްސީ ކަޕުގައި ފިލިޕީންސްގެ ސެރެސްގައި ރަނގަޅު މަސައްކަތްތަކެއްވެސް ކޮށްފައިވާ ކޯޗެއް ކަމަށްވެސް ވަނީ ބުނެފައެވެ.

އޭއެފްސީ ކަޕާ ބަޝުންދަރާ ކުރިމަތިލާއިރު، މިދިޔަ ހަފުތާގެ ތެރޭގައި އެ ޓީމުން ވަނީ ބަންގްލަދޭޝްގެ ޗެމްޕިއަންކަން ހޯދާފައެވެ. އޭއެފްސީ ކަޕުގެ ގްރޫޕް ޑީގައި ބަޝުންދަރާ އާއި މާޒިޔާ ބައްދަލުކުރާ މެޗު ފަށާނީ ބުދަ ދުވަހުގެރޭ ރާއްޖެ ގަޑިން 21:00 ގައެވެ.