އަޑުބަރޭ ކުޅުން އަދިވެސް އެއްވަނަ، އުއްމީދަކީ ސާފް ޗެމްޕިއަންޝިޕުގައި ކުޅުން

ރާއްޖޭގައި އުފެދުނު އެންމެ ހުނަރުވެރި މިޑްފީލްޑަރުންގެ ތެރޭގައި އަސްހަދު އަލީ (އަޑުބަރޭ) ހިމެނެއެވެ. މީގެ ކުރިން ގައުމީ ފުޓްބޯޅަ ޓީމަށްވެސް ކުޅުން އަޑުބަރޭ ފާހަގަވެގެން ގޮސްފައިވަނީ ޖެހިލުން ކުޑަ މިޑްފީލްޑަރެއްގެ ގޮތުގައެވެ. 2018 ވަނަ އަހަރު ކަކުލަށް ލިބުނު އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރި އަޑުބަރޭ، މިދިޔަ ސީޒަނުގެ މެދުތެރެއިން ކުލަބު އީގަލްސްއާ ގުޅުނީ އޭއެފްސީ ކަޕާ އަމާޒުކޮށެވެ.

އީގަލްސްއަކީ ފުރަތަމަ ޑިވިޝަނުގައި އަޑުބަރޭ ކުޅުނު ހަވަނަ ޓީމެވެ. ކުލަބު ވެލެންސިއާއިން ކެރިއަރު ފެށި އަޑުބަރޭ ވަނީ ކުލަބު ގްރީން ސްޓްރީޓްސްގެ އިތުރުން ވިކްޓަރީ ސްޕޯޓްސް ކުލަބު، ވީބީ އައްޑޫ އެފްސީ، ނިއު ރޭޑިއަންޓް ސްޕޯޓްސް ކުލަބު އަދި މާޒިޔާ ސްޕޯޓްސް އެންޑް ރެކްރިއޭޝަނަށްވެސް ކުޅެފައެވެ. މީގެ ތެރެއިން ނިއު ރޭޑިއަންޓުން ވަނީ އޭނާގެ ކެޕްޓަންކަމުގެ ދަށުން 2015 ވަނަ އަހަރުގެ އުރީދޫ ދިވެހި ޕްރިމިއާ ލީގު ކާމިޔާބުކޮށްފައެވެ. އަދި މާޒިޔާއާއެކު އަޑުބަރޭ ވަނީ 2014 ވަނަ އަހަރުގެ އެފްއޭ ކަޕާއި، 2016 ވަނަ އަހަރުގެ ދިވެހި ލީގުގެ އިތުރުން 2017 ވަނަ އަހަރުގެ މާލޭ ލީގު ކާމިޔާބުކޮށްފައެވެ.

އަޑުބަރޭ އެނބުރިއައިސް ކުޅުނު އެންމެ މުހިންމު މެޗަކީ އާދީއްތަ ދުވަހުގެރޭ އޭއެފްސީ ކަޕުގެ ޕްލޭއޮފްގައި އިންޑިއާގެ ބެންގަލޫރު އެފްސީއާ ދެކޮޅަށް ކުޅުނު މެޗެވެ. އެ މެޗުން އީގަލްސް ބަލިވި ނަމަވެސް، އަޑުބަރޭގެ ކުޅުމަށް ގިނަބަޔަކު ވަނީ ތައުރީފުކޮށްފައެވެ. ބެންގަލޫރު މެޗުގައި އަޑުބަރޭ ވަނީ ބެންގަލޫރުން ކުރަމުން ދިޔަ އަވަސް ހަމަލާތައް ހުއްޓުވުމުގައި މުހިންމު ދައުރެއް އަދާކޮށްފައެވެ. އަދި އީގަލްސްއިން މި މެޗުގައި ތަނަވަސްކުރި ފުރުސަތުތަކުގައި އަޑުބަރޭގެ ހިއްސާ ބޮޑެވެ.

ކުޅިވަރާ ބެހޭ ވުޒާރާގެ ސްޓޭޓް މިނިސްޓަރުކަންވެސް ކުރައްވަމުން ގެންދަވާ އަޑުބަރޭ "ރާއްޖޭ.އެމްވީ" އަށް ދިން ހާއްސަ އިންޓަވިއުއެއްގައި ވިދާޅުވީ، ފުޓްބޯޅައިން ދުރަށްދާން ޖެހުނީ އަނިޔާގެ ސަބަބުން ކަމަށެވެ. އެކަމަކު އަލުން އަނބުރާ ކުޅެން ނުކުތީ ފުޓްބޯޅައަށް އޮތް ޝައުގެއްގެ ބޮޑުކަމުން ކަމަށާއި ފުޓްބޯޅައަކީ ހަށިގަނޑުގެ އެއްބައި ކަމަށެވެ.

މީގެ އިތުރުން އަޑުބަރޭ ވިދާޅުވީ އަނިޔާއަށްފަހު ޕްރެކްޓިސް ފެށިއިރުވެސް ކޮންމެ ޓީމަކަށް ދިޔަކަމުގައި ވިޔަސް ފުރަތަމަ އެގާރައިން ފުރުސަތު ލިބޭނެކަން އެނގޭ ކަމަށާއި، އީގަލްސްއާ ގުޅެން ނިންމީ އޭއެފްސީ ކަޕާ ދިމާކޮށް އެ ޓީމުގެ އެދުމުގެ މަތިން ކަމަށެވެ. އެކަމަކު ގްރޫޕް ސްޓޭޖަށް ކޮލިފައިނުވުމުން އެކަމާ ދެރަވާ ކަމަށްވެސް އަޑުބަރޭ ވިދާޅުވިއެވެ.

ގައުމީ ޓީމުން 2018 ވަނަ އަހަރު ރިޓަޔާވެފައިވީ ނަމަވެސް އަލުން ގައުމީ ޓީމަށް ކުޅެން ފުރުސަތު ލިބިއްޖެނަމަ ގައުމީ ޓީމަށް ކުޅޭނެ ކަމަށް އަޑުބަރޭ ވިދާޅުވިއެވެ. އަދި ކުރިއަށް އޮތް ސާފް ޗެމްޕިއަންޝިޕުގައި ކުޅުމުގެ އުއްމީދުގައި ހުރި ކަމަށްވެސް އަޑުބަރޭ ވަނީ ވިދާޅުވެފައެވެ.