ތަޖުރިބާކާރު މިޑްފީލްޑަރު އަދި ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) ކުލަބު އީގަލްސްއާ ގުޅިއްޖެއެވެ.

އީގަލްސްއިން އަޑުބަރޭގެ ސޮއި ހޯދީ ކުރިއަށް އޮތް އޭއެފްސީ ކަޕުގެ ކޮލިފައިން މެޗުތަކަށް ޓީމު އިތުރަށް ވަރުގަދަކުރުމުގެ ގޮތުންނެވެ. އުމުރުން 34 އަހަރުގެ އަޑުބަރޭ އީގަލްސްއާ ގުޅުނުއިރު، އޭނާ މިހާރު އަންނަނީ އީގަލްސްގެ ފަރިތަކުރުންތަކުގައި ބައިވެރިވަމުންނެވެ. އަދި އޭނާ އީގަލްސްއާ ގުޅުނީ މި ސީޒަނުގެ ނިޔަލަށް ކަމަށް އެ ކުލަބުން ވަނީ މަޢުލޫމާތުދީފައެވެ.

އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރި އަޑުބަރޭ އެންމެ ފަހުން ފެނިގެން ދިޔައީ 2018 ވަނަ އަހަރު ކުލަބު ގްރީން ސްޓްރީޓްސްއިންނެވެ. ޤައުމީ ފުޓްބޯޅަ ޓީމަށްވެސް ގިނަ ދުވަސްތަކެއް ވަންދެން ކުޅުނު އަޑުބަރޭގެ ކަކުލަށް ލިބުނު އަނިޔާގެ ސަބަބުން މިދިޔަ ސީޒަނުގައި އޭނާ ފެނިފައި ނުވާއިރު، މި ސީޒަން ފެށުމުގެ ކުރިން އަޑޭ ވަނީ މާޒިޔާ ސްޕޯޓްސް އެންޑް ރެކްރިއޭޝަނާއި އީގަލްސްގެ ފަރިތަކުރުންތަކުގައިވެސް ބައިވެރިވެފައެވެ.

އީގަލްސްއަކީ ފުރަތަމަ ޑިވިޝަނުގައި އަޑުބަރޭ ކުޅޭނެ ހަވަނަ ޓީމެވެ. އެގޮތުން ކުލަބު ވެލެންސިއާއިން ކެރިއަރު ފެށި އަޑުބަރޭ ވަނީ ގްރީން ސްޓްރީޓްސްގެ އިތުރުން ވިކްޓަރީ ސްޕޯޓްސް ކުލަބު، ވީބީ އައްޑޫ އެފްސީ، ނިއު ރޭޑިއަންޓް ސްޕޯޓްސް ކުލަބު އަދި މާޒިޔާއަށްވެސް ކުޅެފައެވެ. މީގެ ތެރެއިން ނިއު ރޭޑިއަންޓުން ވަނީ އޭނާގެ ކެޕްޓަންކަމުގެ ދަށުން 2015 ވަނަ އަހަރުގެ އުރީދޫ ދިވެހި ޕްރިމިއާ ލީގު ކާމިޔާބުކޮށްފައެވެ. އަދި މާޒިޔާއާއެކު އަޑުބަރޭ ވަނީ 2014 ވަނަ އަހަރުގެ އެފްއޭ ކަޕާއި، 2016 ވަނަ އަހަރުގެ ދިވެހި ލީގުގެ އިތުރުން 2017 ވަނަ އަހަރުގެ މާލޭ ލީގު ކާމިޔާބުކޮށްފައެވެ.

ކުރިއަށް އޮތް އޭއެފްސީ ކަޕުގެ ކޮލިފައިންނަށް ޓީމު އިތުރަށް ވަރުގަދަކުރުމުގެ ގޮތުން އީގަލްސްއިން އަޑުބަރޭ ގެނައިރު، ދާދި ފަހުން އެ ޓީމުން ވަނީ ގްރީން ސްޓްރީޓްސްއަށް ކުޅެމުން އައި މިސްރުގެ ޑިފެންޑަރު އެލްސައީދު މަހުމޫދުވެސް އެ ޓީމަށް ގެނެސްފައެވެ.

މި ފަހަރުގެ އޭއެފްސީ ކަޕުގެ ދެކުނު އޭޝިއާ ގްރޫޕުގެ މެޗުތައް ރާއްޖޭގައި ކުޅޭއިރު، ކޮލިފައިން ކާމިޔާބުކުރާ ޓީމަކަށް ގްރޫޕް ސްޓޭޖުގެ ފަހު ޖާގަ ލިބޭނެއެވެ. ކޮލިފައިންގެ ޕްރިލިމިނަރީ ފުރަތަމަ ބުރުގައި ބޫޓާނުގެ ޗެމްޕިއަން ތިމްޕޫ ސިޓީ އެފްސީއާ އީގަލްސް ވާދަކުރަން ޖެހޭއިރު، އެ މެޗު ކުޅޭނީ އަންނަ އޭޕްރީލް މަހުގެ ހަތްވަނަ ދުވަހު މާލޭގައެވެ. އަދި އެ މެޗުން އީގަލްސް މޮޅުވެއްޖެނަމަ ޕްރިލިމިނަރީ ދެވަނަ ބުރުގައި އީގަލްސް ނުކުންނަން ޖެހޭނީ ބަންގްލަދޭޝްގެ ޑާކާ އަބަހާނީއާ ދެކޮޅަށެވެ. އަދި އެ މެޗުން މޮޅުވެއްޖެނަމަ، ޕްލޭއޮފް ބުރުގައި އީގަލްސް ކުޅެން ޖެހުމުގެ އެންމެ ފުރުސަތު ބޮޑީ އިންޑިއާގެ ބެންގަލޫރާއެވެ.

މުޙައްމަދު ޝިޔާޒް (މޯހަން) ގެ އިރުޝާދުގެ ދަށުން މި ސީޒަނަށް އީގަލްސްއިން ކުރިމަތިލި ނަމަވެސް، ޖެނުއަރީ މަހުގެ 16 ވަނަ ދުވަހު އޭނާ ވަނީ މަގާމުން އިސްތިއުފާދީފައެވެ. އެއާއެކު ޖެނުއަރީ މަހުގެ 31 ވަނަ ދުވަހު އީގަލްސްއިން ވަނީ އެ ޓީމުގެ ކޯޗަކަށް ޓީސީ ސްޕޯޓްސް ކުލަބުގެ ކުރީގެ ކޯޗު މުޙައްމަދު ޝާޒްލީ (ޝާޒް) ހަމަޖައްސާފައެވެ. އެކަމަކު ކޮވިޑް-19 އާ ގުޅިގެން ދިރާގު ދިވެހި ޕްރިމިއާ ލީގު މެދުކަނޑާލުމުން، ޝާޒްލީގެ އިރުޝާދުގެ ދަށުން އީގަލްސްއިން މިހާތަނަށް ރަސްމީ މެޗެއް ކުޅެފައެއް ނުވެއެވެ.