އަޑުބަރޭ އެދުނަސް ރާއްޖެ އަންނަން އަލީ ވަހީދު އުޒުރުވެރިވެއްޖެ
އަޑުބަރޭ ވަނީ އަލީ ވަހީދަށް އެނބުރި ރާއްޖެ އައުމަށް އީމެއިލް މެދުވެރިކޮށް އެދިފައި
ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ)، އިގުރާރާއި ޚިލާފުވެފައި ވާތީ ކުރިއަށް ދިޔަ އަޑުއެހުން
ޖިންސީ ގޯނާގެ ގިނަ ދައުވާތަކެއް ރައްދުވާ ކުރީގެ ޓޫރިޒަމް މިނިސްޓަރު އަލީ ވަހީދު އެނބުރި ރާއްޖެ އައުމަށް އޭނާގެ ޕާސްޕޯޓު ދޫކޮށްލަން ކްރިމިނަލް ކޯޓުން ކުރި އަމުރުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ) އެދުނު ނަމަވެސް، އަލީ ވަޙީދު އެކަމަށް އުޒުރުވެރިވެއްޖެއެވެ.
މި މައްސަލައިގައި އެންމެ ފަހުން ކްރިމިނަލް ކޯޓުގައިއަޑުއެހުމެއްބާއްވާފައިވަނީ ނޮވެމްބަރު މަހުގެ 28 ވަނަ ދުވަހުއެވެ. އެ ދުވަހުގެ އަޑުއެހުމުގައި އަލީ ވަޙީދު ދެން ޝަރީއަތަށް ހާޒިރު ކުރެވޭނީ ފުލުހުންގެ ބެލުމުގެ ދަށުން ބަންދުކޮށްގެން ކަމަށާއި، އޭނާ ޝަރީއަތަށް ހާޒިރުވާނެ ކަމުގެ ޔަޤީންކަން ދީ އެކަމުގައި ޖާމިނުވި އަޑުބަރޭއާ މެދުވެސް އެ މޭރުމުން ފިޔަވަޅު އެޅުމަކީ ޤާނޫނީ ވެރިކަން ދެމެހެއްޓުމަށާއި، ކޯޓުގެ ޙުރުމަތް ރައްކާތެރި ކުރުމުގެ ގޮތުން ކޮންމެހެން ކުރަންޖެހޭ ކަމެއްކަމަށް ދެކިވަޑައިގަންނަވާ ކަމަށް ގާޒީ ޙަސަން ސައީދު ވަނީ ވިދާޅުވެފައެވެ.
ގާޒީ ވަނީ އެވަގުތުން ފެށިގެން 72 ގަޑިއިރުގެ ތެރޭގައި އަލީ ވަޙީދު ކޯޓަށް ހާޒިރު ނުކޮށްދީފިނަމަ، އަޑުބަރޭއާމެދު ފިޔަވަޅު އަޅުއްވާނެ ކަމަށްވެސް ވިދާޅުވެފައެވެ.
ރާއްޖެއެމްވީއަށް އެނގިފައިވާ ގޮތުގައި ހަމަ އެދުވަހު އަޑުބަރޭ ވަނީ އަލީ ވަޙީދަށް އެނބުރި ރާއްޖެ އައުމަށް އީމެއިލް މެދުވެރިކޮށް އެދިފައެވެ. އޭގެ ޖަވާބުވެސް ހަމަ އެދުވަހު އަލީ ވަޙީދު ވަނީ ސިޓީއަކުން ދީފައެވެ. އެ ސިޓީގައި އޭނާ ވަނީ މިވަގުތު ހުރީ އިނގިރޭސިވިލާތުގެ އިމިގްރޭޝަން ބަންދެއްގައިކަން ފާހަގަކޮށް، އެ މައުލޫމާތު 27 އޯގަސްޓުގައި ސިޓީއަކުން ކްރިމިނަލް ކޯޓަށްވެސް ހިއްސާ ކޮށްފައިވާނެ ކަމަށް ބުނެފައެވެ. އަދި އެ ޤައުމުގެ އިހުތިސާސުން ބޭރަށް ދެވޭނީ އޭނާ ބަންދު ކުރި މައްސަލައާއި އޭނާގެ ފަރާތުން ހުށައަޅާފައިވާ މައްސަލައަށް ގޮތެއް ނިމުމުންކަމަށްވެސް އަލީ ބުނެއެވެ.
އޭގެ އިތުރުން އަލީ ވަޙީދުގެ ސިޓީގައި ވަނީ ރާއްޖެއަށްވުރެ ދާ ހިތްވާ ޤައުމެއް ނެތްކަމަށް ބުނެ، ރާއްޖެދާނެ ޓިކެޓުވެސް އެބަ އޮތް ކަމަށާއި، ޓިކެޓުގެ ކަންތަކުގައި މީހަކު ޙަވާލުނުވިޔަސް އެންމެ ރަނގަޅުކަމަށް ބުނެފައެވެ.
މައުލޫމާތު ލިބޭ ގޮތުގައި އަޑުބަރޭގެ ސިޓީގައި އޭނާ ވަނީ އަލީ ވަޙީދު އެނބުރި ރާއްޖެއަށް އައުމަށް ބޭނުންވާ ޓިކެޓުވެސް ހަމަޖައްސައިދޭނެ ކަމަށް ބުނެފައެވެ.
މި މައްސަލައިގައި އަލީ ވަޙީދު ހާޒިރުވާން އުޒުރުވެރިވާތީ އަންގާރަ ދުވަހު އަޑުބަރޭ ވަނީ އެކަން އަންގައި ކްރިމިނަލް ކޯޓަށްވެސް ސިޓީއެއް ފޮނުވާފައެވެ. އެ ސިޓީގައި އޭނާ ވަނީ އޭނާ މި މައްސަލައިގައި ޖާމިނުވީ 4 މަަހަށް ކަމަށް ބުނެ، އެ މުއްދަތުގެ ތެރޭގައި އަލީ ވަޙީދު ކޯޓަށް ހާޒިރުވުމަށް ކޯޓުން އެއްވެސް އެންގުމެއް އަންގާފައިނުވާކަމަށް ބުނެފައެވެ.
އޭގެ އިތުރުން، އިނގިރޭސިވިލާތުގައި ހުންނަ ދިވެހިރާއްޖޭގެ އެމްބަސީ މެދުވެރިކޮށް އަލީ ވަޙީދު ކޯޓަށް ހާޒިރު ކުރުމުގައި އެހީތެރިކަން ފޯރުކޮށްދިނުމަށް އެދި އޭނާ ވަނީ ދިވެހިރާއްޖެއިން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ ފަރަހަނާޒް ފައިސަލްއަށްވެސް ސިޓީއެއް ފޮނުވާފައެވެ.
އަޑުބަރޭ ވަނީ އެ ކަންކަމަށް ރިއާޔަތްކޮށް، އޭނާއާމެދު ފިޔަވަޅު އެޅުމަށް ނިންމި ނިންމުން މުރާޖައާ ކޮށްދިނުމަށް އެދިފައެވެ. އަދި އެކަމާ ގުޅިގެން ޤާނޫނީ ވަކީލެއްގެ އެހީތެރިކަމާއެކު، ކޯޓަށް ޖަވާބުދާރީ ވުމުގެ ފުރުސަތު ދެއްވައި، އަޑުއެހުމެއް ތާވަލު ކޮށްދިނުމަށްވެސް އޭނާ ވަނީ ކްރިމިނަލް ކޯޓަށް ފޮނުވި ސިޓީގައި އެދިފައެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ދައުލަތުންވެސް ވަނީ އެ މުއްދަތުގެ ތެރޭގައި އަލީ ވަޙީދު ހާޒިރުނުކުރެވިއްޖެނަމަ، އަޑުބަރޭއާމެދު ފިޔަވަޅު އަޅުއްވައިދެއްވުމަށް އެދިފައެވެ.
ކޯޓުގައި ހިނގަމުންދާ އެއްވެސް މައްސަލައަކާއި ގުޅިގެން ދައުވާލިބޭ ފަރާތް ދިވެހިރާއްޖޭގެ ސަރަޙައްދުން ބޭރުގައި ވަނިކޮށް އޯޑިއޯ/ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ނުގެންދެވޭނެ ކަމަށް 4 ނޮވެމްބަރު 2021 ގައި ސުޕްރީމް ކޯޓުން ކްރިމިނަލް ކޯޓުގެ މައްޗަށް އަމުރެއް ނެރެފައިވެއެވެ. ނަމަވެސް އޮންލައިންކޮށް އަލީ ވަޙީދު އަޑުއެހުންތަކުގައި ބައިވެރިވި މައްސަލައިގައި، ސުޕްރީމް ކޯޓުގެ އެންގުމާއި އެއްގޮތަށް އަލީ ވަޙީދު ކޯޓަށް ހާޒިރުވެފައިނުވާތީ ކޯޓުން ވަނީ އަލީ ވަޙީދުގެ މައްޗަށް 2 މަހާއި 12 ދުވަހުގެ ޖަލު ޙުކުމެއްވެސް އިއްވާފައެވެ.
