ފްރެންޗް ލީގުގައި ހޮނިހިރު ދުވަހުގެރޭ ކުޅުނު މެޗުން ސްޓްރަސްބޯގް އަތުން ޕީއެސްޖީ މޮޅުވެއްޖެއެވެ.

އަމިއްލަ ދަނޑުގައި ކުޅުނު މި މެޗުން ޕީއެސްޖީ މޮޅުވީ 4-2 ގެ ނަތީޖާއަކުންނެވެ.

މަޝްހޫރު ގިނަ ކުޅުންތެރިންތަކެއް ނުލައި ކުޅުނު މި މެޗު ފަށައިގެން ޕީއެސްޖީ މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މައުރޯ އިކާޑީއެވެ. އަދި މެޗުގެ 25 ވަނަ މިނެޓުގައި ކީލިއަން އެމްބާޕޭ ވަނީ ޕީއެސްޖީއަށް ލީޑު ފުޅާކޮށްދީފައެވެ. އަދި އޭގެ ދެ މިނެޓު ފަހުން އެ ޓީމުގެ ތިންވަނަ ލަނޑު ކާމިޔާބުކޮށްދިނީ ހޫލިއަން ޑްރެކްސްލާއެވެ.

މި މެޗުގެ ފުރަތަމަ ހާފާ ޚިލާފަށް ދެވަނަ ހާފުގައި ސްޓްރަސްބޯގުން އެ ޓީމުގެ ކުޅުން ރަނގަޅުކުރިއިރު، މި ހާފު ފަށައިގެން އަށްވަނަ މިނެޓުގައި ކެވިން ގަމެއިރޯ ވަނީ ފުރަތަމަ ލަނޑު ކާމިޔާބުކޮށްދީފައެވެ. އަދި މެޗުގެ 64 ވަނަ މިނެޓުގައި ލުޑަވިކް އަޖޯކް ވަނީ ލަނޑެއް ޖަހައި، ސްޓްރަސްބޯގަށް ފަރަގު ކުޑަކޮށްދީފައެވެ.

އެކަމަކު އޭގެ ފަހުން ސްޓްރަސްބޯގަށް މައްސަލަތަކެއް ކުރިމަތިވީ މެޗު ނިމެން ނުވަ މިނެޓަށް ވެފައި ވަނިކޮށް އެ ޓީމުގެ އަލެކްސެންޑަ ޖިކޫއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އޭގެ ފައިދާ ނަގައި މެޗުގެ 86 ވަނަ މިނެޓުގައި ޕަބްލޯ ސަރާބިއާ ވަނީ ޕީއެސްޖީއަށް އަލުން ލީޑު ފުޅާކޮށްދީފައެވެ.

މި މެޗުން ޕީއެސްޖީ މޮޅުވިއިރު، މެޗު ފެށުމުގެ ކުރިން އެ ޓީމުން ވަނީ މި ޓްރާންސްފާ ބާޒާރުގައި އެ ޓީމަށް އަލަށް ގުޅުނު ފަސް ކުޅުންތެރިން ސަޕޯޓަރުންނަށް ދައްކާލަފައެވެ. މި ޓްރާންސްފާގައި ޕީއެސްޖީން ވަނީ ހިލޭ ޓްރާންސްފާގެ ދަށުން އާޖެންޓީނާގެ ތަރި ލިއޮނެލް މެސީ އާއި، ރެއާލް މެޑްރިޑުގެ ކުރީގެ ކެޕްޓަން ސާޖިއޯ ރާމޯސް އާއި، ލިވަޕޫލުގެ މިޑްފީލްޑަރު ޖިއޮޖީނިއޯ ވައިނަލްޑަމް އަދި ނިމިދިޔަ ޔޫރޯ ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއިޖީ ޑޮންނަރުއްމާގެ ސޮއިވެސް ހޯދާފައެވެ. ދެން އެ ޓީމުން މި ޓްރާންސްފާގައި ސޮއި ހޯދި ކުޅުންތެރިއަކީ 60 މިލިޔަން ޔޫރޯ ޚަރަދުކޮށް ގެނައި އިންޓަ މިލާނުގެ ޑިފެންޑަރު އަޝްރަފް ހަކީމީއެވެ.

މި ކުޅުންތެރިންގެ ތެރެއިން ހޮނިހިރު ދުވަހުގެރޭ ކުޅުނު މެޗުގައި ބޭނުން ކޮށްފައިވަނީ ވައިނަލްޑަމާއި ހަކީމީއެވެ.