ތާލިބާނުން ކުރި ހޯދަމުންދާތީ ޓްރަމްޕްގެ ފާޑުކިޔުން ބައިޑެންއަށް
14 އޯގަސްޓު 2021 | ހޮނިހިރު 03:07އެމެރިކާ ސިފައިން އަފްޣާނިސްތާނުން ފޭބުމަށް ނިންމީ ޓްރަމްޕްގެ ވެރިކަމުގައި
ޓްރަމްޕް
އެއްވެސް ޝަރުތެއް ނެތި އަފްޣާނިސްތާނުގައި ހަރަކާތްތެރިވި އެމެރިކާގެ ސިފައިން ފައިބާން ފެށުމުން، ތާލިބާނުން އެކި ސަރަހައްދުތައް ހިފައި ކުރި ހޯދަމުންދާތީ އެމެރިކާގެ ކުރީގެ ރައީސް ޑޮނާލްޑް ޓްރަމްޕް ނުރުހުން ފާޅުކުރައްވައިފިއެވެ.
ޓްރަމްޕް ނުރުހުން ފާޅުކުރައްވާ މިހާރުގެ ރައީސް ޖޯ ބައިޑެންއަށް ވަރަށް ބޮޑަށް ފާޑުވިދާޅުވިއިރު، އެމެރިކާގެ ސިފައިން އަފްޣާނިސްތާނުން ފައިބާން ނިންމީ ޓްރަމްގެ ވެރިކަމުގައި ތާލިބާނުންނާއިއެކު ދޯހާގައި ބޭއްވި މަޝްވަރާ ބައްދަލުވުންތަކަށް ފަހުގައެވެ. އޭރު އެއްބަސްވީ މިއަހަރުގެ މޭ މަހުގެ ކުރިން އެމެރިކާގެ ސިފައިން އެގައުމުން ފޭބުމަށެވެ. އެކަމަކު ބައިޑެން ވެރިކަމާއި ހަވާލުވެވަޑައިގަތުމަށްފަހު އެމެރިކާ ސިފައިން އަފްޣާނިސްތާނުން ފޭބުން ވަނީ އޯގަސްޓް 31 ށް ފަސްކޮށްފައެވެ.
ޓްރަމްޕް ނެރުއްވި ބަޔާނެއްގައި ވިދާޅުވީ އޭނާ ރައީސްކަމުގައި ހުރިނަމަ އެމެރިކާ ސިފައިން އަފްޣާނިސްތާނުން ފައިބާނީ ޝަރުތުތަކަކާއިއެކުގައި ކަމަށެވެ. އަދި އެމެރިކާ ސިފައިން ފައިބާނީ މާ ކާމިޔާބުކަމާއިއެކުގައި ކަމަށްވެސް ވިދާޅުވިއެވެ. ޓްރަމްޕް ވިދާޅުވީ މަސްލަހަތު ހިމާޔަތް ކުރުމުގައި ބައިޑެން ވަރަށް ބޮޑަށް ފެއިލް ވެފައިވާ ކަމަށާއި، އެމެރިކާ ފަދަ ވަރުގަދަ ގައުމަކުން ޓެރަރިސްޓުންގެ އަތް މައްޗަށް ގައުމެއް ދޫކޮށްފައި ދިޔުން ބަލައި ނުގަނެވޭނެ ކަމަށެވެ.
އަފްޣާނިސްތާނުގެ އުތުރާއި ހުޅަނގުގެ ބޮޑު ބައެއް ތާލިބާނުންގެ އަތްދަށުގައި މިހާރު އޮތް އިރު، ސަރުކާރުގެ ކޮންޓްރޯލްގެ ދަށުގައިވާ ސިޓީތައް ހިފުމަށް ތާލިބާނުން އަންނަނީ މަސައްކަތް ކުރަމުންނެވެ.
