ފަޔަށް ލިބިފައިވާ އަނިޔާގެ ސަބަބުން ކުރިއަށް އޮތް ސީޒަނުގެ ފުރަތަމަ ހަތަރު ހަފުތާގައި މެންޗެސްޓާ ސިޓީއަށް ކުޅެމުން އަންނަ އިންގްލެންޑުގެ ޒުވާން މިޑްފީލްޑަރު ފިލް ފޯޑެންއަށް ނުކުޅެވޭނެ ކަމަށް ރިޕޯޓުތައް ބުނެފިއެވެ.

އުމުރުން 21 އަހަރުގެ ފޯޑެންއަށް އަނިޔާވީ ނިމިދިޔަ ޔޫރޯ ފުޓްބޯޅަ މުބާރާތުގެ ތެރެއިންނެވެ. އެ މުބާރާތުގެ ރަނަރަޕްކަން އިންގްލެންޑުން ހޯދިއިރު، ފޯޑެން ވަނީ އިންގްލެންޑުން ކުޅުނު ތިން މެޗެއްގައި ކުޅެފައެވެ. ނަމަވެސް އެ މުބާރާތުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.

ޔޫރޯގެ ތެރެއިން ފޯޑެންގެ ފަޔަށް އަނިޔާވިއިރު، ރިޕޯޓުތައް ބުނާ ގޮތުން ކުރިއަށް އޮތް ސީޒަނުގެ ފުރަތަމަ ހަތަރު ހަފުތާގައި އޭނާއަށް ނުކުޅެވޭނެއެވެ. އެގޮތުން އިނގިރޭސި ޕްރިމިއާ ލީގުގައި ސިޓީން ކުޅޭ ފުރަތަމަ ތިން މެޗުގައިވެސް އޭނާއަށް ނުކުޅެވޭނެ ކަމަށް ރިޕޯޓުތައް ބުނެއެވެ. ލީގުގައި ސިޓީން ކުޅޭ ފުރަތަމަ ތިން މެޗުގައި ނުކުންނާނީ ޓޮޓެންހަމް ހޮޓްސްޕާ، ނޯވިޗް ސިޓީ އަދި އާސެނަލާ ދެކޮޅަށެވެ. މީގެ އިތުރުން އަންނަ ސެޕްޓެމްބަރު މަހު ފީފާ ވޯލްޑް ކަޕް ކޮލިފައިންގައި ހަންގޭރީއާ ދެކޮޅަށް އިންގްލެންޑުން ކުޅޭ މެޗުގައިވެސް ފޯޑެންއަށް ނުކުޅެވޭނެ ކަމަށް ރިޕޯޓުތައް ބުނެއެވެ.

ދާދި ފަހުން ދިން އިންޓަވިއުއެއްގައި ފޯޑެން ބުނީ އޭނާގެ ފަޔަށް އަނިޔާވީ ޔޫރޯގެ ފައިނަލް މެޗުގެ ކުރިން ކުރިއަށްގެންދިޔަ ފަރިތަކުރުންތަކުގެ ތެރެއިން ކަމަށެވެ. އަދި އަނިޔާގައި ކުޅުމާ ދުރުގައި ހުންނަން ޖެހުމަކީ އޭނާއަށް ވަރަށް އުނދަގޫވާ ކަމެއް ކަމަށާއި، އެހެންކަމުން އަނިޔާއިން ރަނގަޅުވެ ކުޅުމުގެ ތެރެއަށް އަންނަން ކެތްމަދުވެފައިވާ ކަމަށްވެސް ވަނީ ބުނެފައެވެ.

އަނިޔާގެ ސަބަބުން ކުރިއަށް އޮތް ސީޒަނުގެ ފުރަތަމަ ހަތަރު ހަފުތާގައި ފޯޑެންއަށް ނުކުޅެވޭއިރު، ސިޓީގެ މިޑްފީލްޑަރު ކެވިން ޑި ބްރޭނާއަށްވެސް ވަނީ އަނިޔާވެފައެވެ. ޑި ބްރޭނާގެ ކުޑަހުޅަށް އަނިޔާވީ ޔޫރޯގެ ދެވަނަ ބުރުގައި ޕޯޗުގަލް އަތުން ބެލްޖިއަމް މޮޅުވި މެޗުގައެވެ. އެ އަނިޔާއާ ގުޅިގެން ސީޒަނުގެ ފުރަތަމަ މެޗުގައި ޑި ބްރޭނާއަށްވެސް ނުކުޅެވޭނެ ކަމަށް ސިޓީން މީގެ ކުރިން ވަނީ ބުނެފައެވެ.