ޑރ. ޖަމީލް ނާއިބުރައީސް ކަމުން ވަކިކުރި މައްސަލަ ސުޕްރީމް ކޯޓަށް ނުބެލޭނެ

ރައީސް ޔާމީންގެ ވެރިކަމުގައި، ޑރ. މުހައްމަދު ޖަމީލް އަހުމަދު، ނާއިބުރައީސް ކަމުން ވަކިކުރި މައްސަލަ ސުޕްރީމް ކޯޓަށް ނުބެލޭނެ ކަމަށް އެ ކޯޓުން ހުކުމްކޮށްފިއެވެ.

މި މައްސަލަ ބަލައި ނިންމާ ބުރާސްފަތި ދުވަހު އިއްވި ހުކުމުގައި ބުނެފައިވަނީ، މިއިީ ސުޕްރީމް ކޯޓުން ފުރަތަމަ މަރުހަލާގައި ބެލުމުގެ އިހުތިސާސް ލިބިފައިވާ މަައްސަލައެއް ނޫން ކަމަށެވެ. އަދި މި މައްސަލަ ޑރ. ޖަމީލް ސިވިލް ކޯޓަށް ހުށަހަޅުއްވައިފިނަމަ އެ ކޯޓަށް ބެލިދާނެ ކަމަށެވެ.

ޑރ. ޖަމީލް ނާއިބުރައީސް ކަމުގެ މަގާމުން ވަކިކުރީ، 2015 ޖުލައި 21 ވަނަ ދުވަހުއެވެ.

ސުޕްރީމް ކޯޓަށް ހުށަހަޅާފައިވާ މި މައްސަލައިގައި ބުނެފައިވަނީ، ޑރ. ޖަމީލް މަގާމުން ވަކިކުރުމަށް ރައްޔިތުންގެ މަޖިލީހުން ނިންމި ނިންމުމަކީ، ޤާނޫނުއަސާސީގެ 100 ވަނަ މާއްދާގެ (ހ) އާއި (ރ) ގައި ބަޔާންކޮށްފައިވާ ހަމަތަކާ ޚިލާފުކަމަށެވެ. އަދި ދުސްތޫރީ މިންގަނޑުތަކާއި، މިފަދަ މައްސަލަތަކުގައި ޢަމަލުކުރުމަށް ދުނިޔޭގެ ނިޒާމުތަކުގައި ބިންވަޅުނެގިފައިވާ އުސޫލުތަކާއި ނެޗުރަލް ޖަސްޓިސްގެ ހަމަތަކުން ވެސް ބޭރުން ކަމަށެވެ. އެހެންކަމުން ރައްޔިތުންގެ މަޖިލީހުން ނިންމި ނިންމުމަކީ ޤާނޫނުއަސާސީއާ ޚިލާފު ނިންމުމެއްކަމަށް ކަނޑައަޅައިދިނުމަށެވެ.

މި މައްސަލައިގައި ޖަމީލްގެ ފަރާތުން ހުށަހަޅާފައިވަނީ މައިގަނޑު 3 ނުކުތާއެކެވެ.

ނާގާބިލްކަމަށް ބުނެ މަގާމުން ވަކި ކޮށްފައިވަނީ ގާނޫނާ ޚިލާފަށް ކަމަށާއި، ދިފާއުވުމަށް ދީފައިވާ ހައްގު ނިގުޅައިގެންފައިވާ ކަމަށާއި، ގާނޫނީ ވަކީލެއްގެ އެހީތެރިކަން ހޯދުމަށް ގާނޫނުއަސާސީގައި ބަޔާންކޮށްފައިވާ ހައްގު ނިގުޅައިގެންފައިވާކަމަށެވެ.

ދައުލަތުން ވެސް ވަނީ މ މައްސަލައަކީ ސުޕްރީމް ކޯޓުގެ އިހުތިސާސްގެ ތެރެއިން ބެލޭނެ މައްސަލައެއް ނޫން ކަމަށް ބުނެފައެވެ.

ހުކުމުގައި ބުނެފައިވަނީ ރައްޔިތުންގެ މަޖިލީހުގައި އެއްވެސް ކަމެއް ހިނގިގޮތުގެ ޞައްޙަކަމާމެދު ސުވާލު އުފެއްދޭނީ އެފަދަ ކަމެއް އެއީ ޤާނޫނުއަސާސީއާ ޚިލާފަށް ހިނގާފައިވާ ކަމެއްނަމަ ކަމުގައެވެ. ރައްޔިތުންގެ މަޖިލީހުން އެކި މަޤާމުތަކަށް އައްޔަން ކުރެވިފައިވާ ފަރާތްތައް މަޤާމުން ވަކިކުރުމަށް ޤާނޫނުއަސާސީއިން ބާރު ދެވިފައި އޮތުމުގެ މަޤުޞަދަކީ މަޖިލީހުން ފާރަވެރިވާ ފަރާތްތައް ޖަވާބުދާރީކުރުވައި، އެ ފަރާތްތަކާމެދު ފިޔަވަޅު އެޅުމުގެ ފުރުޞަތު ދިނުން ކަމަށް ވެސް ބުނެފައިވެއެވެ.

މިއީ ރައްޔިތުންގެ މަޖިލީހުގެ ބަރުލަމާނީ އިމްތިޔާޒުގެ ތެރޭގައި ހިމެނޭކަމެއް ކަމަށާއި، ރައީސުލްޖުމްހޫރިއްޔާގެ ނައިބު މަގާމުން ވަކިކުރުމަށް ރައީސްގެ ބަހެއްގެ އިތުރުން، ނުވަތަ މަޖިލީހުން ނާގާބިލު ކަމަށް ކަނޑައެޅުން ފަދަ ކަންކަމުގައި ކޯޓަށް ގޮތެއް ނުނިންމޭނެ ކަމަށެވެ.

އެހެންނަމަވެސް ރައީސްގެ ބަހެއް ނެތި މަގާމުން ވަކިކުރާ ހާލަތްތަކުގައި ވެރިކަން ހިންގާ ބާރުގެ ފަރާތުން ހުށަހަޅައިފިނަމަ އެފަދަ މައްސަލައެއް ސުޕްރީމް ކޯޓަށް ބެލުމުގެ ފުރުސަތު އޮވެދާނެ ކަމަށް ވެސް ހުކުމުގައި ބަޔާންކޮށްފައިވެއެވެ.

ވަކީލަކު އައްޔަން ކުރުމުގެ ހައްގު ނިގުޅައިގެންފައިވާ ކަމަށް ބުނާ ބުނުމާމެދު ކޯޓުގެ ހުކުމުގައި ވަނީ، އަސާސީ ހައްގަކާ ޚިލާފުވެފައިވޭތޯ ކަނޑައެޅުމަށް ޖުޑީޝަލް ރިވިއުއަށް ހުށަހެޅިދާނެ މައްސަލައެއްކަމަށް ސުޕްރީމް ކޯޓަށް ބުރަވެވޭކަމަށެވެ. މި މައްސަލަ ބެލުމުގެ އިހުތިސާސް އޮތީ ކޮން ކޯޓަކާމެދުތޯ ވަނީ ސުވާލު އުފައްދަވާފައެވެ.

އިސް ފަނޑިޔާރެއްގެ ގޮތުގައި މައްސަލަ ބެއްލެވީ އަޒްމިރަލްދާ ޒާހިރުއެވެ.

ރައީސް ޔާމީންގެ ވެރިކަމުގައި ނާއިބުރައީސް ކަމުގެ މަގާމުން ވަކި ކުރެއްވި މައްސަލައިގެ ދައުވާ ރައީސް ޔާމީނާ ދެކޮޅަށް އުފުލިއިރު، ޑރ. ޖަމީލަކީ، ރައީސް ޔާމީންގެ މައްޗަށް ކްރިމިނަލް ކޯޓުގައި އުފުލާފައިވާ ދައުވާތަކުގައި، އެމަނިކުފާނުގެ ދިފާއީ ވަކީލެއް ވެސް މެއެވެ.