މިއަދާ ހަމައަށް އާބާދީގެ 69 އިންސައްތަ މީހުން ވެކްސިންގެ ދެވަނަ ޑޯޒު ފުރިހަމަކޮށްފި

ކޮވިޑް-19ން ދިފާއުވުމަށް ކުރަމުންދާ މަސައްކަތުގެ ދަށުން މިއަދާ ހަމައަށް އާބާދީގެ 80 އިންސައްތަ މީހުން ވެކްސިންގެ ފުރަތަމަ ޑޯޒު ޖަހާފައިވާއިރު، ވެކްސިންގެ ދެވަނަ ޑޯޒު 69 އިންސައްތަ މީހުން ފުރިހަމަކޮށްފިއެވެ.

ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ ކޮވިޑް-19ގެ ބަލިމަޑުކަން މުޅި ދުނިޔެއަށް ކުރިމަތިވުމާއެކު ރާއްޖެއިން ވެސް ހޭދަކުރީ ވަރަށް ދަތި އުނދަގޫ ދުވަސްތަކެއް ކަމަށެވެ.

ދުނިޔޭގައި ކޮވިޑް ފެތުރެން ފެށިއިރު ރާއްޖެއަކީ މިފަދަ ބަލިމަޑުކަމަކާ ކުރިމަތިލުމުގެ އެއްވެސް ވަސީލަތެއް ގާއިމު ކުރެވިފައިވާ ގައުމެއް ނޫންކަން އެމަނިކުފާނު ފާހަގަކުރެއްވިއެވެ. ނަމަވެސް އަމާޒަކަށްވީ މިބައްޔަށް ފަރުވާ ދެވޭ ވަރަށް ރާއްޖޭގެ ސިއްހީ ނިޒާމުގެ ގާބިލުކަން އިތުރުކުރުން ކަމަށާއި، އެމަސައްކަތް ވަރަށް ކާމިޔާބު ކަމާއެކު ކުރެވިފައިވާ ކަމަށް ރައީސް ވިދާޅުވިއެވެ. އަދި މިބަލިމަޑުކަމާއި ގުޅިގެން ރައްޔިތުންނަށް ކުރިމަތިވާނެ އިޖްތިމާޢީ އަދި އިޤްތިޞާދީ ދަތިތައް ވީހާ ވެސް ކުޑަކުރުމަށް ސަރުކާރުން ކޮށްދެވެން ހުރި މަސައްކަތްތައް ކުރާނެ ކަމަށެވެ.

ވެކްސިނޭޝަން ޕްރޮގްރާމަށް އަލިއަޅުއްވާލައްވައި ރައީސް ވިދާޅުވީ, މިހާތަނަށް މުޅި އާބާދީގެ 80 އިންސައްތަ މީހުން ވެކްސިންގެ ފުރަތަމަ ޑޯޒު ފުރިހަމަކޮށްފައިވާ ކަމަށާއި، 69 އިންސައްތަ މީހުން ދެވަނަ ޑޯޒު ވެކްސިން ފުރިހަމަކޮށްފައިވާ ކަމަށެވެ. އަދި މާލޭގައި ވެކްސިން ޖަހާ އާބާދީގެ އެއްލައްކަ އަށްޑިހާ ހާސް މީހުންގެ ތެރެއިން 82 އިންސައްތަ ފުރަތަމަ ޑޯޒު ފުރިހަމަކޮށްފައިވާ ކަމަށާއި، 70 އިންސައްތަ މީހުން ދެވަނަ ޑޯޒު ފުރިހަމަކޮށްފައިވާ ކަމަށެވެ.

މިމަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ ވެކްސިން ޖެހުމަށް ސަރުކާރުން އަމާޒު ހިފާފައިވާއިރު، ވެކްސިން ނުޖަހާ މީހުންނަށް ބައެއް ޚިދުމަތްތައް ލިބިގަތުމުގައި މިހާރު ވަނީ ހުރަސްތަކެއް އަޅާފައެވެ.

އެގޮތުން ސެޕްޓެމްބަރު 1 ވަނަ ދުވަހުގެ ފަހުން, ވެކްސިން ނުޖަހައި ދަތުރުކުރާ މީހުންގެ ރިލީޒް ސާމްޕަލް ދެން ހިލޭ ހަދައި ނުދޭނެ ކަމަށް އެޗްއީއޯސީން ވަނީ ބުނެފައެވެ. އަދި ވެކްސިން ނުޖަހާ މީހުންނަށް އެތެރޭގެ އުދުހުންތަކުން ވެސް ދަތުރުނުކުރެވޭ ގޮތަށް ނިންމުމަށް ސަރުކާރުން މަޝްވަރާތައް ފަށާފައިވާއިރު، ވެކްސިންގެ އެއްވެސް ޑޯޒެއް ނުޖަހާ ތިބި މީހުންނަށް ކެފޭ/ރެސްޓޯރެންޓުތަކުން ޚިދުމަތް ނުދިނުމަށް ވެސް ސަރުކާރުން ވަނީ ނިންމާފައެވެ.

ވެކްސިން ޖެހުމަށްޓަކައި ގްރޭޓަރ މާލެ ސަރަހައްދުގައި 6 ވެކްސިނޭޝަން ސެންޓަރ ހުރިއިރު, 3 މޯބައިލް ޓީމް ދަނީ ހަރަކާތްތެރި ވަމުންނެވެ. އަދި އަތޮޅުތެރޭގައި ވެކްސިން ޖެހުމަށް 176 ސެންޓަރެއް ދަނީ އޮޕަރޭޓްކުރަމުންނެވެ.