މެންޗެސްޓާ ސިޓީއާއެކު ހަދާފައި އޮތް އެއްބަސްވުން އިންގްލެންޑުގެ ޑިފެންޑަރު ޖޯން ސްޓޯންސް އާކޮށްފިއެވެ.
އުމުރުން 27 އަހަރުގެ ސްޓޯންސް ސިޓީއާ ގުޅުނީ 2016 ވަނަ އަހަރުގެ އޯގަސްޓް މަހުގެ ތެރޭގައި އެވަޓަން ދޫކޮށް 47.5 މިލިޔަން ޕައުންޑުގެ ފީއަކަށެވެ. އެ ފަހަރު އޭނާ ވަނީ ސިޓީއާއެކު ހަ އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވަން އޮތީ އަންނަ އަހަރުގެ ހޫނު މޫސުމުގެ ނިޔަލަށެވެ.
ސިޓީގެ އެއްބަސްވުން ސްޓޯންސް އާކުރިއިރު، އެ ޓީމުން އައިމެރިކް ލަޕޯޓާއި ރުބެން ޑިއާސްގެ ސޮއި ހޯދުމާ ގުޅިގެން ސްޓޯންސް ސިޓީ ދޫކޮށްލާނެ ކަމަށް މީގެ ކުރިން ބެލެވުނެވެ. އެކަމަކު އަންގާރަ ދުވަހުގެ ވަގުތެއްގައި ސިޓީން ވަނީ ސްޓޯންސްގެ އެއްބަސްވުން އާކުރިކަން އިއުލާން ކޮށްފައެވެ. ސިޓީގެ އެއްބަސްވުން ސްޓޯންސް އިތުރު ފަސް އަހަރަށް އާކުރުމާއެކު، 2026 ވަނަ އަހަރުގެ ހޫނު މޫސުމުގެ ނިޔަލަށް އޭނާ އެ ކުލަބުގައި މަޑުކުރާނެއެވެ.
އެއްބަސްވުން އާކުރުމަށްފަހު ސްޓޯންސް ބުނީ އެ ޓީމުގެ ކޯޗު ޕެޕް ގާޑިއޯލާއާއެކު މަސައްކަތްކުރުމަކީ ހުވަފެނެއް ހަގީގަތަކަށްވުން ކަމަށާއި، އެހެންކަމުން ގާޑިއޯލާގެ ސްކޮޑުގައި އޭނާ ހިމެނުމަކީ ލިބޭ އުފަލެއް ކަމަށެވެ. އަދި ސިޓީގައި މިހާރު އޮތް ސްކޮޑުގައި ތަޖުރިބާކާރު އެތައް ކުޅުންތެރިންތަކެއް އެބަތިބި ކަމަށާއި، އެހެންކަމުން މި ސްކޮޑާއެކު މުސްތަގުބަލުގައި ގިނަ ކާމިޔާބީތަކެއް ހޯދޭނެ ކަމަށްވެސް ސްޓޯންސް ވަނީ ބުނެފައެވެ.
ސިޓީގައި އިތުރު ފަސް އަހަރު މަޑުކުރަން ސްޓޯންސް ނިންމިއިރު، އޭނާ ވަނީ މިހާތަނަށް ސިޓީއަށް ކުޅެދިން 168 މެޗުގައި 10 ލަނޑު ޖަހާފައެވެ. އަދި ވަނީ ސިޓީއާއެކު އިނގިރޭސި ޕްރިމިއާ ލީގު ތިން ފަހަރު، އިނގިރޭސި ލީގު ކަޕް ދެ ފަހަރު އަދި އިނގިރޭސި އެފްއޭ ކަޕް އެއް ފަހަރު ކާމިޔާބުކޮށްފައެވެ. އަދި ސްޓޯންސްއަކީ މި ފަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި އިންގްލެންޑުގެ ސްކޮޑުގައި ހިމެނުނު މުހިންމު ކުޅުންތެރިއެކެވެ.
