ބާސެލޯނާ ދޫކޮށް ދާން ޖެހުމުން އާޖެންޓީނާގެ ތަރި ލިއޮނަލް މެސީއަށް ކުރި އަސަރު އެސްޓަން ވިލާ ދޫކޮށްލަން ޖެހުމުން އޭނާއަށްވެސް ކުރި ކަމަށް މެންޗެސްޓާ ސިޓީއާ ގުޅުނު އިންގްލެންޑުގެ މިޑްފީލްޑަރު ޖެކް ގްރީލިޝް ބުނެފިއެވެ.
ވިލާ ދޫކޮށް އުމުރުން 25 އަހަރުގެ ގްރީލިޝް ސިޓީއަށް ބަދަލުވިއިރު، މިދިޔަ އަހަރުގެ ސެޕްޓެމްބަރު މަހުގެ ތެރޭގައި އޭނާ ވަނީ ވިލާގެ އެއްބެސްވުން 2025 ވަނަ އަހަރުގެ ހޫނު މޫސުމުގެ ނިޔަލަށް އާކޮށްފައެވެ. އެހެންކަމުން ގްރީލިޝް ގަތުމަށް ސިޓީން ވަނީ 100 މިލިޔަން ޕައުންޑް ޚަރަދުކޮށްފައެވެ. އެއާއެކު ގްރީލިޝް ވެފައިވަނީ އިނގިރޭސި ޕްރިމިއާ ލީގުގެ ކުލަބަކުން އެންމެ އަގުބޮޑުކޮށް ހޯދި ކުޅުންތެރިޔާއަށެވެ.
މިދިޔަ ބުރާސްފަތި ދުވަހު ގްރީލިޝް ސިޓީގެ އެއްބަސްވުމުގައި ސޮއިކުރިއިރު، އޭނާ ވަނީ އެ ކުލަބާއެކު ހަ އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ހޫނު މޫސުމުގައެވެ.
"ސްކައި ސްޕޯޓްސް" އަށް ދިން އިންޓަވިއުއެއްގައި ގްރީލިޝް ބުނީ މި ފަހަރު އެންމެ ފުރަތަމަ ވިލާގެ ފަރިތަކުރުންތަކަށް ނުކުތީ އެ ޓީމުގައި މަޑުކުރުމަށް ވިސްނައިގެން ކަމަށާއި، އެކަމަކު ހުރިހާ ކަމެއް ބަދަލުވީ ކުއްލިއަކަށް ކަމަށެވެ. އަދި ދާދި ފަހުން ބާސެލޯނާ ދޫކޮށްލަން ޖެހުމުން މެސީ ބޭއްވި ވަދާއީ ނޫސްވެރިންގެ ބައްދަލުވުން ދިޔަގޮތް އެންމެނަށްވެސް ފެނިގެންދިޔަ ކަމަށާއި، އެ ބައްދަލުވުމުގައި މެސީއަށް ކުރި އަސަރަކީ އޭނާ ވިލާ ދޫކޮށްލަން ޖެހުމުންވެސް ކުރި އަސަރު ކަމަށްވެސް ވަނީ ބުނެފައެވެ.
އުމުރުން އެންމެ ހަ އަހަރުގައި ވިލާއާ ގުޅުނު ގްރީލިޝް އެ ޓީމު ދޫކޮށް ސިޓީއަށް ބަދަލުވިއިރު، ވިލާގެ ސީނިއާ ޓީމަށް އެންމެ ފުރަތަމަ އޭނާ މެޗެއް ކުޅެދީފައިވަނީ 2014 ވަނަ އަހަރުގެ މެއި މަހުގައެވެ. އޭގެ ފަހުން ގްރީލިޝް ވަނީ ވިލާއަށް ކުޅެދިން 213 މެޗުގައި 32 ލަނޑު ކާމިޔާބުކޮށްފައެވެ.
ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ގްރީލިޝް ވަނީ މިދިޔަ އަހަރުގެ ސެޕްޓެމްބަރު މަހުގެ ކުރީކޮޅު ކުޅުނު ޔުއެފާ ނޭޝަންސް ލީގުގެ މެޗުތަކަށް އެކުލަވާލި އިންގްލެންޑުގެ ގައުމީ ފުޓްބޯޅަ ޓީމުގެ ސްކޮޑުން ފުރަތަމަ ފަހަރަށް ފުރުސަތު ހޯދާފައެވެ. އޭގެ ފަހުން މި ފަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި އިންގްލެންޑް ޓީމުގައިވެސް ގްރީލިޝް ހިމެނުނެވެ.
