ކުޑަކަޅުވާއަށް ލިބުނު އަނިޔާއެއްގެ ސަބަބުން ބާސެލޯނާއާ ދާދި ފަހުން ގުޅުނު އާޖެންޓީނާގެ ތަޖުރިބާކާރު ފޯވާޑް ސާޖިއޯއަށް ކުރިއަށް ސީޒަނުގެ ފުރަތަމަ ދެ މަހެއްހާ ދުވަހު ނުކުޅެވޭނެ ކަމަށް ރިޕޯޓުތައް ބުނެފިއެވެ.
އުމުރުން 33 އަހަރުގެ އަގުއޭރޯ ބާސާއަށް ބަދަލުވީ މެންޗެސްޓާ ސިޓީގައި 10 އަހަރު ހޭދަކުރުމަށްފަހު މިދިޔަ ޖޫން މަހުއެވެ. ބާސާއާއެކު އަގުއޭރޯ ދެ އަހަރުގެ އެއްބަސްވުމެއް ހެދިއިރު، މި އެއްބަސްވުން އުވާލަން އެހެން ކުލަބަކުން 100 މިލިޔަން ޔޫރޯ ދައްކަން ޖެހޭނެ ކަމަށް ރިޕޯޓުތައް ބުނެއެވެ.
ބާސާއިން ދާދި ފަހުން ނެރުނު ބަޔާނެއްގައި ވަނީ އަގުއޭރޯގެ ކަނާތު ފައިގެ ކުޑަކަޅުވާ މަސްގަނޑަށް އަނިޔާވެފައިވާކަން ކަށަވަރުކޮށްދީފައެވެ. އަދި މި އަނިޔާގެ ސަބަބުން އަގުއޭރޯއަށް ކުރިއަށް އޮތް 10 ހަފުތާގައި ނުކުޅެވޭނެ ކަމަށްވެސް މި ބަޔާނުގައި ވަނީ ބުނެފައެވެ.
ކުޑަކަޅުވާއަށް ލިބުނު އަނިޔާއެއްގެ ސަބަބުން އަގުއޭރޯއަށް ފުރަތަމަ ދެ މަހު ނުކުޅެވޭއިރު، އޭނާ އަދި މިހާތަނަށް ބާސާއަށް މެޗެއް ކުޅެދީފައެއް ނުވެއެވެ. އެކަމަކު ކޮޕާ އެމެރިކާ ފުޓްބޯޅަ މުބާރާތަށްފަހު އަގުއޭރޯ ވަނީ ބާސާގެ ފަރިތަކުރުންތަކުގައި ބައިވެރިވެފައެވެ.
ސިޓީ ދޫކޮށް އަގުއޭރޯ ބާސާއަށް ބަދަލުވިއިރު، މީގެ ކުރިން ސްޕެއިނުގެ މީޑިއާތަކުން ވަނީ ބާސާއިން އަގުއޭރޯގެ ގާތް އެކުވެރިއެއް ކަމަށްވާ އާޖެންޓީނާގެ ތަރި ލިއޮނެލް މެސީ ދޫކޮށްލުމާ ގުޅިގެން، އަގުއޭރޯވެސް އެ ކުލަބު ދޫކޮށްލަން މަސައްކަތް ކުރަމުން އަންނަ ކަމަށް ރިޕޯޓުކޮށްފައެވެ. އަދި އެނބުރި ސިޓީއަށް ބަދަލުވާންވެސް އަގުއޭރޯ މަސައްކަތްކުރި ކަމަށް ވަނީ ރިޕޯޓުކޮށްފައެވެ. އެކަމަކު ދާދި ފަހުން ދިން އިންޓަވިއުއެއްގައި އަގުއޭރޯ ވަނީ ބާސާއިން މެސީ ދޫކޮށްލި ނަމަވެސް، އޭނާގެ ފޯކަސް ހުރީ ކުރިއަށް އޮތް ސީޒަނުގައި ބާސާގައި ރަނގަޅަށް ކުޅެ، ގިނަ ކާމިޔާބީތަކެއް ހޯދުމަށް ކަމަށް ބުނެފައެވެ.
ސިޓީ ދޫކޮށް އަގުއޭރޯ ބާސާއަށް ބަދަލުވިއިރު، މީގެ ކުރިން އޭނާ ވަނީ ސްޕެނިޝް ލީގުގައި ވާދަކުރަމުން އަންނަ އެތުލެޓިކޯ މެޑްރިޑަށްވެސް ކުޅެފައެވެ. އެތުލެޓިކޯ ދޫކޮށް އަގުއޭރޯ އެންމެ ފުރަތަމަ ސިޓީއާ ގުޅުނީ 2011 ވަނަ އަހަރެވެ. އެއަށްފަހު އަގުއޭރޯ ވަނީ ސިޓީއަށް ކުޅެދިން 390 މެޗުގައި 260 ލަނޑު ޖަހާފައެވެ. އަދި ސިޓީއާއެކު އަގުއޭރޯ އިނގިރޭސި ޕްރިމިއާ ލީގު ފަސް ފަހަރު ކާމިޔާބުކޮށްފައިވާއިރު، އޭނާ އަކީ ޕްރިމިއާ ލީގުގެ ތާރީޚުގައި އެއް ކުލަބަކަށް އެންމެ ގިނަ ލަނޑު ޖެހުމުގެ ރިކޯޑު އޮންނަ ކުޅުންތެރިޔާއެވެ.
